Si-phian 64 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Kî-kiû Siōng-tè Pó-hō͘

1Siōng-tè ah, góa bâi-oàn ê sî, kiû lí thiaⁿ góa ê siaⁿ;

kiû lí pó-hō͘ góa ê sìⁿ-miā bián kiaⁿ tùi-te̍k ê hām-hāi.

2Kiû lí chiong góa khǹg-ba̍t, hō͘ góa thoat-lī siâ-ok ê lâng ê im-bô͘,

thoat-lī chòe pháiⁿ ê lâng ê kè-bô͘.

3In bôa in ê chi̍h chhin-chhiūⁿ bôa to;

in ēng ok-to̍k ê ōe chòe chìⁿ teh biâu-chún,

4bâi-ho̍k beh siā bû-ko͘ ê lâng;

in hut-jiân siā i, chhiú mā bô chhoah.

5In chham-siông pháiⁿ kè-bô͘;

àm-tiong siat-kè, tiuⁿ lô-bāng,

kóng, “Siáⁿ-lâng ōe khòaⁿ-tio̍h lán?”

6In tô͘-bô͘ pháiⁿ-tāi,

kóng, “Goán í-keng ū siūⁿ-chhut siōng cheng-bi̍t ê kè-bô͘.”

Lâng ê sim-su liām-thâu si̍t-chāi ū-kàu khúi-chà.

7M̄-kú Siōng-tè beh ēng chìⁿ siā in;

in ōe hut-jiân tio̍h-siong.

8In ōe hō͘ ka-kī kóng ê ōe hāi-sí;

khòaⁿ--kìⁿ ê lâng lóng ōe iô-thâu.

9Chèng-lâng lóng ōe kiaⁿ-hiâⁿ,

beh pò-iông Siōng-tè ê só͘-chòe,

siông-sè siūⁿ I ê chok-ûi.

10Gī-lâng ōe in-ūi Siōng Chú lâi hoaⁿ-hí,

mā ōe óa-khò I tit-tio̍h an-choân.

Só͘-ū sim chèng-ti̍t ê lâng lóng ōe chheng-chàn I.

Learn More About Us