Í-se-kiat-su 4

Í-se-kiat-su 4 - 現代台語譯本羅馬字版(TTVR)-闽南语

Piáu-ián Iâ-lō͘-sat-léng Siū Ûi-khùn

1Siōng Chú kóng, “Jîn-chú ah, lí tio̍h the̍h chi̍t tè chng-á khǹg tī lí ê bīn-chêng, téng-bīn ōe chi̍t chō siâⁿ tāi-piáu Iâ-lō͘-sat-léng,

2koh tī siâⁿ sì-chiu-ûi khí koân-thah, chō thô͘-tui, chat-iâⁿ, an lòng-siâⁿ ê thûi.

3Jiân-āu, the̍h chi̍t tè thih-pang chhāi tī lí kap siâⁿ ê tiong-kan chòe siâⁿ-chhiûⁿ. Lí tio̍h biān-tùi chit-chō siâⁿ, chhin-chhiūⁿ lí teh ûi-kong siâⁿ. Che sī góa hō͘ Í-sek-lia̍t-lâng ê tiāu-thâu.

4“Lí tio̍h tó tò-pêng lâi taⁿ Í-sek-lia̍t-lâng chōe-kò ê hêng-hoa̍t. Lí tó kúi ji̍t, tāi-piáu in sêng-siū hêng-hoa̍t jōa kú.

5Góa í-keng koat-tēng lí tó ê ji̍t-sò͘, tāi-piáu in pōe-ge̍k ê nî ê sò͘-bo̍k, lí tio̍h tó saⁿ-pah káu-cha̍p ji̍t, taⁿ Í-sek-lia̍t-kok chōe-kò ê hêng-hoa̍t.

6Chit-ê sū liáu-āu, lí tio̍h koh tó chiàⁿ-pêng sì-cha̍p ji̍t, taⁿ Iû-tāi-kok chōe-kò ê hêng-hoa̍t. Chi̍t ji̍t tú chi̍t nî.

7“Lí tio̍h bīn ǹg siū ûi-khùn ê Iâ-lō͘-sat-léng-siâⁿ, lō͘-chhut chhiú-kut, kóng ū-giân kong-kek i.

8Góa beh kā lí pa̍k--khí-lâi, hō͘ lí bōe-tàng hoan-sin péng-pêng, ti̍t-kàu ûi siâⁿ ê ji̍t-chí móa.

9“Liáu-āu, lí tio̍h the̍h chi̍t-kóa sió-be̍h, tōa-be̍h, tāu-á, píⁿ-tāu, sóe-á, chho͘-be̍h, khǹg tī óaⁿ--ni̍h choh-piáⁿ, che chiū-sī lí ǹg tò-pêng tó--ê hit saⁿ-pah káu-cha̍p ji̍t ê chia̍h-mi̍h.

10Lí múi-ji̍t chia̍h ê liōng sī nn̄g-pah saⁿ-cha̍p kong-khek, ta̍k-ji̍t chiàu-sî chia̍h.

11Lí múi-ji̍t lim ê chúi sī pòaⁿ kong-seng, ta̍k-ji̍t chiàu-sî lim.

12Lí tio̍h tī bîn-chiòng bīn-chêng, ēng lâng ê pùn chòe hé-chhâ hang-piáⁿ lâi chia̍h, chhin-chhiūⁿ teh chia̍h tōa-be̍h-piáⁿ.”

13Siōng Chú koh kóng, “Í-sek-lia̍t-lâng hō͘ góa kóaⁿ-tio̍k liû-bông tī gōa-kok ê sî, in ōe chhin-chhiūⁿ án-ni chia̍h lu̍t-hoat só͘ kìm-chí bô chheng-khì ê chia̍h-mi̍h.”

14M̄-kú góa ìn kóng, “Chì-koân ê Siōng Chú, góa chêng-kàu-taⁿ m̄-bat ûi-pōe chheng-khì ê tiâu-lē, tùi sòe-hàn chiū bô chia̍h chū-jiân sí--ê, á-sī hō͘ iá-siù thiah-li̍h ê tōng-bu̍t. Góa m̄-bat chia̍h lé-gî-siōng bô chheng-khì ê chia̍h-mi̍h.”

15Siōng-tè kā góa kóng, “Án-ni hó, lí thang ēng gû-pùn tāi-thòe lâng ê pùn chòe hé-chhâ hang lí ê piáⁿ.”

16I koh kóng, “Jîn-chú ah, góa beh toān-choa̍t Iâ-lō͘-sat-léng ê niû-si̍t. In beh sim chûn khòa-lū chia̍h phòe-kip ê piáⁿ, tòa kiaⁿ-hiâⁿ lim siū hān-liōng ê chúi.

17In ê niû-si̍t bô-kàu thang chia̍h, chúi bô-kàu thang lim; in beh choa̍t-bāng kiaⁿ-hiâⁿ, in-ūi ka-kī ê chōe-ok soe-lám lâi sí.”

Í-se-kiat-su 4 - 現代台語譯本羅馬字版(TTVR)-闽南语

Learn More About Us