Chim-giân 6

Chim-giân 6 - 現代台語譯本羅馬字版(TTVR)-闽南语

Kè-sio̍k Khoàn-kài

1Góa ê kiáⁿ ah, lí nā ūi-tio̍h chhù-piⁿ chòe tam-pó,

thòe gōa-lâng pó-chèng,

2lí chiū hō͘ ka-kī kóng ê ōe tauh--tio̍h,

hō͘ ka-kī tah-èng ê ōe tîⁿ--tio̍h.

3Góa ê kiáⁿ ah, kì-jiân lí lo̍h tī chhù-piⁿ ê chhiú-thâu,

tio̍h án-ni chòe lâi kiù ka-kī:

Tio̍h kín khì, khiam-pi khún-kiû lí ê chhù-piⁿ.

4Ba̍k-chiu m̄-thang khùn--khì,

ba̍k-chiu-phê m̄-thang khoeh--khì.

5Tio̍h kiù ka-kī, chhin-chhiūⁿ lo̍k thoat-lī phah-la̍h ê lâng ê chhiú;

chhin-chhiūⁿ chiáu thoat-lī lia̍h chiáu ê lâng ê chhiú.

6Pîn-tōaⁿ-lâng ah, khì khòaⁿ káu-hiā,

khòaⁿ i ê só͘-chòe thang tit-tio̍h tì-hūi.

7I bô léng-siù,

bô thâu-ba̍k, bô koaⁿ-tiúⁿ,

8m̄-kú ōe-hiáu tī joa̍h-thiⁿ chún-pī chia̍h-mi̍h,

tī siu-sêng ê sî chek-chū bí-niû.

9Pîn-tōaⁿ-lâng ah, lí beh khùn jōa kú,

sím-mi̍h sî chiah khùn ōe chhíⁿ?

10Koh khùn chi̍t-kú-á, koh bîn chi̍t-sî-á,

koh the chi̍t-ē-á;

11sàn-chhiah chiū chhin-chhiūⁿ chha̍t lâi;

khiàm-kheh chhin-chhiūⁿ kiông-tō kàu.

12Lô͘-môa húi-lūi ta̍k só͘-chāi chè-chō sī-hui,

sì-kòe kóng-ōe khi-phiàn lâng;

13in sái-ba̍k-bé sī-ì, ēng kha àm-sī,

ēng chńg-thâu-á chí-tiám;

14in sim-su oai-chhoa̍h, kè-bô͘ pháiⁿ-tāi;

sì-kòe sái-lōng, jiá-khí hun-cheng.

15Só͘-í chai-hō hut-jiân lîm-kàu;

i ōe sûi-sî sit-pāi bia̍t-bông, bōe hù kā kiù.

16Ū la̍k hāng sī Siōng Chú só͘ oàn-hūn,

liân I ê sim só͘ iàm-ò͘ⁿ--ê ū chhit hāng:

17Chiū-sī kiau-ngō͘ ê ba̍k-chiu,

kóng pe̍h-chha̍t ê chi̍h,

thâi bû-ko͘ ê lâng ê chhiú,

18kè-bô͘ pháiⁿ-tāi ê sim,

phun-cháu pháiⁿ-lō͘ ê kha,

19kóng pe̍h-chha̍t choh gūi-chèng,

tī hiaⁿ-tī tiong sái-lōng lâng oan-ke.

Kéng-kài Îm-loān

20Góa ê kiáⁿ ah, tio̍h chun-siú lāu-pē ê bēng-lēng,

m̄-thang khì-sak lāu-bú ê kà-sī;

21tio̍h put-sî kì tī lí ê sim,

kòa tī lí ê ām-kún.

22Lí kiâⁿ-lō͘ ê sî, i ōe ín-chhōa lí;

lí khùn ê sî, i ōe khòaⁿ-kò͘ lí;

lí khùn-chhíⁿ, i ōe kap lí tâm-lūn.

23In-ūi bēng-lēng sī teng, kà-sī sī kng;

koán-kàu ê chek-pī ōe chhōa lí kiâⁿ oa̍h-miā ê lō͘,

24ōe pó-hō͘ lí bô chhin-kūn pháiⁿ-cha-bó͘,

bô thiaⁿ ki-lú sai-nai ê ōe.

25Lí ê sim m̄-thang hō͘ i ê súi bê--khì,

m̄-thang in-ūi i sái-ba̍k-bé siū ín-iú.

26Chhē ki-lú ōe hō͘ lâng sàn kah chhun chi̍t tè piáⁿ;

kap pa̍t-lâng ê bó͘ kan-îm ōe sòng-sit pó-kùi ê sìⁿ-miā.

27Lâng phō hé tī heng-chêng,

saⁿ kiám bōe to̍h--khí-lâi?

28Lâng ta̍h teh to̍h ê hé-thòaⁿ,

kha kiám bōe sio--tio̍h?

29Kap chhù-piⁿ ê bó͘ chòe-hé khùn mā ōe án-ni;

kap i hoat-seng koan-hē it-tēng ōe siū hêng-hoa̍t.

30Chha̍t in-ūi iau thau-the̍h mi̍h chí-ki,

lâng bōe kā i khòaⁿ-khin;

31m̄-kú hō͘ lâng lia̍h--tio̍h, tio̍h pê chhit pē,

ke-lāi só͘ ū--ê lóng tio̍h the̍h chhut-lâi pê.

32Kap pa̍t-lâng ê bó͘ thong-kan ê lâng chin bô tì-sek;

chòe chit-khoán tāi-chì ōe hāi-tio̍h ka-kī ê sìⁿ-miā.

33I ōe siū-tio̍h siong-hāi kap lêng-jio̍k;

i ê kiàn-siàu sóe bōe chheng.

34Tiōng-hu in-ūi oàn-tò͘ khí tōa siū-khì;

pò-siû ê sî it-tēng bōe liû-chêng.

35Ēng chîⁿ sio̍k-chōe, i m̄ ti̍h;

lé-mi̍h sàng khah chōe, i mā m̄ pàng lí soah.

Chim-giân 6 - 現代台語譯本羅馬字版(TTVR)-闽南语

Learn More About Us