Si-phian 147 - 現代台語譯本羅馬字版(TTVR)-闽南语

Chheng-chàn Choân-lêng ê Siōng-tè

1Ha-lé-lú-iah, chheng-chàn Siōng Chú!

Chhiùⁿ-koa o-ló lán ê Siōng-tè, chin hó;

chheng-chàn I sī ha̍p-gî, chin thang hoaⁿ-hí.

2Siōng Chú tiông-kiàn Iâ-lō͘-sat-léng,

chū-chi̍p Í-sek-lia̍t tiong siū-lia̍h khì īⁿ-pang ê lâng.

3I i-hó siong-sim ê lâng,

pau-chat in ê siong.

4I sǹg chhiⁿ-sîn ê sò͘-bo̍k,

chi̍t-lia̍p chi̍t-lia̍p kā in hō-miâ.

5Lán ê Chú chì-tōa, ū tōa khùi-la̍t;

I ê tì-hūi bû-kiông-chīn.

6Siōng Chú hû-chhî pi-bî ê lâng,

kā pháiⁿ-lâng phah-tó tī thô͘-kha.

7Lín tio̍h ēng kám-siā ǹg Siōng Chú chhiùⁿ-koa,

tôaⁿ-khîm chhiùⁿ-koa, o-ló lán ê Siōng-tè.

8I khí-hûn jia-thiⁿ,

ūi-tio̍h tōe chún-pī hō͘-chúi,

hō͘ soaⁿ hoat-chháu.

9I sù chia̍h-mi̍h hō͘ cháu-siù,

hō͘ teh thó-chia̍h ê sòe-chiah o͘-a.

10I ì-ài--ê m̄-sī bé ê la̍t tōa;

I hoaⁿ-hí--ê m̄-sī lâng ê kha gâu-cháu.

11Siōng Chú ì-ài--ê sī kèng-ùi I,

gióng-bōng I chû-ài ê lâng.

12 Iâ-lō͘-sat-léng ah, tio̍h chheng-chàn Siōng Chú;

Sek-an ah, tio̍h siōng-chàn lí ê Siōng-tè.

13In-ūi I kian-kò͘ lí siâⁿ-mn̂g ê mn̂g-chhòaⁿ,

sù-hok hō͘ siâⁿ-lāi ê lâng.

14I hō͘ lí kéng-lāi pêng-an,

ēng siōng-hó ê be̍h hō͘ lí chia̍h pá.

15I ǹg tōe hoat-chhut bēng-lēng;

I ê ōe thoân-pò͘ chin kín.

16I lo̍h-seh chhin-chhiūⁿ iûⁿ-mn̂g,

lo̍h-sng chhin-chhiūⁿ hé-hu.

17I lo̍h-pha̍uh chhin-chhiūⁿ iù-chio̍h;

I thàu léng-hong, siáⁿ-lâng tòng ōe tiâu?

18I chi̍t-ē bēng-lēng, chiah-ê chiū lóng iûⁿ--khì;

I khí hong, chúi chiū lâu.

19I ēng I ê ōe chí-sī Ngá-kok,

chiong I ê bēng-lēng kap kui-lē chí-sī Í-sek-lia̍t.

20I m̄-bat án-ni khoán-thāi pa̍t-kok;

I ê kui-lē, in m̄ bat.

Ha-lé-lú-iah, chheng-chàn Siōng Chú!

Learn More About Us