Thoân-tō-su 5

Thoân-tō-su 5 - 現代台語譯本羅馬字版(TTVR)-闽南语

M̄-thang Sûi-piān Hē-goān

1Lí nā khì Siōng-tè ê tiān, kha-pō͘ tio̍h kín-sīn; chìn-chêng lâi thiaⁿ pí gōng-lâng hiàn-chè khah hó, in-ūi in kan-ta ōe-hiáu chòe pháiⁿ.

2Tī Siōng-tè bīn-chêng lí m̄-thang sûi-piān kóng-ōe, mā m̄-thang kip beh kóng; in-ūi Siōng-tè tī thiⁿ lí tī tōe, só͘-í lí ê ōe tio̍h chió.

3Tāi-chì chōe, kāu bîn-bāng; kāu-ōe ōe hián-chhut gû-gōng.

4Lí tùi Siōng-tè hē-goān, tio̍h kín siā-goān; in-ūi I bô ài gû-gōng ê lâng; lí hē ê goān tio̍h siā.

5Hē-goān bô siā, lêng-khó bô hē.

6M̄-thang in-ūi lí ê ōe tì-kàu ka-kī hoān-chōe, mā m̄-thang tī Siōng-tè ê sù-chiá bīn-chêng kóng só͘ hē ê goān m̄-tio̍h. Sī-án-chóaⁿ beh hō͘ Siōng-tè in-ūi lí ê ōe siū-khì, phò-hoāi lí ê só͘-chòe?

7Bîn-bāng chōe, ōe chiū chōe, bô ì-gī ê sū mā chōe; chí-ū tio̍h kèng-ùi Siōng-tè.

Jîn-seng ê Khang-hu

8Lí nā khòaⁿ-tio̍h sàn-chhiah-lâng siū koaⁿ-oân ap-pek, á-sī chèng-ti̍t kong-gī siū pak-toa̍t, m̄-bián in-ūi án-ni kám-kak kî-koài; in-ūi koaⁿ-oân lóng ū khah koân ê koaⁿ teh kā in pó-hō͘.

9Thó͘-tōe ū hó ê siu-sêng, peh-sìⁿ chiah hó kè-ji̍t, chóng-sī tit-tio̍h siōng-tōa lī-ek--ê sī kun-ông.

10Ài chîⁿ--ê bōe in-ūi chîⁿ ti-chiok; ài hó-gia̍h--ê bōe in-ūi só͘ thàn--ê ti-chiok. Che mā-sī khang-hu.

11Châi-hù ke-thiⁿ, khò i chia̍h ê lâng mā ke-thiⁿ; án-ni i ū tit-tio̍h sím-mi̍h lī-ek? Put-kò sī khòaⁿ ōe tio̍h nā-tiāⁿ.

12Lô-kang bô-lūn chia̍h-chōe chia̍h-chió lóng hó-khùn; hó-gia̍h-lâng chia̍h kah pá-pá mā khùn bōe khì.

13Góa khòaⁿ-kìⁿ ji̍t-kng ê ē-bīn ū chi̍t hāng tōa put-hēng, chiū-sī châi-chú chîⁿ siú-tiâu-tiâu soah hāi-tio̍h ka-kī.

14I in-ūi sū-gia̍p bô sūn, chîⁿ-châi bô--khì; ū kiáⁿ mā bô sím-mi̍h thang lâu hō͘ i.

15I thǹg-theh chhut bú-thai, mā ōe thǹg-theh tò--khì; i lô-lo̍k tit--tio̍h-ê, chi̍t hāng mā bōe-tàng tòa--khì.

16I lâi ê sî án-chóaⁿ, khì ê sî mā-sī án-ni; che mā-sī chi̍t hāng tōa put-hēng; i lô-lo̍k lia̍h-hong ū sím-mi̍h lī-ek?

17M̄-nā án-ni, i chi̍t-sì-lâng tī o͘-àm tiong teh seng-oa̍h, ū chin chōe hoân-ló, mā ū pīⁿ-thiàⁿ kap siū-khì.

18Chiàu góa khòaⁿ, siōng-hó ê jîn-seng chiū-sī lâng tī Siōng-tè só͘ sù iú-hān ê nî-ji̍t lim-chia̍h, hióng-siū ji̍t-kng ē-bīn lô-lo̍k só͘ tit--tio̍h ê sêng-kó, in-ūi che sī i èng-tit ê hūn-gia̍h.

19Siōng-tè nā hō͘ lâng ū châi-hù, sán-gia̍p, thang khoài-lo̍k hióng-siū i lô-lo̍k tit--tio̍h ê hūn-gia̍h, che sī Siōng-tè ê un-sù.

20I m̄-bián ūi-tio̍h it-seng ê nî-ji̍t chhau-hoân, in-ūi Siōng-tè hō͘ i ê sim chhiong-móa hoaⁿ-hí.

Thoân-tō-su 5 - 現代台語譯本羅馬字版(TTVR)-闽南语

Learn More About Us