Í-sài-a-su 24

Í-sài-a-su 24 - 現代台語譯本羅馬字版(TTVR)-闽南语

Siōng Chú Beh Hêng-hoa̍t Tāi-tōe

1Khòaⁿ leh, Siōng Chú hō͘ tāi-tōe pha-hng, oân-choân hong-hòe;

I kā tōe-bīn péng-lìn-tńg, hō͘ chū-bîn lóng sì-sòaⁿ.

2Jîn-bîn án-chóaⁿ, chè-si mā án-ni;

po̍k-jîn án-chóaⁿ, chú-lâng mā án-ni;

lú-pī án-chóaⁿ, lú-chú-lâng mā án-ni;

bóe-mi̍h--ê án-chóaⁿ, bōe-mi̍h--ê mā án-ni;

kā-lâng-chioh--ê án-chóaⁿ, chioh--lâng-ê mā án-ni;

sàn-chhiah--ê án-chóaⁿ, hó-gia̍h--ê mā án-ni.

In lóng ōe sì-sòaⁿ.

3Tāi-tōe ōe oân-choân pha-hng, hō͘ lâng chhiúⁿ kah khang-khang.

Siōng Chú án-ni soan-kò.

4Tāi-tōe soe-pāi, ta--khì;

sè-kài soe-pāi, tó-hoāi;

tōe-chiūⁿ ko-kùi ê lâng mā soe-bî.

5Tāi-tōe hō͘ khiā-khí ê chū-bîn ù-jiám;

in phò-hoāi lu̍t-hoat, ûi-hoán lu̍t-lē,

ûi-pōe éng-oán ê iok.

6Só͘-í, tāi-tōe siū chiù-chó͘ tì-kàu pāi-hoāi,

tōe-chiūⁿ ê chū-bîn lóng in-ūi in ê chōe siū hêng-hoa̍t;

só͘ chhun ê lâng kiám-chió,

chhun bô kúi ê.

7Sin-chiú ta--khì, phû-tô-chhiū ko͘-tâ;

khoài-lo̍k ê lâng mā lóng thó͘-khùi.

8Lin-long-kó͘ khoài-lo̍k ê siaⁿ tiām--khì,

iàn-lo̍k chháu-nāu ê siaⁿ chēng--khì,

tôaⁿ-khîm ê siaⁿ-im mā lóng bô--khì.

9Bô koh ū lâng lim-chiú chhiùⁿ-koa;

kāu-chiú lim--khí-lâi khó͘-te̍h-te̍h.

10Siâⁿ pha-hng, siū thiah-húi;

chhù lóng koaiⁿ--teh, bô lâng chhut-ji̍p.

11Lâng tī koe-lō͘ hoah beh chhē chiú lim;

it-chhè ê khoài-lo̍k pìⁿ-chòe àm-tām,

tōe-chiūⁿ ê hoaⁿ-hí lóng siau-sit.

12Siâⁿ-chhī hong-hòe,

siâⁿ-mn̂g kòng kah chhùi-kô͘-kô͘.

13Tōe-chiūⁿ bān-bîn mā ōe án-ni,

chhin-chhiūⁿ kaⁿ-ná-chhiū phû-tô-chhiū siu-sêng liáu, koh chhē mā chhē bô jōa-chōe.

14In tōa-siaⁿ hoan-ho͘,

tùi sai-pêng soan-pò͘ Siōng Chú ê ui-giâm.

15In-ūi án-ni, lín tio̍h tùi tang-pêng kui êng-kng hō͘ Siōng Chú,

tī chèng hái-sū chheng-chàn Siōng Chú — Í-sek-lia̍t ê Siōng-tè ê miâ.

16Tùi thiⁿ-piⁿ-hái-kak, goán thiaⁿ-tio̍h koa-siaⁿ,

“Êng-kng kui hō͘ Kong-gī ê Siōng-tè!”

M̄-kú góa kóng, “Góa ōe sí! Góa ōe sí!

Góa chhám ah! Pōe-poān ê lâng kè-sio̍k pōe-poān;

khi-phiàn ê lâng iáu-teh khi-phiàn.”

17Tōe-chiūⁿ ê chū-bîn ah,

khióng-pò͘, hām-khiⁿ, oa̍h-tauh teh tng-tán lín.

18Siám-pī khióng-pò͘ siaⁿ-im ê lâng ōe poa̍h-lo̍h hām-khiⁿ;

tùi hām-khiⁿ tô-thoat ê lâng ōe hō͘ oa̍h-tauh tauh--tio̍h.

Thiⁿ-téng ê thang-á lóng phah-khui;

tōe-chiūⁿ ê kun-ki iô-tāng.

19Tāi-tōe chòe-chi̍t-ē phò-hoāi,

li̍h kah chhùi-chhùi;

tōe tōa iô-tāng,

20chhin-chhiūⁿ chiú-chùi ê lâng tian-lâi-tian-khì,

ná-chún chháu-chhù-á iô-lâi-iô-khì.

Tōe hō͘ chōe tāng-tāng teh--leh,

pang--lo̍h-khì, bōe koh-chài khí--lâi.

21Hit-ji̍t, Siōng Chú beh hêng-hoa̍t thiⁿ-téng ê thian-kun,

mā beh chhú-hoa̍t tōe-chiūⁿ ê kun-ông.

22In ōe chhin-chhiūⁿ hoān-lâng hō͘ lâng chi̍p-tiong tī tōe-lô,

koaiⁿ tī kaⁿ-ga̍k;

kè chi̍t tōaⁿ sî-kan chiū siū hêng-hoa̍t.

23Hit-sî, ge̍h-niû ōe kiàn-siàu, ji̍t-thâu ōe làu-khùi,

in-ūi Siōng Chú — Bān-kun ê Thóng-sòe beh tī Sek-an-soaⁿ, tī Iâ-lō͘-sat-léng choh-ông,

tùi I ê tiúⁿ-ló hián-chhut êng-kng.

Í-sài-a-su 24 - 現代台語譯本羅馬字版(TTVR)-闽南语

Learn More About Us