Ngá-ko 2

Ngá-ko 2 - 現代台語譯本羅馬字版(TTVR)-闽南语

1Góa sī Sa-lûn ê mûi-kùi-hoe,

sī soaⁿ-kok ê pek-ha̍p-hoe.

(Lâm)

2Góa ê ài-jîn tī cha-bó͘ gín-á tiong,

chhin-chhiūⁿ chhì-phè lāi ê pek-ha̍p-hoe.

(Lú)

3Góa chhin-ài--ê tī ta-po͘ gín-á tiong,

chhin-chhiūⁿ chhiū-nâ lāi ê phōng-kó-chhiū;

góa chin ài chē tī i ê ìm-ńg-ē,

i ê ké-chí góa chia̍h--khí-lâi chin tiⁿ.

4I chhōa góa ji̍p iàn-se̍k-thiaⁿ,

ēng ài-chêng ê kî khàm tī góa ê téng-bīn,

5ēng phû-tô-koaⁿ-oân pó͘ góa ê la̍t,

ēng phōng-kó chān góa ê goân-khì;

góa ài i ài kah phòa-pīⁿ.

6I ēng tò-chhiú hû góa ê thâu-khak,

ēng chiàⁿ-chhiú lám góa.

7 Iâ-lō͘-sat-léng ê cha-bó͘ gín-á ah,

góa kí lêng-iûⁿ kap chhân-iá ê lo̍k-bú, khún-chhiat kā lín hoan-hù,

m̄-thang phah-chhíⁿ, m̄-thang kiáu-jiáu goán ê ài-chêng,

kàu goán hoaⁿ-hí boán-chiok.

Tē-jī Siú(Lú)

8Khòaⁿ leh, góa chhin-ài--ê lâi lah;

i pôaⁿ-soaⁿ-kè-niá tiô-tiô-thiàu-thiàu teh lâi.

9Góa chhin-ài--ê chhin-chhiūⁿ lêng-iûⁿ, chhin-chhiūⁿ lo̍k-á;

lí khòaⁿ, i khiā tī chhiûⁿ-á gōa,

tùi thang-á teh khòaⁿ,

tùi thang-á-chí teh thàm.

10Góa chhin-ài--ê chhut-siaⁿ tùi góa kóng:

(Lâm)

Góa ê ài-jîn, góa ê bí-jîn, khí--lâi, lán lâi-khì.

11Tang-thiⁿ í-keng kè,

hō͘ í-keng soah.

12Hoe khui móa piàn-tōe,

chiáu-á chhiùⁿ-koa ê sî kàu lah,

tī chhân-iá ū thiaⁿ-kìⁿ pan-kah ê siaⁿ.

13Bû-hoa-kó chiām-chiām sêng-se̍k,

phû-tô-chhiū khui-hoe hoat-chhut phang-bī;

góa ê ài-jîn, góa ê bí-jîn, khí--lâi, lán lâi-khì.

14Góa ê hún-chiáu ah, lí bih tī chio̍h-phāng lāi, tī soaⁿ-giâm ún-ba̍t ê só͘-chāi;

kiû lí hō͘ góa khòaⁿ lí ê bīn, thiaⁿ lí ê siaⁿ;

in-ūi lí ê siaⁿ un-hô, lí ê bīn chin súi.

15Kā goán lia̍h hô͘-lî,

hiah-ê sún-hoāi phû-tô-hn̂g ê sòe-chiah hô͘-lî;

in-ūi goán ê phû-tô tú-á teh khui-hoe.

(Lú)

16Góa chhin-ài--ê sī góa ê, góa mā-sī i ê;

i tī pek-ha̍p-hoe tiong teh chhī iûⁿ.

17Góa chhin-ài--ê ah, lí tio̍h tī ji̍t liâng-léng, iáⁿ chhun-tn̂g ê sî tńg--lâi,

chhin-chhiūⁿ lêng-iûⁿ, chhin-chhiūⁿ lo̍k-á,

tùi khâm-khia̍t ê soaⁿ-niá tò-tńg--lâi.

Ngá-ko 2 - 現代台語譯本羅馬字版(TTVR)-闽南语

Learn More About Us