Iok-su-a-kì 7

Iok-su-a-kì 7 - 現代台語譯本羅馬字版(TTVR)-闽南语

A-kan Hoān-chōe

1 Í-sek-lia̍t-lâng tī eng-kai húi-bia̍t hiàn hō͘ Siōng Chú ê mi̍h ū hoān-chōe. Iû-tāi chi-cho̍k tiong, Siā-la ê cheng-sun, Sat-tí ê sun, Ka-bí ê kiáⁿ A-kan the̍h eng-kai húi-bia̍t ê mi̍h; Siōng Chú chiū tùi Í-sek-lia̍t-lâng hoat siū-khì.

2 Iok-su-a tùi Iâ-lī-ko phài lâng khì Pek-te̍k-lī tang-pêng, Pek A-bûn hù-kūn ê Ai-siâⁿ, hoan-hù in, kóng, “Lín khì thàm-cha hit-ê tōe.” In chiū khì thàm-cha Ai-siâⁿ.

3In tò-lâi Iok-su-a hia, tùi i kóng, “M̄-bián hō͘ só͘-ū ê jîn-bîn lóng khì, kan-ta nn̄g-saⁿ-chheng lâng khì phah Ai-siâⁿ chiū hó; m̄-bián lô-tōng só͘-ū ê jîn-bîn, in-ūi hia ê lâng chin chió.”

4Só͘-í tāi-iok ū saⁿ-chheng lâng khì kong-táⁿ, m̄-kú soah hō͘ Ai-siâⁿ ê lâng phah-pāi.

5Ai-siâⁿ ê lâng tùi siâⁿ-mn̂g chêng tui-jip in, kàu Sī-pa-lîm lo̍h-kiā ê só͘-chāi phah-sí iok-lio̍k saⁿ-cha̍p-la̍k ê lâng. Í-sek-lia̍t-lâng chiū lóng kiaⁿ kah sîn-put-hū-thé.

6 Iok-su-a chiū thiah-li̍h saⁿ; i kap Í-sek-lia̍t ê tiúⁿ-ló tī Siōng Chú iok-kūi ê thâu-chêng phak tī thô͘-kha, koh ēng thô͘-hún sám thâu-khak, kàu ē-hng.

7Iok-su-a kóng, “Ài ah, Chì-koân ê Siōng Chú, lí sī-án-chóaⁿ chhōa chiah-ê jîn-bîn kè Iok-tàn-hô, chiong goán kau hō͘ A-mô͘-lī-lâng, hō͘ in kā goán siau-bia̍t? Goán lêng-khó lâu tiàm Iok-tàn-hô hit-pêng.

8Chú ah, Í-sek-lia̍t-lâng kì-jiân tī tùi-te̍k bīn-chêng oa̍t-tńg-sin tô-cháu, góa iáu ū sím-mi̍h ōe thang kóng?

9Ka-lâm-lâng kap chit só͘-chāi ê chū-bîn nā thiaⁿ--tio̍h, it-tēng ōe lâi pau-ûi goán, kā goán ê miâ tùi tōe-chiūⁿ tû--khì; hit-sî lí beh án-chóaⁿ ûi-hō͘ lí ê tōa-miâ?”

10Siōng Chú kā Iok-su-a kóng, “Khí--lâi, lí sī-án-chóaⁿ phak tī thô͘-kha?

11Í-sek-lia̍t-lâng hoān-chōe, ûi-pōe góa bēng-lēng in ê iok, the̍h eng-kai húi-bia̍t hiàn hō͘ góa ê mi̍h; in thau-the̍h, khi-phiàn, chhàng tī in ê khì-khū lāi.

12In-ūi án-ni, Í-sek-lia̍t-lâng thâi bōe iâⁿ tùi-te̍k; in tī tùi-te̍k ê bīn-chêng oa̍t-tńg-sin tô-cháu, sī in-ūi in chiâⁿ-chòe eng-kai húi-bia̍t--ê. Lín nā bô chiong eng-kai húi-bia̍t hiàn hō͘ góa ê mi̍h, tùi lín tiong-kan tû--khì, góa chiū bô koh kap lín tông-chāi.

13Khí--lâi! Tio̍h hō͘ jîn-bîn hun-pia̍t-choh-sèng, kā in kóng, ‘Lín tio̍h ka-kī hun-pia̍t-choh-sèng, ūi-tio̍h bîn-á-chài chún-pī. Siōng Chú — Í-sek-lia̍t ê Siōng-tè án-ni kóng: Í-sek-lia̍t-lâng, lín tiong-kan ū eng-kai húi-bia̍t ê mi̍h, nā bô kau--chhut-lâi, lín it-tēng bōe-tàng tí-khòng tùi-te̍k.’

14Bîn-á-chá-khí, lín tio̍h chiàu chi-cho̍k lâi góa chia; Siōng Chú hō͘ tó chi̍t ê chi-cho̍k thiu-tio̍h chhiam, in ê chong-cho̍k tio̍h chi̍t-ê chi̍t-ê lâi góa chia; Siōng Chú hō͘ tó chi̍t ê chong-cho̍k thiu-tio̍h chhiam, in ê ka-cho̍k tio̍h chi̍t-ê chi̍t-ê lâi góa chia; Siōng Chú hō͘ tó chi̍t ê ka-cho̍k thiu-tio̍h chhiam, in ê ta-po͘-lâng tio̍h chi̍t-ê chi̍t-ê lâi góa chia.

15Siōng Chú hō͘ i thiu-tio̍h chhiam ê lâng, chiū-sī ū eng-kai húi-bia̍t ê mi̍h tī i hia; i kap i só͘-ū--ê lóng tio̍h ēng hé kā in sio-bia̍t, in-ūi i ū ûi-pōe Siōng Chú ê iok, koh tī Í-sek-lia̍t tiong chòe gû-gōng ê tāi-chì.”

16Keh-ji̍t, Iok-su-a thàu-chá khí--lâi, hō͘ Í-sek-lia̍t-lâng chiàu chi-cho̍k lâi i hia, thiu-tio̍h Iû-tāi chi-cho̍k;

17chiū hō͘ Iû-tāi chiàu chong-cho̍k lâi i hia, thiu-tio̍h Siā-la ê chong-cho̍k; chiū hō͘ Siā-la chiàu ka-cho̍k lâi i hia, thiu-tio̍h Sat-tí ê ka-cho̍k;

18chiū hō͘ Sat-tí ka-cho̍k ê ta-po͘-lâng chi̍t-ê chi̍t-ê lâi i hia, chiū thiu-tio̍h A-kan; i sī Iû-tāi chi-cho̍k Siā-la ê cheng-sun, Sat-tí ê sun, Ka-bí ê kiáⁿ.

19Iok-su-a tùi A-kan kóng, “Góa ê kiáⁿ, góa khǹg lí tio̍h êng-iāu Siōng Chú — Í-sek-lia̍t ê Siōng-tè, tī I ê bīn-chêng jīn-chōe, chiong lí só͘ chòe ê tāi-chì kā góa kóng, m̄-thang tùi góa ún-môa.”

20 A-kan ìn Iok-su-a kóng, “Góa si̍t-chāi ū tek-chōe Siōng Chú — Í-sek-lia̍t ê Siōng-tè. Góa só͘ chòe ê sū sī án-ni:

21Góa tī chhiúⁿ--lâi ê châi-bu̍t tiong khòaⁿ-tio̍h chi̍t niá Pa-pí-lûn ê súi-saⁿ, nn̄g kong-kun ê gûn, pòaⁿ kong-kun ê kim-tiâu; góa tham-tio̍h chiah-ê mi̍h, chiū the̍h--lâi. Hiān-chāi hiah-ê mi̍h-kiāⁿ tâi tī góa pò͘-pîⁿ lāi-bīn ê thô͘-kha, gûn tī siōng ē-tóe.”

22 Iok-su-a chiū phài lâng cháu-khì A-kan ê pò͘-pîⁿ; hiah-ê mi̍h-kiāⁿ kó-jiân chhàng tī i ê pò͘-pîⁿ lāi, gûn tī siōng ē-tóe.

23In chiū chiong hiah-ê mi̍h-kiāⁿ tùi pò͘-pîⁿ the̍h--chhut-lâi, tòa-lâi Iok-su-a kap Í-sek-lia̍t jîn-bîn hia, hē tī Siōng Chú ê bīn-chêng.

24Iok-su-a kap Í-sek-lia̍t jîn-bîn chiong Siā-la ê cheng-sun A-kan, kap hiah-ê gûn, hit-niá saⁿ, kim-tiâu, kap i ê kiáⁿ, cha-bó͘-kiáⁿ, gû, lû, iûⁿ, pò͘-pîⁿ, kap i só͘-ū--ê, lóng tòa-khì A-kat Soaⁿ-kok.

25Iok-su-a kóng, “Lí ná ōe hāi goán tú-tio̍h chiah-ni̍h tōa ê chai-hō? Kin-á-ji̍t Siōng Chú mā beh kàng chai-hō hō͘ lí.” Tùi án-ni, Í-sek-lia̍t jîn-bîn ēng chio̍h-thâu kā A-kan tìm-sí, ēng hé sio i só͘-ū--ê, jiân-āu ēng chio̍h-thâu hiat tī hit téng-bīn.

26Chèng-lâng tī A-kan si-thé ê téng-bīn thia̍p chi̍t-tōa-tui chio̍h-thâu, kàu kin-á-ji̍t iáu tī hia. Tùi án-ni, Siōng Chú siu-hôe I ê tōa siū-khì. Só͘-í hit só͘-chāi kiò-chòe A-kat Soaⁿ-kok, kàu kin-á-ji̍t.

Iok-su-a-kì 7 - 現代台語譯本羅馬字版(TTVR)-闽南语

Learn More About Us