Chim-giân 1

Chim-giân 1 - 現代台語譯本羅馬字版(TTVR)-闽南语

Chim-giân ê Kè-ta̍t

1 Tāi-pi̍t ê kiáⁿ, Í-sek-lia̍t-ông Só͘-lô-bûn ê chim-giân.

2Chiah-ê chim-giân ōe hō͘ lâng tit-tio̍h tì-hūi kap kà-sī,

lí-kái chhim-ò ê tō-lí;

3ōe hō͘ lâng siū kà-sī, ēng tì-hūi pān tāi-chì,

si̍t-chián kong-gī, kong-chèng, kap kong-pêng.

4Chiah-ê ōe ōe hō͘ gōng-ti̍t ê lâng ū lêng-khiáu,

hō͘ siàu-liân-lâng ū tì-sek, gâu kè-ōe;

5ōe hō͘ ū tì-hūi ê lâng thiaⁿ-liáu ke-thiⁿ ha̍k-sek,

hō͘ chhong-bêng ê lâng tit-tio̍h chin ê kiàn-sek;

6ōe hō͘ lâng bêng-pe̍k chim-giân kap phì-jū,

liáu-kái tì-hūi ê lâng ê ōe kap gū-giân.

7Kèng-ùi Siōng Chú sī tì-sek ê kun-pún;

gû-gōng ê lâng biáu-sī tì-hūi kap kà-sī.

Tùi Siàu-liân-lâng ê Khoàn-kò

8Góa ê kiáⁿ ah, tio̍h thiaⁿ lāu-pē ê kàu-tok;

m̄-thang khì-sak lāu-bú ê kà-sī.

9In-ūi chiah-ê ōe ōe chòe lí thâu-khak téng ê hoa-koan,

chòe lí ām-kún ê kim-liān.

10Góa ê kiáⁿ ah, pháiⁿ-lâng nā ín-iú lí,

m̄-thang tè i khì.

11In nā kóng, “Kap goán tàu-tīn lâi-khì,

lâi-khì bâi-ho̍k thâi-lâng,

tng-tán bû-ko͘ ê lâng, lâi kā thâi.

12Lán chhin-chhiūⁿ Im-hú lâi kā in oa̍h-oa̍h thun--lo̍h-khì;

in ōe chhin-chhiūⁿ hām-lo̍h Chhim-khiⁿ ê lâng hō͘ lán kui-ê thun--lo̍h-khì.

13Lán ōe-tàng tit-tio̍h ta̍k-khoán ê châi-bu̍t,

só͘ chhiúⁿ--ê tún-móa lán ê chhù.

14Lí lâi ka-ji̍p goán ê tóng,

chhiúⁿ--lâi ê châi-bu̍t tāi-ke lóng ū hūn.”

15Góa ê kiáⁿ ah, m̄-thang tè in khì,

tio̍h iok-sok lí ê kha bô ta̍h-ji̍p in ê lō͘.

16In-ūi in kóaⁿ beh chòe pháiⁿ,

kip beh thâi-lâng.

17Tī chiáu-á ê ba̍k-chiu chêng siat lô-bāng,

só͘ chòe bô-chhái-kang.

18In bâi-ho̍k beh hāi lâng, hoán-tńg hāi-tio̍h ka-kī,

tng-tán beh siong lâng, tian-tò siong-tio̍h ka-kī.

19Lâng nā put-te̍k-chhiú-tōaⁿ chhú-tit châi-lī,

kiat-kio̍k it-tēng sit-khì ka-kī ê sìⁿ-miā.

Tì-hūi ê Ho͘-siaⁿ

20Tì-hūi tī koe-lō͘ tōa-siaⁿ teh kiò,

tī chhī-tiûⁿ-kháu tōa-siaⁿ teh hoah;

21tī lāu-jia̍t ê koe-lō͘-thâu tōa-siaⁿ teh kiò,

tī siâⁿ-mn̂g-kháu tōa-siaⁿ kóng,

22“Gōng-ti̍t ê lâng ài gōng-ti̍t beh jōa kú?

Biáu-sī tì-sek ê lâng ài biáu-sī tì-sek beh jōa kú?

Gû-gōng ê lâng iàm-ò͘ⁿ tì-sek beh jōa kú?

23Góa chek-pī lín, lín nā thiaⁿ-thàn,

góa beh tùi lín thò͘-lō͘ góa ê sim-ì,

hō͘ lín bêng-pe̍k góa ê ōe.

24Góa kiò, lín m̄ thiaⁿ;

góa iau-chhiáⁿ, bô lâng hoán-èng;

25lín bû-sī góa it-chhè ê khoàn-kài,

m̄-khéng chiap-siū góa ê chek-pī.

26Só͘-í, lín tú-tio̍h hoān-lān, góa beh léng-chhiò;

lín tú-tio̍h kiaⁿ-hiâⁿ, góa beh thí-chhiò.

27Tng kiaⁿ-hiâⁿ chhin-chhiūⁿ kông-hong chhe--lâi,

chai-hō chhin-chhiūⁿ kńg-lê-á-hong sàu--lâi,

hoān-lān thòng-khó͘ lîm-kàu lín,

28hit-sî lín beh kiû-kiò góa, góa m̄ thiaⁿ,

pek-chhiat chhē góa, chhē bōe tio̍h.

29In-ūi lín iàm-ò͘ⁿ tì-sek,

bô ài kèng-ùi Siōng Chú,

30m̄ thiaⁿ góa ê khoàn-kài,

biáu-sī góa ê chek-pī,

31só͘-í lín ōe chia̍h ka-kī só͘ chèng ê pháiⁿ ké-chí,

ka-kī kè-bô͘ ê ok-kó chia̍h kah pá koh ià.

32Gōng-ti̍t ê lâng ōe hō͘ ka-kī ê kò͘-chip hāi-sí;

gû-gōng ê lâng ōe in-ūi chū-boán tì-kàu bia̍t-bông.

33M̄-kú thiaⁿ-thàn góa ê ōe ê lâng ōe an-ún khiā-khí,

bián kiaⁿ chai-hō, hióng-siū pêng-an.”

Chim-giân 1 - 現代台語譯本羅馬字版(TTVR)-闽南语

Learn More About Us