Í-su-la-kì 8

Í-su-la-kì 8 - 現代台語譯本羅馬字版(TTVR)-闽南语

Liû-hòng Tò-tńg--lâi ê Lâng

1Ē-bīn sī A-ta̍t-sih-se-ông chāi-ūi ê sî, kap góa tùi Pa-pí-lûn tò-tńg--lâi ê cho̍k-tiúⁿ, kap in ê ka-phó͘:

2 Hui-nî-hap ê hō͘-tāi ū Kek-sūn, Í-tha-má ê hō͘-tāi ū Tān-í-lí, Tāi-pi̍t ê hō͘-tāi ū Hap-tu̍t.

3Sī-ka-nî ê hō͘-tāi; Pa-lio̍k ê hō͘-tāi ū Sat-ka-lī-a; kap i chòe-hé tńg--lâi, chiàu ka-phó͘ sǹg, ū ta-po͘-lâng chi̍t-pah gō͘-cha̍p miâ.

4Pa-hap Mô͘-ap ê hō͘-tāi ū Se-la-hi-ngá ê kiáⁿ Í-lī-iok-nái; kap i chòe-hé--ê, ū ta-po͘-lâng nn̄g-pah miâ.

5Sat-thó͘

ê hō͘-tāi ū Ngá-hap-sek ê kiáⁿ Sī-ka-nî; kap i chòe-hé--ê, ū ta-po͘-lâng saⁿ-pah miâ.

6A-teng ê hō͘-tāi ū Iok-ná-tan ê kiáⁿ Í-pia̍t; kap i chòe-hé--ê, ū ta-po͘-lâng gō͘-cha̍p miâ.

7Í-lân ê hō͘-tāi ū A-tha-lī-ngá ê kiáⁿ Í-sài-a; kap i chòe-hé--ê, ū ta-po͘-lâng chhit-cha̍p miâ.

8Sī-hoat-thê-ngá ê hō͘-tāi ū Bí-ka-le̍k ê kiáⁿ Se-pa-tē-ngá; kap i chòe-hé--ê, ū ta-po͘-lâng poeh-cha̍p miâ.

9Iok-ap ê hō͘-tāi ū Iâ-hiat ê kiáⁿ Gô-pa-tí-a; kap i chòe-hé--ê, ū ta-po͘-lâng nn̄g-pah cha̍p-poeh miâ.

10Pa-nî

ê hō͘-tāi ū Iok-sè-húi ê kiáⁿ Sī-lô-bi̍t; kap i chòe-hé--ê, ū ta-po͘-lâng chi̍t-pah la̍k-cha̍p miâ.

11Pí-pài ê hō͘-tāi ū Pí-pài ê kiáⁿ Sat-ka-lī-a; kap i chòe-hé--ê, ū ta-po͘-lâng jī-cha̍p-poeh miâ.

12Ap-kah ê hō͘-tāi ū Hap-ka-thán ê kiáⁿ Iok-hap-lân; kap i chòe-hé--ê, ū ta-po͘-lâng chi̍t-pah cha̍p miâ.

13A-to-nî-kan ê hō͘-tāi khah bān tńg--lâi-ê ū Í-lī-hoat-lia̍t, Iâ-lī, Sī-má-ngá; kap in chòe-hé--ê, ū ta-po͘-lâng la̍k-cha̍p miâ.

14Pí-kek-óa-i ê hō͘-tāi ū O͘-thài kap Sat-khek; kap in chòe-hé--ê, ū ta-po͘-lâng chhit-cha̍p miâ.

Í-su-la Tiàu-chi̍p Lī-bī-lâng

15Góa tiàu-chi̍p chiah-ê lâng lâi kàu hit-tiâu lâu-ji̍p A-hap-óa-siâⁿ ê hô ê hô-piⁿ; goán tī hia chat-iâⁿ saⁿ ji̍t kú. Góa sûn-sī jîn-bîn kap chè-si, m̄-kú bô khòaⁿ-tio̍h Lī-bī-lâng.

16Góa chiū chhe lâng khì tiàu hiah-ê léng-siù, chiū-sī Í-lī-í-siā, A-lī-i-le̍k, Sī-má-ngá, Í-lī-ná-tan, Ngá-li̍p, Í-lī-ná-tan, Ná-tan, Sat-ka-lī-a, Bí-su-lân; koh kàu-su Iok-ngá-li̍p kap Í-lī-ná-tan.

17Góa chhe in khì Ka-se-húi-ngá tōe-khu kìⁿ hit só͘-chāi ê léng-siù E̍k-to, koh kà in tio̍h án-chóaⁿ tùi E̍k-to kap i ê tông-sū sèng-tiān ê kang-lâng kóng-ōe, thang hō͘ in phài lâng lâi lán ê Siōng-tè ê sèng-tiān ho̍k-sāi.

18Lán ê Siōng-tè si-un pang-chān goán, hō͘ in tī Í-sek-lia̍t ê cheng-sun, Lī-bī ê sun, Boat-lī ê hō͘-tāi tiong, tòa chi̍t ê ū châi-lêng ê lâng Sī-lī-pí lâi; i ê kiáⁿ kap i ê chhin-cho̍k kiōng cha̍p-poeh lâng mā chòe-hé lâi.

19Koh tòa Hap-sa-pí-ngá; kap i chòe-hé--ê ū Bí-la-lī ê hō͘-tāi Í-sài-a, i ê chhin-cho̍k, kap in ê kiáⁿ, kiōng jī-cha̍p lâng.

20Koh tòa nn̄g-pah jī-cha̍p ê sèng-tiān ê kang-lâng; in ê miâ lóng ū teng-lio̍k, in ê chó͘-sian siū Tāi-pi̍t kap hiah-ê tāi-sîn chí-phài lâi hia̍p-chō͘ Lī-bī-lâng.

Soan-pò͘ Kìm-chia̍h Kî-tó

21Hit-sî, góa tī A-hap-óa-hô hô-piⁿ soan-pò͘ kìm-chia̍h, thang tī lán ê Siōng-tè ê bīn-chêng khek-khó͘ khiam-pi, kiû Siōng-tè hō͘ goán, goán ê gín-á, kap goán it-chhè só͘ ū--ê, lóng chi̍t-lō͘ pêng-an.

22Góa kám-kak chhéng-kiû hông-tè phài pō͘-peng bé-peng chi̍t-lō͘ pó-hō͘ goán, bián siū tùi-te̍k ê kong-kek, sī kiàn-siàu ê sū, in-ūi goán bat tùi hông-tè kóng, “Goán ê Siōng-tè ōe si-un pó-hō͘ só͘-ū kiû-kiò I ê lâng, m̄-kú I mā ōe hoat tōa siū-khì kong-kek khì-sak I ê lâng.”

23Só͘-í, goán ūi-tio̍h chit-hāng sū kìm-chia̍h, khún-kiû goán ê Siōng-tè; I ū thiaⁿ goán ê kî-tó.

Ūi Sèng-tiān Hōng-hiàn

24Tùi án-ni, góa chí-phài cha̍p-jī ê chè-si-tiúⁿ, chiū-sī Sī-lī-pí, Hap-sa-pí-ngá, kap in cha̍p ê chhin-cho̍k,

25chiong hông-tè kap i ê chham-bô͘, koaⁿ-oân, í-ki̍p tī hia ê Í-sek-lia̍t chèng-lâng hōng-hiàn hō͘ lán ê Siōng-tè ê sèng-tiān, hiah-ê kim, gûn kap khì-khū, lóng chhìn--kè, kau hō͘ hit cha̍p-jī ê chè-si.

26Góa chhìn--kè kau hō͘ in--ê, ū gûn jī-cha̍p-jī kong-tùn, gûn-khì chhit-cha̍p kong-kun, kim saⁿ-chheng sì-pah kong-kun,

27í-ki̍p kim-óaⁿ jī-cha̍p tè, tāng poeh tiám sì kong-kun; kim-sih-sih ê tâng-khì nn̄g tè, kùi-tiōng chhin-chhiūⁿ kim.

28Góa tùi in kóng, “Lín í-keng sèng-hòa kui Siōng Chú, chiah-ê khì-khū mā lóng sèng-hòa kui Siōng Chú; chiah-ê kim-gûn sī jîn-bîn kam-sim hiàn hō͘ Siōng Chú — lín lia̍t-chó͘ ê Siōng-tè ê.

29Lín tio̍h kéng-séng kò͘-siú, it-ti̍t kàu lín khì kàu Iâ-lō͘-sat-léng Siōng Chú sèng-tiān ê khò͘-pâng, tī chè-si-tiúⁿ kap Lī-bī-lâng, í-ki̍p Í-sek-lia̍t cho̍k-tiúⁿ ê bīn-chêng chhìn--kè kau hō͘ in.”

30Tùi án-ni, chè-si kap Lī-bī-lâng chiong kè-chhìn ê kim-gûn kap khì-khū chiap--kè-lâi, beh tòa-khì Iâ-lō͘-sat-léng lán ê Siōng-tè ê tiān.

Tńg-khì Iâ-lō͘-sat-léng

31Chiaⁿ-ge̍h cha̍p-jī, goán tùi A-hap-óa ê hô-piⁿ chhut-hoat, beh khì Iâ-lō͘-sat-léng; goán ê Siōng-tè chi̍t-lō͘ pó-hō͘ goán, kiù goán thoat-lī tùi-te̍k kap bâi-ho̍k ê lâng ê kong-kek.

32Goán kàu Iâ-lō͘-sat-léng, tī hia hioh-khùn saⁿ ji̍t.

33Tē-sì ji̍t, goán kàu Siōng-tè ê tiān, chhìn hiah-ê kim gûn kap khì-khū, kau hō͘ chè-si O͘-lī-a ê kiáⁿ Bí-lī-boa̍t; kap i chòe-hé--ê ū Hui-nî-hap ê kiáⁿ Í-lī-a-sat, Lī-bī-lâng Iâ-su-a ê kiáⁿ Iok-sat-poa̍t, kap Pin-lōe ê kiáⁿ Ná-a-tí.

34Ta̍k-hāng mi̍h-kiāⁿ lóng sǹg--kè, chhìn--kè, koh siông-sè kì-lio̍k.

35Só͘-ū liû-hòng tò-tńg--lâi ê lâng lóng hiàn sio-hòa-chè hō͘ Í-sek-lia̍t ê Siōng-tè; in ūi-tio̍h Í-sek-lia̍t chèng-lâng hiàn gû-káng cha̍p-jī chiah, mî-iûⁿ-káng káu-cha̍p-la̍k chiah, mî-iûⁿ-á chhit-cha̍p-chhit chiah; koh hiàn soaⁿ-iûⁿ-káng cha̍p-jī chiah lâi kiat-chēng ka-kī ê chōe. Chiah-ê lóng chòe sio-hòa-chè hiàn hō͘ Siōng Chú.

36In chiong hông-tè ê chiàu-su kau hō͘ i ê jîn-sîn kap Hô-se-séng ê chóng-tok; hiah-ê koaⁿ-oân chiū pang-chān jîn-bîn, kiong-kip Siōng-tè ê sèng-tiān.

Í-su-la-kì 8 - 現代台語譯本羅馬字版(TTVR)-闽南语

Learn More About Us