Í-se-kiat-su 5

Í-se-kiat-su 5 - 現代台語譯本羅馬字版(TTVR)-闽南语

Í-se-kiat Thì-thâu

1Siōng Chú kóng, “Jîn-chú ah, lí tio̍h the̍h chi̍t ki lāi-kiàm chòe thì-thâu-to, thì lí ê thâu-mn̂g, khau lí ê chhùi-chhiu, ēng thian-phêng kā in chhìn, pîⁿ-pun chòe saⁿ hūn.

2Siâⁿ siū ûi-khùn ê ji̍t-chí móa liáu-āu, lí tio̍h the̍h saⁿ-hūn-chi̍t ê chhùi-chhiu kap thâu-mn̂g tī siâⁿ-lāi sio; the̍h lēng-gōa saⁿ-hūn-chi̍t khì siâⁿ-gōa, kā in tok hō͘ iù-iù; koh the̍h chhun ê saⁿ-hūn-chi̍t iā tī khong-tiong, hō͘ hong chhe-sòaⁿ, góa mā beh pu̍ih kiàm tui-kóaⁿ in.

3Lí tio̍h lâu kúi ki mn̂g, ēng lí ê saⁿ-á-ku pau--teh,

4jiân-āu koh the̍h kúi ki mn̂g chhut--lâi, hiat tī hé--ni̍h sio. Hé beh tùi hia sio, thòaⁿ kàu Í-sek-lia̍t choân-kok.”

5Chì-koân ê Siōng Chú kóng, “Che chiū-sī Iâ-lō͘-sat-léng! Góa kā i hē tī bān-kok ê tiong-sim, hō͘ lia̍t-kok tī i ê sì-chiu-ûi.

6M̄-kú i ûi-pōe góa ê bēng-lēng kap kui-lē, pí lia̍t-kok koh-khah siâ-ok, pí i chiu-ûi ê kok-ka koh-khah pōe-ge̍k. I bô siú góa ê bēng-lēng, khì-sak góa ê kui-lē.

7Só͘-í, Iâ-lō͘-sat-léng! Tio̍h thiaⁿ góa — Chì-koân ê Siōng Chú só͘ kóng ê ōe. Lí bô siú góa ê kui-lē, khì-sak góa ê bēng-lēng, liân sì-chiu-ûi lia̍t-kok ê kui-kú mā bô chun-siú.

8In-ūi án-ni, góa — Chì-koân ê Siōng Chú soan-pò͘, góa beh kap lí choh tùi-te̍k; góa beh tī lia̍t-kok ê bīn-chêng sím-phòaⁿ lí.

9In-ūi lí chòe khó-ò͘ⁿ ê sū, góa beh hêng-hoa̍t lí. Góa chêng-kàu-taⁿ m̄-bat án-ni kā lí hêng-hoa̍t, í-āu mā bōe koh án-ni hêng-hoa̍t lí.

10Tī lí kéng-lāi, pē-bú beh chia̍h in ê kiáⁿ-jî, kiáⁿ-jî mā beh chia̍h in ê pē-bú. Góa beh kā lí hêng-hoa̍t, beh kā Í-sek-lia̍t só͘ chhun ê jîn-bîn lóng liû-hòng khì ta̍k só͘-chāi.

11“Só͘-í, góa — Chì-koân ê Siōng Chú ēng ka-kī ê oa̍h-miā li̍p-sè: Lí kì-jiân chòe thang iàm-ò͘ⁿ, thang thòng-hūn ê sū lâi phah lâ-sâm góa ê sèng-tiān, góa beh kā lí siau-bia̍t, bô beh tông-chêng, bô beh thiàⁿ-sioh.

12Í-sek-lia̍t ê jîn-bîn saⁿ-hūn-chi̍t beh in-ūi un-e̍k, á-sī ki-hng sí; lēng-gōa saⁿ-hūn-chi̍t beh tī siâⁿ-gōa sì-ûi hō͘ to-kiàm thâi-sí; chhun ê saⁿ-hūn-chi̍t góa beh hō͘ in lóng sì-sòaⁿ khì ta̍k só͘-chāi, mā beh pu̍ih kiàm tui-kóaⁿ in.

13“Án-ni, góa ê siū-khì chiah ōe siau, góa tùi in ê tōa siū-khì chiah ōe soah. In chiū chai góa Siōng Chú chhut tī kek-tōng jia̍t-chhiat kóng chiah-ê ōe.

14Góa beh hō͘ lí tú-tio̍h kiàn-siàu, hō͘ lí pìⁿ-chòe hong-po͘, sì-chiu-ûi lia̍t-kok tùi chia keng-kè ê lâng lóng beh thí-chhiò lí.

15“Góa hoat tōa siū-khì, tāng-tāng hêng-hoa̍t lí ê sî, lí beh tī sì-chiu-ûi ê lia̍t-kok tiong siū lêng-jio̍k, thí-chhiò; in mā beh in-ūi lí só͘ siū ê hêng-hoa̍t tio̍h-kiaⁿ, siū kéng-kài. Góa Siōng Chú án-ni soan-kò.

16Góa ǹg chù-tiāⁿ bia̍t-bông ê lâng siā-chhut ki-hng húi-bia̍t ê chìⁿ ê sî, góa beh hō͘ ki-hng koh-khah giâm-tiōng, beh toān-choa̍t lín ê niû-si̍t.

17Góa beh hō͘ lín tú-tio̍h ki-hng, siū iá-siù chhim-hoān, lín ōe sit-khì kiáⁿ-jî, mā ōe tú-tio̍h un-e̍k, pō-le̍k, kap chiàn-cheng.” Siōng Chú án-ni soan-kò.

Í-se-kiat-su 5 - 現代台語譯本羅馬字版(TTVR)-闽南语

Learn More About Us