Tān-í-lí-su 10

Tān-í-lí-su 10 - 現代台語譯本羅馬字版(TTVR)-闽南语

Tí-kek-lí-su Hô-piⁿ ê Īⁿ-siōng

1 Sài-ló͘-sū chòe Pho-su hông-tè tē-saⁿ nî, hō͘ lâng kiò-chòe Pek-thê-sa-sat ê Tān-í-lí tit-tio̍h khé-sī; hit-ê khé-sī sī chin-si̍t--ê, sī iú-koan chi̍t ê tōa chiàn-cheng. Tān-í-lí chai-iáⁿ chit-ê khé-sī ê ì-sù, mā liáu-kái chit-ê īⁿ-siōng.

2Hit-sî góa Tān-í-lí iu-siong saⁿ lé-pài.

3Tī chit tiong-kan, góa bô chia̍h hó-chia̍h ê mi̍h-kiāⁿ, bô chia̍h-bah, bô lim-chiú, mā bô ēng iû boah seng-khu.

4Chiaⁿ-ge̍h jī-sì, góa tī Tí-kek-lí-su tōa-hô hô-piⁿ,

5gia̍h-thâu chi̍t-ē khòaⁿ, khòaⁿ-tio̍h chi̍t ê lâng chhēng iù-môa-pò͘ chit ê saⁿ, hâ O͘-hoat sûn-kim chòe ê io-tòa;

6i ê seng-khu chhin-chhiūⁿ chhiⁿ-ge̍k, bīn-māu chhin-chhiūⁿ sih-nà, ba̍k-chiu chhin-chhiūⁿ hé-iām, chhiú kap kha kng kah chhin-chhiūⁿ bôa kng ê tâng, kóng-ōe ê siaⁿ chhin-chhiūⁿ kui-kûn lâng teh hoah ê siaⁿ.

7Chit-ê īⁿ-siōng chí-ū góa Tān-í-lí khòaⁿ--kìⁿ, kap góa chòe-hé ê lâng bô chi̍t ê ū khòaⁿ--kìⁿ, m̄-kú in lóng hui-siông kiaⁿ-hiâⁿ, cháu-khì bih,

8chhun góa chi̍t ê tī hia. Góa khòaⁿ-kìⁿ chit-ê tōa ê īⁿ-siōng, chiū kui seng-khu bô la̍t, bīn sit-sek, liân chi̍t-sut-á khùi-la̍t to bô.

9Góa thiaⁿ-kìⁿ i kóng-ōe ê siaⁿ; góa chi̍t-ē thiaⁿ--kìⁿ, chiū phak--lo̍h-khì, bīn ǹg thô͘-kha, sit-khì ì-sek.

10Hut-jiân ū chi̍t ki chhiú kā góa bong, hō͘ góa ēng kha-thâu-u kap chhiú-tôe-á thuh tī thô͘-kha, seng-khu iáu-teh chhoah.

11I tùi góa kóng, “Tit-tio̍h Siōng-tè thiàⁿ-thàng ê Tān-í-lí, lí tio̍h bêng-pe̍k góa tùi lí kóng ê ōe. Lí khiā--khí-lâi. Góa hiān-chāi hō͘ Siōng-tè chhe-khián lâi lí chia.” I teh kóng ê sî, góa khiā--khí-lâi, seng-khu phi̍h-phi̍h-chhoah.

12I koh kā góa kóng, “Tān-í-lí, m̄-bián kiaⁿ! Lí tùi thâu chi̍t ji̍t khí chiū koat-sim beh liáu-kái chit-ê īⁿ-siōng, tī lí ê Siōng-tè bīn-chêng khiam-pi. I ū thiaⁿ lí ê kî-tó; góa chiū-sī ūi-tio̍h lí ê kî-tó lâi--ê.

13M̄-kú Pho-su-kok ê siú-hō͘ thiⁿ-sài kā góa tòng tī Pho-su ê léng-siù hia jī-cha̍p-it ji̍t. Āu-lâi, thiⁿ-sài-tiúⁿ tiong-kan ê chi̍t ūi Bí-ka-le̍k lâi pang-chān góa.

14Hiān-chāi góa lâi sī beh hō͘ lí bêng-pe̍k lí ê tông-pau í-āu ōe tú--tio̍h ê sū; che sī koan-hē beh lâi ê sî-kî ê īⁿ-siōng.”

15I tùi góa kóng chiah-ê ōe ê sî, góa bīn ǹg thô͘-kha, bô hoat-tō͘ kóng-ōe.

16Hut-jiân ū chi̍t ê khòaⁿ--khí-lâi chhin-chhiūⁿ lâng--ê lâi bong góa ê chhùi-tûn; góa chiū khui-chhùi tùi hit-ê khiā tī góa bīn-chêng--ê kóng, “Góa ê chú ah, góa in-ūi chit-ê īⁿ-siōng sim-lāi iu-siong thòng-khó͘, kui seng-khu bô la̍t.

17Góa sī chú ê po̍k-jîn, góa ná ōe-kham-tit kap góa ê chú kóng-ōe? Hiān-chāi góa kui seng-khu bô la̍t, khiā bōe tiâu, kiông-beh bōe chhoán-khùi.”

18Hit-ê khòaⁿ--khí-lâi chhin-chhiūⁿ lâng--ê koh kā góa bong, hō͘ góa ū khùi-la̍t.

19I kóng, “M̄-bián kiaⁿ! Lí sī Siōng-tè só͘ thiàⁿ--ê, goān lí pêng-an! Lí tio̍h kian-kiông, koh-chài kian-kiông!” I chi̍t-ē tùi góa kóng-ōe, góa chiū hôe-ho̍k khùi-la̍t. Góa kóng, “Góa ê chú, chhiáⁿ lí kè-sio̍k tùi góa kóng-ōe, lí í-keng hō͘ góa kian-kiông--khí-lâi lah.”

20I chiū kóng, “Lí í-keng chai góa sī-án-chóaⁿ lâi lí chia. Hiān-chāi góa beh tò-khì kap Pho-su ê siú-hō͘ thiⁿ-sài kau-chiàn. Lí tio̍h chai, góa khì liáu-āu, Hi-la̍h ê siú-hō͘ thiⁿ-sài chiū ōe lâi.

21M̄-kú góa beh chiong chin-lí ê chheh kì-lio̍k ê sū kā lí kóng. Í-sek-lia̍t ê siú-hō͘ thiⁿ-sài Bí-ka-le̍k í-gōa, bô chi̍t ê ōe-tàng pang-chān góa tí-khòng in.”

Tān-í-lí-su 10 - 現代台語譯本羅馬字版(TTVR)-闽南语

Learn More About Us