Si-phian 146 - 現代台語譯本羅馬字版(TTVR)-闽南语

Chheng-chàn Kong-gī ê Siōng Chú

1Ha-lé-lú-iah, chheng-chàn Siōng Chú!

Góa ê sim-sîn ah, tio̍h chheng-chàn Siōng Chú!

2Góa it-seng beh chheng-chàn Siōng Chú;

góa oa̍h ê ji̍t lóng beh chhiùⁿ-koa chheng-chàn góa ê Siōng-tè.

3M̄-thang óa-khò kun-ông;

m̄-thang óa-khò ōe-sí ê lâng, in bōe-tàng pang-chān.

4In chi̍t-ē tn̄g-khùi chiū kui-thó͘;

in ê kè-ōe tī hit-ji̍t chiū lo̍k-khong.

5Khò Ngá-kok ê Siōng-tè pang-chān ê lâng chin ū hok-khì!

Siōng Chú — in ê Siōng-tè sī in ê ǹg-bāng.

6I chhòng-chō thiⁿ, tōe, hái,

mā chhòng-chō kî-tiong bān-mi̍h.

I éng-oán sìn-si̍t.

7I ūi-tio̍h siū óng-khut ê lâng sin-oan;

I sù chia̍h-mi̍h hō͘ iau-gō ê lâng.

Siōng Chú tháu-pàng siū koaiⁿ-kaⁿ ê lâng;

8Siōng Chú hō͘ bông-jîn ōe khòaⁿ--kìⁿ.

Siōng Chú hû-khí siū ap-chè ê lâng;

Siōng Chú thiàⁿ-sioh gī-lâng.

9Siōng Chú pó-hō͘ chhut-gōa-lâng,

hû-chhî ko͘-jî kóaⁿ-hū.

I hō͘ pháiⁿ-lâng ê lō͘ kiâⁿ bōe thong.

10Siōng Chú ōe éng-oán choh-ông;

Sek-an ah, lí ê Siōng-tè beh choh-ông, ti̍t-kàu bān-tāi!

Ha-lé-lú-iah, chheng-chàn Siōng Chú!

Learn More About Us