Iok-pek-kì 22

Iok-pek-kì 22 - 現代台語譯本羅馬字版(TTVR)-闽南语

Tē-saⁿ Piàn Tùi-ōe(22.1-27.23)

1 Thê-bān-lâng Í-lī-hoat ìn Iok-pek kóng:

2Lâng tùi Siōng-tè ū sím-mi̍h lō͘-ēng?

Tì-hūi ê lâng tùi I ū sím-mi̍h lī-ek?

3Lí chòe lâng kong-gī, kiám ōe hō͘ Choân-lêng-chiá hoaⁿ-hí?

Lí ê hêng-ûi oân-choân, kiám ōe hō͘ I tit-tio̍h lī-ek?

4I kiám ōe in-ūi lí kèng-ùi I,

lâi chek-pī lí, sím-phòaⁿ lí?

5Lí ê chōe-ok kiám m̄-sī chin tōa?

Lí ê chōe-kò si̍t-chāi bû-kiông-chīn.

6Lí bô-lí-bô-iû the̍h hiaⁿ-tī ê mi̍h-kiāⁿ choh tí-ah,

pak in ê saⁿ, hō͘ in chhiah-sin-lō͘-thé.

7Ià-siān ê lâng, lí bô ēng chúi hō͘ in lim;

iau-gō ê lâng, lí bô the̍h pn̄g hō͘ in chia̍h.

8Sui-jiân lí ū koân-sè tit-tio̍h thó͘-tōe,

ū tōe-ūi tòa tī hit lāi-bīn,

9m̄-kú lí hō͘ kóaⁿ-hū khang-chhiú tò--khì,

at-chi̍h ko͘-jî ê chhiú-kut.

10Só͘-í oa̍h-tauh sì-bīn ûi lí;

khióng-pò͘ hut-jiân lîm-kàu lí.

11O͘-àm hō͘ lí bōe-tàng khòaⁿ--kìⁿ,

tōa-chúi im-ba̍t lí.

12Siōng-tè kiám m̄-sī tī thiⁿ ke̍k-koân ê só͘-chāi?

Lí khòaⁿ chhiⁿ-sîn ê ke̍k-thâu hiah-ni̍h koân;

13lí soah kóng, “Siōng-tè chai sím-mi̍h?

I ná ōe-tàng khòaⁿ-thàu o͘-àm lâi sím-phòaⁿ?

14Ba̍t-hûn jia-cha̍h I, hō͘ I bōe-tàng khòaⁿ--kìⁿ;

I tī kiong-chhong ê téng-bīn kiâⁿ-iû.”

15Lí kiám beh kiâⁿ í-chêng siâ-ok ê lâng kiâⁿ--kè ê lō͘?

16In ê sî iáu-bē kàu chiū siau-sit;

in ê tōe-ki hō͘ tōa-chúi chhiong bô--khì.

17In tùi Siōng-tè kóng, “Mài chhap--goán!

Choân-lêng-chiá ōe kā goán án-chóaⁿ?”

18Iáu-kú Siōng-tè ēng hó-mi̍h tóe-móa in ê chhù.

Pháiⁿ-lâng ê ì-liām si̍t-chāi oh liáu-kái.

19Gī-lâng khòaⁿ-tio̍h pháiⁿ-lâng ê kiat-kio̍k chiū hoaⁿ-hí;

bô-chōe ê lâng beh kā in thí-chhiò, kóng,

20“Khí-lâi kong-kek goán ê lâng kó-jiân siū siau-bia̍t;

in só͘ chhun--ê lóng hō͘ hé sio--khì.”

21Tio̍h sūn-ho̍k Siōng-tè, kap I hô-hó,

hok-khì chiū ōe lîm-kàu lí.

22Tio̍h chiap-siū I ê chhùi só͘ kóng ê kà-sī,

chiong I ê ōe khǹg tī lí ê sim-lāi.

23Lí nā khiam-pi oa̍t tńg-lâi kui-ǹg Choân-lêng-chiá,

tùi lí ê chhù-lāi tû-khì siâ-ok;

24lí nā khòaⁿ n̂g-kim chòe thô͘-hún,

khòaⁿ sûn-kim chòe khoe--ni̍h ê chio̍h-thâu,

25hō͘ Choân-lêng-chiá chòe lí ê n̂g-kim,

chòe lí kùi-tiōng ê gûn,

26án-ni, lí chiū ōe gióng-bōng Siōng-tè,

ōe in-ūi Choân-lêng-chiá lâi hoaⁿ-hí.

27Lí tùi I kî-tó, I ōe thiaⁿ lí;

lí mā ōe siā lí ê goān.

28Lí kè-ōe beh chòe ê tāi-chì, I ōe hō͘ lí oân-sêng,

mā ū kng chiò lí ê lō͘.

29Siōng-tè hō͘ kiau-ngō͘ ê lâng kàng-kē,

koh chín-kiù khiam-pi ê lâng.

30Siōng-tè ōe kiù bû-ko͘ ê lâng;

lí ê chhiú nā chheng-khì, I ōe kái-kiù lí.

Iok-pek-kì 22 - 現代台語譯本羅馬字版(TTVR)-闽南语

Learn More About Us