Í-su-la-kì 7

Í-su-la-kì 7 - 現代台語譯本羅馬字版(TTVR)-闽南语

Í-su-la Kàu Iâ-lō͘-sat-léng

1Chiah-ê sū í-āu, Pho-su hông-tè A-ta̍t-sih-se chē-ūi ê sî, Í-su-la tùi Pa-pí-lûn tńg--lâi; i sī Se-lâi-ngá ê kiáⁿ, Se-lâi-ngá sī A-sat-lī-ngá ê kiáⁿ, A-sat-lī-ngá sī Hi-le̍k-ka ê kiáⁿ,

2Hi-le̍k-ka sī Sa-liông ê kiáⁿ, Sa-liông sī Sat-tok ê kiáⁿ, Sat-tok sī A-hi-tu̍t ê kiáⁿ,

3A-hi-tu̍t sī A-má-lī-ngá ê kiáⁿ, A-má-lī-ngá sī A-sat-lī-ngá ê kiáⁿ, A-sat-lī-ngá sī Bí-la-iok ê kiáⁿ,

4Bí-la-iok sī Se-la-hi-ngá ê kiáⁿ, Se-la-hi-ngá sī O͘-se ê kiáⁿ, O͘-se sī Pò͘-ki ê kiáⁿ,

5Pò͘-ki sī A-pí-su ê kiáⁿ, A-pí-su sī Hui-nî-hap ê kiáⁿ, Hui-nî-hap sī Í-lī-a-sat ê kiáⁿ, Í-lī-a-sat sī tōa-chè-si A-lûn ê kiáⁿ.

6 Í-su-la tùi Pa-pí-lûn chiūⁿ--lâi; i sī keng-ha̍k-kàu-su, tùi Siōng Chú — Í-sek-lia̍t ê Siōng-tè só͘ siúⁿ-sù Mô͘-se ê lu̍t-hoat hui-siông cheng-thong. In-ūi Siōng Chú — i ê Siōng-tè sù-hok hō͘ i, i tùi hông-tè ê chhéng-kiû, lóng tit-tio̍h ún-chún.

7A-ta̍t-sih-se choh-ông tē-chhit nî, ū chi̍t-kóa Í-sek-lia̍t-lâng, chè-si kap Lī-bī-lâng, hiàn-si--ê, sèng-tiān siú-ōe, sèng-tiān ê kang-lâng, tńg-lâi Iâ-lō͘-sat-léng.

8Hit-nî ê gō͘--ge̍h, Í-su-la tńg-lâi kàu Iâ-lō͘-sat-léng;

9chiaⁿ-ge̍h chhoe-it, i tùi Pa-pí-lûn khí-sin, gō͘-ge̍h chhoe-it chiū kàu Iâ-lō͘-sat-léng, in-ūi i ê Siōng-tè si-un ê chhiú pang-chān i.

10Í-su-la choan-sim gián-kiù koh si̍t-hêng Siōng Chú ê lu̍t-hoat, chiong kui-lē bēng-lēng kàu-tō Í-sek-lia̍t-lâng.

A-ta̍t-sih-se Hō͘ Í-su-la ê Bûn-kiāⁿ

11Chè-si Í-su-la sī keng-ha̍k-kàu-su, cheng-thong Siōng Chú hō͘ Í-sek-lia̍t ê kài-bēng kap kui-lē. Ē-bīn sī A-ta̍t-sih-se-ông hō͘ Í-su-la ê chiàu-su:

12Lia̍t-ông ê ông A-ta̍t-sih-se siá hō͘ chè-si Í-su-la, cheng-thong thiⁿ-téng Siōng-tè lu̍t-hoat ê keng-ha̍k-kàu-su, goān lí pêng-an.

13Góa kok-lāi ê Í-sek-lia̍t-lâng, chè-si kap Lī-bī-lâng, nā ū lâng goān-ì tńg-khì Iâ-lō͘-sat-léng, góa hā-lēng, ún-chún in kap lí chòe-hé khì;

14Góa kap chhit ê chham-bô͘ chí-phài lí, tio̍h chiàu Siōng-tè kau-thok lí ê lu̍t-hoat sī-chhat Iû-tāi kap Iâ-lō͘-sat-léng.

15Lí tio̍h tòa góa kap góa ê chham-bô͘ kam-sim hiàn hō͘ tòa tī Iâ-lō͘-sat-léng ê Í-sek-lia̍t Siōng-tè ê kim-gûn;

16koh tòa lí tī Pa-pí-lûn choân-séng só͘ tit--tio̍h ê kim-gûn, í-ki̍p jîn-bîn kap chè-si hoaⁿ-hí ūi-tio̍h Iâ-lō͘-sat-léng in ê Siōng-tè ê sèng-tiān hōng-hiàn ê lé-mi̍h.

17Lí tio̍h siān-iōng chiah-ê kim-gûn, bóe gû-káng-á, mî-iûⁿ-káng, iûⁿ-ko, ngó͘-kok, kap chiú, hiàn tī Iâ-lō͘-sat-léng lín ê Siōng-tè tiān ê chè-tôaⁿ.

18Chhun ê kim-gûn, tio̍h chiàu lín ê Siōng-tè ê chí-ì, ēng tī lí kap lí ê tông-sū khòaⁿ-chòe hó ê só͘-chāi.

19Só͘-ū kau hō͘ lí, beh tī lí ê Siōng-tè tiān-lāi chòe ho̍k-sāi ê khì-khū, tio̍h lóng hē tī Iâ-lō͘-sat-léng ê Siōng-tè bīn-chêng.

20Lí ê Siōng-tè ê tiān nā iáu khiàm-ēng sím-mi̍h, su-iàu lí siat-hoat--ê, thang tùi hông-tè ê hú-khò͘ chi-chhut.

21Góa A-ta̍t-sih-se koh hā-lēng Hô-se-séng só͘-ū koán hú-khò͘ ê koaⁿ-oân: Cheng-thong thiⁿ-téng Siōng-tè lu̍t-hoat ê keng-ha̍k-kàu-su, chè-si Í-su-la, i bô-lūn tùi lín iau-kiû sím-mi̍h, lín lóng tio̍h khak-si̍t pān-lí;

22sò͘-liōng chòe ko thang kàu gûn saⁿ-chheng sì-pah kong-kun, be̍h chi̍t-bān kong-kun, chiú nn̄g-chheng kong-seng, iû nn̄g-chheng kong-seng, iâm bô-hān.

23Thiⁿ-téng ê Siōng-tè só͘ bēng-lēng--ê, lín tio̍h ūi thiⁿ-téng Siōng-tè ê sèng-tiān chhiat-si̍t khì chòe, chiah bián Siōng-tè ê tōa siū-khì lîm-kàu góa kap góa ê kiáⁿ-sun ê kok.

24Góa koh bēng-lēng lín, chè-si kap Lī-bī-lâng, hiàn-si--ê, sèng-tiān ê siú-ōe kap kang-lâng, í-ki̍p tī Siōng-tè ê tiān sū-hōng ê lâng, lóng m̄-thang iau-kiû in chìn-kòng, la̍p-sè, kiáu niû-si̍t.

25 Í-su-la, chiàu lí ê Siōng-tè siúⁿ-sù lí ê tì-hūi, chí-phài hiah-ê bat Siōng-tè lu̍t-hoat ê lâng chòe sím-phòaⁿ-koaⁿ kap koaⁿ-oân, tī-lí Hô-se-séng ê jîn-bîn, kàu-tō iáu m̄ bat lu̍t-hoat ê lâng.

26Nā ū lâng bô beh chun-siú lí ê Siōng-tè ê lu̍t-hoat kap ông ê bēng-lēng ê lâng, tio̍h giâm-giâm kā in tēng-chōe; kā in phòaⁿ sí-hêng, liû-hòng, châi-sán chhiong-kong, á-sī koaiⁿ-kaⁿ.

Í-su-la Chheng-chàn Siōng-tè

27 Í-su-la kóng, “Siōng Chú — lán lia̍t-chó͘ ê Siōng-tè eng-kai siū chheng-chàn! In-ūi I hō͘ hông-tè ū chit-khoán ê sim-ì, hō͘ Iâ-lō͘-sat-léng Siōng Chú ê sèng-tiān tit-tio̍h chun-êng.

28I koh hō͘ góa tùi ông, i ê chham-bô͘, kap só͘-ū ū-koân ê koaⁿ-oân tit-tio̍h pang-chān. Siōng Chú — góa ê Siōng-tè sù góa ióng-khì, hō͘ góa ōe-tàng tiàu-chi̍p Í-sek-lia̍t ê siú-léng, kap góa chòe-hé tńg--lâi.”

Í-su-la-kì 7 - 現代台語譯本羅馬字版(TTVR)-闽南语

Learn More About Us