Í-se-kiat-su 30

Í-se-kiat-su 30 - 現代台語譯本羅馬字版(TTVR)-闽南语

Siōng Chú Beh Hêng-hoa̍t Ai-ki̍p

1Siōng Chú tùi góa kóng,

2“Jîn-chú ah, lí tio̍h kóng ū-giân; lí tio̍h kóng Chì-koân ê Siōng Chú án-ni kóng:

Chhám ah, hit-ji̍t! Lín tio̍h tōa-siaⁿ ai-khàu.

3Hit-ji̍t kàu lah! Siōng Chú ê ji̍t pek-kūn lah!

Hit-ji̍t sī o͘-hûn-bi̍t-pò͘, lia̍t-kok siū hêng-hoa̍t ê ji̍t-chí.

4 Ai-ki̍p beh tú-tio̍h chiàn-loān,

Kó͘-si̍t ōe kám-siū thòng-khó͘.

Ai-ki̍p-lâng siū tô͘-sat ê sî,

jîn-bîn ê châi-hù beh hō͘ lâng chhiúⁿ--khì;

i ê kun-ki oân-choân siū thiah-húi.

5 Kó͘-si̍t-lâng, Hut-lâng, Lū-tí-a-lâng, A-la-pek-lâng, Kò͘-phó͘-lâng, í-ki̍p kap Ai-ki̍p kiat-bêng--ê lóng beh kap Ai-ki̍p-lâng chòe-hé sí tī to-ē.

6“Siōng Chú án-ni kóng, ‘Tùi pak-pō͘ ê Bi̍t-toa̍t kàu lâm-pō͘ ê Sek-hut-nî, só͘-ū chi-chhî Ai-ki̍p ê lâng lóng beh sí tī to-ē; Ai-ki̍p khoa-iāu ê koân-sè beh kàng-kē pìⁿ-chòe pi-bî. Góa — Chì-koân ê Siōng Chú án-ni soan-kò.

7Ai-ki̍p beh pìⁿ-chòe sè-kan siōng pha-hng ê só͘-chāi, bô chi̍t ê siâⁿ-tìn ōe pí Ai-ki̍p ê siâⁿ-tìn koh-khah hong-hòe.

8Góa pàng-hé sio Ai-ki̍p ê sî, só͘-ū pang-chān Ai-ki̍p--ê mā beh siū châu-bia̍t. Hit-sî, in chiū chai góa sī Siōng Chú.

9“‘Hit-ji̍t, góa beh phài sù-chiá chē-chûn khì Kó͘-si̍t-lâng hia; an-ún chū-chāi ê Kó͘-si̍t-lâng beh kiaⁿ-hiâⁿ, beh ū chhin-chhiūⁿ Ai-ki̍p só͘ siū ê thòng-khó͘ lîm-kàu in. Khòaⁿ leh, chiah-ê sū liâm-piⁿ beh hoat-seng!’

10“Chì-koân ê Siōng Chú án-ni kóng, ‘Góa beh thong-kè Pa-pí-lûn-ông Nî-pò͘-kah-nî-sat, châu-bia̍t Ai-ki̍p ê jîn-bîn.

11I beh tòa-niá lia̍t-kok tiong hiong-ok ê kun-tūi lâi húi-bia̍t Ai-ki̍p. In beh ēng to kong-kek Ai-ki̍p-lâng, hō͘ si-thé móa-sì-kòe.

12Góa beh hō͘ Nî-lô-hô ta-khok-khok, kā Ai-ki̍p kau tī siâ-ok ê lâng chhiú-tiong. Góa beh thong-kè gōa-kok-lâng húi-hoāi Ai-ki̍p ê it-chhè. Góa Siōng Chú án-ni soan-kò.’

13“Chì-koân ê Siōng Chú án-ni kóng, ‘Góa beh húi-bia̍t ngó͘-siōng, tùi Bēng-húi-su tû-khì sîn-siōng; Ai-ki̍p bô koh ū kun-ông; góa beh hō͘ Ai-ki̍p-lâng oa̍h tī kiaⁿ-hiâⁿ ê tiong-kan.

14Góa beh hō͘ Ai-ki̍p ê Pa-te̍k-lô pìⁿ-chòe hong-po͘, ēng hé sio Só-an, hêng-hoa̍t tōa-siâⁿ Tí-pí-su.

15Góa beh chiong góa ê tōa siū-khì piàⁿ tī Ai-ki̍p siōng kian-kò͘ ê iàu-sài Sìn, mā beh siau-bia̍t Tí-pí-su ê jîn-bîn.

16Góa beh pàng-hé sio Ai-ki̍p; Sìn beh thòng-khó͘ ká-kún. Tí-pí-su ê siâⁿ-chhiûⁿ beh siū kong-phòa, Bēng-húi-su beh kui-ji̍t siū tùi-te̍k kong-kek.

17Hi-lī-pho-lí kap Pí Pek-si̍t ê siàu-liân-lâng lóng beh sí tī to-ē, hiah-ê siâⁿ ê chū-bîn hō͘ lâng lia̍h--khì.

18Góa húi-hoāi Ai-ki̍p ê koân-sè, hō͘ i khoa-iāu ê khùi-la̍t chiong-chí ê sî, Tap-pí-le̍k ji̍t--sî beh pìⁿ-chòe o͘-àm, o͘-hûn kā i jia-khàm, só͘-ū ê chū-bîn lóng beh siū-lia̍h chòe hu-ló͘.

19Góa beh án-ni hêng-hoa̍t Ai-ki̍p, in chiū chai góa sī Siōng Chú.’”

Phah-tn̄g Ai-ki̍p-ông ê Chhiú-kut

20Tē-cha̍p-it nî chiaⁿ-ge̍h chhoe-chhit, Siōng Chú tùi góa kóng,

21“Jîn-chú ah, góa í-keng phah-tn̄g Ai-ki̍p-ông ê chi̍t ki chhiú-kut, bô lâng kā i i-tī, pau-chat, hō͘ i ū-la̍t thang gia̍h to.

22Só͘-í, góa — Chì-koân ê Siōng Chú án-ni kóng, ‘Góa beh kap Ai-ki̍p-ông choh-tùi, phah-tn̄g i nn̄g ki chhiú-kut, kā ióng--ê kap tio̍h-siong--ê lóng phah-tn̄g, hō͘ i chhiú-lāi ê to lak-lo̍h thô͘-kha.

23Góa beh kā Ai-ki̍p-lâng hòng-tio̍k khì lia̍t-kok, sì-sòaⁿ tī choân sè-kài ta̍k só͘-chāi.

24Jiân-āu, góa beh hō͘ Pa-pí-lûn-ông ê chhiú ióng-chòng ū-la̍t, kā góa ê to kau hō͘ i. M̄-kú góa beh phah-tn̄g Ai-ki̍p-ông ê chhiú-kut, hō͘ i tī Pa-pí-lûn-ông bīn-chêng chhin-chhiūⁿ siū-siong beh sí ê lâng haiⁿ-haiⁿ-chhan.

25Góa beh hō͘ Pa-pí-lûn-ông ê chhiú ióng-chòng, hō͘ Ai-ki̍p-ông ê chhiú soe-lám sûi--lo̍h-khì. Góa kā góa ê to kau hō͘ Pa-pí-lûn-ông, i gia̍h to kong-kek Ai-ki̍p ê sî, in chiū chai góa sī Siōng Chú.

26Góa beh kā Ai-ki̍p-lâng hòng-tio̍k khì lia̍t-kok, sì-sòaⁿ tī choân sè-kài ta̍k só͘-chāi; hit-sî, in chiū chai góa sī Siōng Chú.’”

Í-se-kiat-su 30 - 現代台語譯本羅馬字版(TTVR)-闽南语

Learn More About Us