Sin-bēng-kì 13

Sin-bēng-kì 13 - 現代台語譯本羅馬字版(TTVR)-闽南语

1Lín tiong-kan nā ū sian-ti á-sī choh-bāng--ê chhut-hiān, kiâⁿ sîn-jiah kî-sū hō͘ lín khòaⁿ,

2tùi lín kóng, “Lán lâi-khì kèng-pài ho̍k-sāi lín m̄-bat ê sîn-bêng.” Sui-jiân in só͘ kiâⁿ ê sîn-jiah kî-sū ū si̍t-hiān,

3lín mā m̄-thang thiaⁿ-thàn hit-ê sian-ti á-sī choh-bāng--ê ê ōe; in-ūi Siōng Chú — lín ê Siōng-tè teh khó-giām lín, ài chai lín sī m̄-sī choân-sim choân-chêng thiàⁿ I.

4Lín tio̍h sūn-thàn Siōng Chú — lín ê Siōng-tè, kèng-ùi I, chun-siú I ê kài-bēng, thiaⁿ-thàn I ê ōe, ho̍k-sāi I, tiong-sêng kun-tè I.

5Hit-ê sian-ti á-sī choh-bāng--ê tio̍h kā i chhú-sí, in-ūi i ín-iú lín pōe-poān chhōa lín chhut Ai-ki̍p, kiù-sio̍k lín thoat-lī chòe lô͘-châi ê ke ê Siōng Chú — lín ê Siōng-tè, hō͘ lín phian-lī I bēng-lēng lín tio̍h kiâⁿ ê tō-lō͘; án-ni, chiū tùi lín tiong-kan tû-khì hit-ê siâ-ok ê sū.

6Lín kâng-bú ê hiaⁿ-tī, á-sī lín ê kiáⁿ, cha-bó͘-kiáⁿ, lín só͘ thiàⁿ ê bó͘, chhin-bi̍t ê pêng-iú, nā ū lâng àm-tiong ín-iú lín, kóng, “Lán lâi-khì pài pa̍t-ê sîn-bêng.” Hiah-ê sîn-bêng sī lín kap lín ê lia̍t-chó͘ m̄ bat--ê,

7sī sì-ûi ê bîn-cho̍k, put-koán lī-khui lín hn̄g á-sī kūn, á-sī tī chit-ê tōe jīm-hô só͘-chāi teh pài--ê.

8Lín m̄-thang thiaⁿ-thàn i, m̄-thang tông-chêng, m̄-thang sioh i, mā m̄-thang am-hō͘ i.

9Lín it-tēng tio̍h kā i chhú-sí; lín tio̍h seng hē-chhiú, jiân-āu chèng-lâng hē-chhiú hō͘ i sí.

10Lín tio̍h ēng chio̍h-thâu kā tìm-sí, in-ūi i siūⁿ-beh ín-iú lín phian-lī chhōa lín chhut Ai-ki̍p, thoat-lī chòe lô͘-châi ê ke ê Siōng Chú — lín ê Siōng-tè.

11Án-ni, Í-sek-lia̍t chèng-lâng thiaⁿ--tio̍h, chiū ōe kiaⁿ, bô lâng káⁿ koh chòe chit-khoán khó-ò͘ⁿ ê sū.

12Tī Siōng Chú — lín ê Siōng-tè siúⁿ-sù lín khiā-khí ê siâⁿ, lín nā thiaⁿ-kìⁿ

13ū pháiⁿ-lâng chhut-lâi ín-iú siâⁿ-lāi ê lâng, kóng, “Lán lâi-khì ho̍k-sāi pa̍t-ê sîn-bêng.” Chiah-ê sîn-bêng sī lín m̄ bat--ê;

14lín chiū tio̍h thàm-thiaⁿ, tiâu-cha, siông-sè chhâ-mn̄g; lín tiong-kan nā chin-chiàⁿ ū chit-khoán khó-ò͘ⁿ ê sū,

15lín it-tēng tio̍h ēng to thâi-sí siâⁿ-lāi ê chū-bîn, kap siâⁿ-lāi só͘-ū--ê, í-ki̍p in ê cheng-siⁿ.

16Lín tio̍h chiong hit-ê siâⁿ ê châi-bu̍t thia̍p tī kóng-tiûⁿ, ēng hé sio siâⁿ kap lóng-chóng ê châi-bu̍t, kui hō͘ Siōng Chú — lín ê Siōng-tè, hō͘ hit-ê siâⁿ éng-oán hong-hòe, bōe-ēng-tit tiông-kiàn.

17Só͘-ū eng-kai húi-bia̍t ê mi̍h, liân chi̍t hāng to m̄-thang the̍h, án-ni Siōng Chú chiū ōe hôe-sim-tńg-ì, bô hoat tōa siū-khì, tian-tò si-un hō͘ lín, lîn-bín lín, chiàu I tùi lín ê lia̍t-chó͘ só͘ li̍p-sè--ê, hō͘ lín lâng-gia̍h ke-thiⁿ;

18in-ūi lín thiaⁿ-thàn Siōng Chú — lín ê Siōng-tè ê ōe, chun-siú góa kin-á-ji̍t só͘ bēng-lēng lín I it-chhè ê kài-bēng, chòe Siōng Chú — lín ê Siōng-tè khòaⁿ-chòe tio̍h ê sū.

Sin-bēng-kì 13 - 現代台語譯本羅馬字版(TTVR)-闽南语

Learn More About Us