Sat-bó-ní-kì Hā-koàn 5

Sat-bó-ní-kì Hā-koàn 5 - 現代台語譯本羅馬字版(TTVR)-闽南语

Tāi-pi̍t Choh Choân Í-sek-lia̍t ê Ông(1 Tāi 11.1-3; 14.1-7)

1 Í-sek-lia̍t chèng chi-cho̍k lâi Hi-pek-lûn kìⁿ Tāi-pi̍t, kóng, “Goán sī lí ê kut-jio̍k.

2Khah-chá Sò-lô chòe goán ê ông ê sî, chhōa Í-sek-lia̍t khì kau-chiàn--ê sī lí; Siōng Chú mā bat kā lí kóng, ‘Lí ōe bo̍k-ióng góa ê chú-bîn Í-sek-lia̍t, mā ōe chòe Í-sek-lia̍t ê thóng-tī-chiá.’”

3Í-sek-lia̍t ê tiúⁿ-ló lóng lâi Hi-pek-lûn kìⁿ Tāi-pi̍t-ông, ông chiū tī Hi-pek-lûn, tī Siōng Chú ê bīn-chêng kap in li̍p-iok. In chiū ēng iû boah Tāi-pi̍t, siat-li̍p i chòe Í-sek-lia̍t ê ông.

4Tāi-pi̍t chē-ūi ê sî saⁿ-cha̍p hè, choh-ông sì-cha̍p nî kú.

5I tī Hi-pek-lûn chòe Iû-tāi-ông chhit nî la̍k kò-ge̍h; tī Iâ-lō͘-sat-léng chòe choân Í-sek-lia̍t kap Iû-tāi ê ông saⁿ-cha̍p-saⁿ nî.

Tāi-pi̍t Kong-chiàm Iâ-lō͘-sat-léng(1 Tāi 11.4-9)

6Ông kap tè i ê lâng khì kàu Iâ-lō͘-sat-léng, beh kong-kek tòa tī hia ê Iâ-pò͘-su-lâng. Iâ-pò͘-su-lâng tùi Tāi-pi̍t kóng, “Lí bô khó-lêng kong--ji̍p-lâi! Goán liân sit-bêng--ê, kha-pái--ê to ōe-tàng kā lí phah-pāi.” In àn-sǹg Tāi-pi̍t it-tēng bōe-tàng kong--ji̍p-lâi.

7M̄-kú Tāi-pi̍t ū kong-chhú Sek-an ê pó-lúi, chiū-sī hiān-chāi ê Tāi-pi̍t-siâⁿ.

8Hit-ji̍t, Tāi-pi̍t kóng, “Lâng nā beh phah Iâ-pò͘-su-lâng, tio̍h tùi ín-chúi ê pōng-khang chiūⁿ--khì, khì phah Tāi-pi̍t só͘ oàn-hūn hiah-ê kha-pái--ê, sit-bêng--ê.” Só͘-í ū sio̍k-gú kóng, “Sit-bêng--ê, kha-pái--ê bōe-ēng-tit ji̍p-khì Siōng-tè ê tiān.”

9Tāi-pi̍t tòa tī pó-lúi, kā hit-ê só͘-chāi hō-chòe Tāi-pi̍t-siâⁿ. Tāi-pi̍t tùi Bí-lô

ǹg lāi-bīn sì-ûi khí chhiûⁿ.

10Tāi-pi̍t jú lâi jú kiông-sēng, in-ūi Siōng Chú — Bān-kun ê Thóng-sòe Siōng-tè kap i tông-chāi.

11 Thài-ní-ông Hi-lân phài sù-chiá tòa pek-hiuⁿ-chhâ, kap choh-ba̍k sai-hū, phah-chio̍h sai-hū khì Tāi-pi̍t hia, kā Tāi-pi̍t khí kiong-tiān.

12Tāi-pi̍t chiū chai Siōng Chú kian-li̍p i chòe Í-sek-lia̍t-ông, koh ūi-tio̍h Siōng Chú ê chú-bîn Í-sek-lia̍t hō͘ i ê kok kiông-sēng.

13 Tāi-pi̍t lī-khui Hi-pek-lûn liáu-āu, chhōa Iâ-lō͘-sat-léng ê lú-chú chòe pîn-hui, koh siⁿ hāu-siⁿ kap cha-bó͘-kiáⁿ.

14Tī Iâ-lō͘-sat-léng siⁿ ê kiáⁿ sī Sa-bō͘-a, Sok-pā, Ná-tan, Só͘-lô-bûn,

15Ek-hat, Í-lī-su-a, Nî-húi, Ngá-hui-a,

16Í-lī-sa-má, Í-lī-ngá-tāi, kap Í-lī-hoat-lia̍t.

Thâi-iâⁿ Hui-lī-sū-lâng(1 Tāi 14.8-17)

17 Hui-lī-sū-lâng thiaⁿ-tio̍h Tāi-pi̍t siū boah-iû soán-li̍p chòe Í-sek-lia̍t-ông, chiū choân-le̍k chiūⁿ-lâi tui-chhē Tāi-pi̍t. Tāi-pi̍t thiaⁿ--tio̍h chiū lo̍h-khì pó-lúi.

18Hui-lī-sū-lâng lâi, piàn-móa Lī-hoa̍t-im Soaⁿ-kok.

19Tāi-pi̍t mn̄g Siōng Chú kóng, “Góa kiám thang chìn-kong Hui-lī-sū-lâng? Lí kiám beh chiong in kau tī góa ê chhiú?”

Siōng Chú kā Tāi-pi̍t kóng, “Lí khì, góa it-tēng ōe chiong Hui-lī-sū-lâng kau tī lí ê chhiú.”

20 Tāi-pi̍t lâi kàu Pa-le̍k Pí-la-sim, tī hia kā Hui-lī-sū-lâng phah-pāi, kóng, “Siōng Chú tī góa ê bīn-chêng kā góa ê tùi-te̍k chhiong-sòaⁿ, chhin-chhiūⁿ tōa-chúi kā thê-hōaⁿ chhiong-phòa.” In-ūi án-ni, hit-ê só͘-chāi chiū kiò-chòe Pa-le̍k Pí-la-sim.

21Hui-lī-sū-lâng tô-cháu ê sî kā in ê ngó͘-siōng tàn tī hia; Tāi-pi̍t kap tè i ê lâng kā hiah-ê ngó͘-siōng khioh--khì.

22 Hui-lī-sū-lâng koh lâi, piàn-móa Lī-hoa̍t-im Soaⁿ-kok.

23Tāi-pi̍t mn̄g Siōng Chú. Siōng Chú kóng, “M̄-thang chiàⁿ-bīn chìn-kong, tio̍h se̍h-khì in ê āu-bīn, tī sng-châi-chhiū-nâ ê thâu-chêng kā in kong-kek.

24Lí thiaⁿ-tio̍h chhiū-bé ū hêng-kun ê siaⁿ, chiū tio̍h kóaⁿ-kín chìn-kong, in-ūi hit-sî Siōng Chú í-keng tī lí ê thâu-chêng kong-kek Hui-lī-sū-lâng ê kun-tūi.”

25Tāi-pi̍t chiū chiàu Siōng Chú ê bēng-lēng khì chòe, tùi Ka-pa kong-kek Hui-lī-sū-lâng, ti̍t-kàu Ki-sek.

Sat-bó-ní-kì Hā-koàn 5 - 現代台語譯本羅馬字版(TTVR)-闽南语

Learn More About Us