Si-phian 32 - 現代台語譯本羅馬字版(TTVR)-闽南语

Tāi-pi̍t kà-sī ê si.Jīn-chōe kap Kám-siā

1Kè-sit tit-tio̍h sià-bián, chōe-kò tit-tio̍h chhat-siau,

chit-khoán lâng chin ū hok-khì!

2Sim bô kan-chà, Siōng Chú bô sǹg i ū-chōe,

chit-khoán lâng chin ū hok-khì!

3Góa nā tiām-tiām m̄ jīn-chōe,

chiū kui-ji̍t haiⁿ-haiⁿ-chhan, liân kut-thâu to ta--khì.

4Lí ê chhiú mî-ji̍t tāng-tāng hêng-hoa̍t góa,

góa ê cheng-le̍k chhin-chhiūⁿ hō͘ joa̍h-thiⁿ ê ji̍t-thâu pha̍k kah ta-ta--khì.

5Góa ū tùi lí pâi-lia̍t góa ê chōe,

bô ún-môa góa ê chōe-ok.

Góa beh tùi Siōng Chú sêng-jīn góa ê kè-sit;

lí chiū sià-bián góa só͘ hoān ê chōe.

6Án-ni, khiân-sêng ê lâng lóng tio̍h tī thang chhē-tio̍h lí ê sî tùi lí kî-tó;

tōa-chúi hoàn-lām mā it-tēng bōe im-tio̍h i.

7Lí sī góa siám-bih ê só͘-chāi,

ōe pì-iū góa thoat-lī kan-khó͘;

lí ōe ēng tit-kiù ê koa sì-bīn ûi góa.

8Siōng Chú kóng, “Góa beh kà-sī lí, chí-sī lí eng-kai kiâⁿ ê lō͘;

góa beh chù-ba̍k khòaⁿ lí, koàn-kò͘ lí.

9M̄-thang chhin-chhiūⁿ bé, lô, bô tì-sek;

in tio̍h ēng bé-kā-kiuⁿ, bé-le̍k-soh iok-sok chiah ōe sûn-ho̍k.”

10Pháiⁿ-lâng ōe siū chin chōe thòng-khó͘;

m̄-kú óa-khò Siōng Chú ê lâng ū chû-ài sì-bīn ûi i.

11Gī-lâng ah, tio̍h in-ūi Siōng Chú lâi hoaⁿ-hí khoài-lo̍k!

Sim chèng-ti̍t ê lâng ah, tio̍h tōa-siaⁿ hoan-ho͘!

Learn More About Us