Iok-su-a-kì 17

Iok-su-a-kì 17 - 現代台語譯本羅馬字版(TTVR)-闽南语

Sai-pêng ê Má-ná-se Chi-cho̍k

1Ē-bīn sī Iok-sek ê tōa-kiáⁿ Má-ná-se ê hō͘-tāi thiu-chhiam tit--tio̍h ê ke-gia̍p: Má-kiat sī Má-ná-se ê tōa-kiáⁿ, Ki-lia̍t ê khai-thok-chiá; Má-kiat sī ióng-sū, tit-tio̍h Ki-lia̍t kap Pa-san.

2Iok-sek ê kiáⁿ Má-ná-se kî-tha ê hāu-siⁿ, chiū-sī A-pí-í-siā, Hi-le̍k, A-su-lia̍t, Sī-kiàm, Hi-hut, Sī-bí-tāi, in ê kiáⁿ-sun chiàu chong-cho̍k mā thiu-chhiam tit-tio̍h thó͘-tōe.

3 Má-ná-se ê goân-sun, Má-kiat ê cheng-sun, Ki-lia̍t ê sun, Hi-hut ê kiáⁿ Se-lô-hui-hap bô kiáⁿ, chí-ū cha-bó͘-kiáⁿ, chiū-sī Má-la, Ná-a, Hat-la, Bi̍t-ka, kap Tek-sat.

4In lâi kàu chè-si Í-lī-a-sat kap Lūn ê kiáⁿ Iok-su-a, í-ki̍p chèng léng-siù ê bīn-chêng, kóng, “Siōng Chú ū bēng-lēng Mô͘-se, tio̍h hō͘ goán kap goán ê chhin-cho̍k siâng-khoán pun-tio̍h ke-gia̍p.” Iok-su-a chiū chiàu Siōng Chú ê bēng-lēng, hō͘ in kap in ê a-peh a-chek kâng-khoán pun-tio̍h ke-gia̍p.

5Tī Iok-tàn-hô tang-pêng ê Ki-lia̍t kap Pa-san tōe-khu í-gōa, Má-ná-se koh thiu-chhiam tit-tio̍h cha̍p hūn ê ke-gia̍p,

6in-ūi Má-ná-se hiah-ê cha-bó͘-sun, tī i ê kiáⁿ-sun tiong tit-tio̍h ke-gia̍p. Ki-lia̍t-tōe pun hō͘ Má-ná-se kî-tha ê hō͘-tāi.

7 Má-ná-se ê tōe-kài, tùi A-siat khí, kàu Sī-kiàm tang-pêng ê Bi̍t-bí-tha, ǹg lâm kàu Ún Tha-phó͘-a ê chū-bîn hia.

8Tha-phó͘-a tōe-khu kui Má-ná-se; m̄-kú Má-ná-se pian-kài ê Tha-phó͘-a-siâⁿ sio̍k Í-hoat-liân ê hō͘-tāi.

9Chit-ê tōe-kài tùi hia lo̍h-khì kàu Ka-ná-khoe; khoe lâm-pêng ê siâⁿ-tìn sui-jiân tī Má-ná-se kéng-lāi, m̄-kú sio̍k Í-hoat-liân; Má-ná-se ê tōe-kài sūn Ka-ná-khoe ê pak-pêng, thàng kàu Tōe-tiong-hái ûi-chí.

10Í-hoat-liân tī lâm-pêng, Má-ná-se tī pak-pêng; Tōe-tiong-hái sī in sai-pêng ê tōe-kài; A-siat tī sai-pak-pêng, Í-sat-ka tī tang-pak-pêng.

11Má-ná-se tī Í-sat-ka kap A-siat ê kéng-lāi ū Pek Siān, Í-pek-liân, kap To-ní, í-ki̍p in hù-kūn ê chng-siā; koh ū Ún To-ní, Tha-la̍p, Bí-kiat-to chit saⁿ khu, í-ki̍p in ê chū-bîn kap hù-kūn ê chng-siā.

12M̄-kú Má-ná-se-lâng bô hoat-tō͘ chiong hiah-ê siâⁿ ê chū-bîn kóaⁿ--chhut-khì; Ka-lâm-lâng kian-chhî beh tòa tī hia.

13Í-sek-lia̍t-lâng kiông-sēng ê sî, chiū hō͘ Ka-lâm-lâng chòe khó͘-kang, bô lóng chiong in kóaⁿ--chhut-khì.

Iok-sek ê Hō͘-tāi Iau-kiû Khah Chōe Thó͘-tōe

14 Iok-sek ê kiáⁿ-sun tùi Iok-su-a kóng, “Siōng Chú ū sù-hok goán, hō͘ goán chiâⁿ-chòe tōa-cho̍k, lí ná kan-ta hō͘ goán thiu chi̍t ki chhiam, pun chi̍t hūn chòe ke-gia̍p?”

15 Iok-su-a ìn in kóng, “Lín nā lâng chōe, hiâm Í-hoat-liân soaⁿ-khu siuⁿ oe̍h, lín thang khì Pí-lī-sé-lâng kap Lī-hoa̍t-im-lâng tōe-khu ê chhiū-nâ khai-khún.”

16 Iok-sek ê hō͘-tāi kóng, “Hit-ê soaⁿ-khu bô-kàu goán tòa; koh tòa tī Pek Siān kap hù-kūn ê chng-siā, í-ki̍p Iâ-su-lia̍t Soaⁿ-kok ê Ka-lâm-lâng lóng ū thih ê chiàn-chhia.”

17 Iok-su-a tùi Iok-sek-ke, chiū-sī Í-hoat-liân-lâng kap Má-ná-se-lâng, kóng, “Lín lâng chōe koh kiông-sēng, eng-kai m̄-nā chi̍t ki chhiam ê hūn hō͘ lín.

18Kui-ê soaⁿ-khu lóng sī lín ê; hit-ê tōe-khu sui-jiân ū chhiū-nâ, lín thang khai-khún, kàu pian-kài chiū lóng sio̍k lín. Ka-lâm-lâng sui-jiân ū thih ê chiàn-chhia, koh kiông-sēng, lín mā ōe-tàng kā in kóaⁿ--chhut-khì.”

Iok-su-a-kì 17 - 現代台語譯本羅馬字版(TTVR)-闽南语

Learn More About Us