Í-su-la-kì 3

Í-su-la-kì 3 - 現代台語譯本羅馬字版(TTVR)-闽南语

Hôe-ho̍k Kèng-pài

1 Í-sek-lia̍t-lâng tī ka-kī ê kò͘-hiong lóng an-tùn hó-sè. Chhit--ge̍h, jîn-bîn tâng-sim chi̍t-ì chū-chi̍p tī Iâ-lō͘-sat-léng.

2Iok-sat-ta̍t ê kiáⁿ Iâ-su-a kap i ê chè-si tâng-phōaⁿ, Sat-la-thiat ê kiáⁿ Só͘-lô-pa-pek kap i ê chhin-cho̍k, lóng khí-lâi khí-chō Í-sek-lia̍t Siōng-tè ê chè-tôaⁿ, beh chiàu Siōng-tè tiōng-iōng ê lâng Mô͘-se ê lu̍t-hoat, tī chè-tôaⁿ téng-bīn hiàn sio-hòa-chè.

3Sui-jiân in kiaⁿ tong-tōe ê chū-bîn, in iû-goân tī pún-lâi ê só͘-chāi tiông-kiàn chè-tôaⁿ, koh chá-àm tī hit téng-bīn hiàn sio-hòa-chè hō͘ Siōng Chú.

4In mā chiàu lu̍t-hoat ê kì-chài siú Tah-liâu-choeh, ta̍k-ji̍t chiàu kui-tēng ê sò͘-bo̍k hiàn sio-hòa-chè.

5Lēng-gōa, in hiàn keng-siông teh hiàn ê sio-hòa-chè, múi ge̍h chhoe-it ê chè, kap Siōng Chú hun-pia̍t-choh-sèng ê choeh-kî ê chè, í-ki̍p ta̍k-ê lâng kam-sim hiàn hō͘ Siōng Chú ê chè.

6Sui-jiân Siōng Chú ê sèng-tiān iáu-bē tiông-kiàn, m̄-kú tùi chhit-ge̍h chhoe-it khí, in chiū khai-sí hiàn sio-hòa-chè hō͘ Siōng Chú.

Khai-sí Tiông-kiàn Sèng-tiān

7In ēng gûn hō͘ phah-chio̍h sai-hū kap choh-ba̍k sai-hū, koh ēng niû-si̍t, chiú, kap iû hō͘ Se-tùn-lâng kap Thài-ní-lâng, hō͘ in chiong pek-hiuⁿ-chhiū tùi Lê-pa-lūn ēng hái-ūn sàng kàu Iok-phà; chiah-ê tāi-chì lóng ū tit-tio̍h Pho-su hông-tè Sài-ló͘-sū ê hú-khó.

8In kàu Iâ-lō͘-sat-léng Siōng-tè sèng-tiān ê tē-jī nî jī--ge̍h, Sat-la-thiat ê kiáⁿ Só͘-lô-pa-pek, Iok-sat-ta̍t ê kiáⁿ Iâ-su-a, kap kî-tha ê chè-si tâng-phōaⁿ, Lī-bī-lâng, í-ki̍p só͘-ū liû-hòng tò-lâi Iâ-lō͘-sat-léng ê lâng, lóng khai-sí khí Siōng Chú ê sèng-tiān; in phài jī-cha̍p hè í-siōng ê Lī-bī-lâng chòe tok-kang.

9Tùi án-ni, Iû-tāi ê hō͘-tāi, chiū-sī Iâ-su-a kap i hiah-ê kiáⁿ kap chhin-cho̍k, Kah-bia̍t kap i ê kiáⁿ, í-ki̍p Lī-bī-lâng Hi-ná-ta̍t ê kiáⁿ kap sun, kap in ê chhin-cho̍k, lóng chòe-hé hū-chek kàm-tok tiông-kiàn Siōng-tè sèng-tiān ê kang-thêng.

10Khí-chhù sai-hū hē Siōng Chú sèng-tiān ê tōe-ki ê sî, chè-si chhēng lé-ho̍k pûn lat-pah, A-sat ê hō͘-tāi Lī-bī-lâng phah-poa̍h, lóng chiàu Í-sek-lia̍t-ông Tāi-pi̍t ê kui-tēng, khiā-teh chheng-chàn Siōng Chú.

11In ū-ê chhiùⁿ ū-ê hô, o-ló kám-siā Siōng Chú, kóng:

Siōng Chú chì-siān,

I tùi Í-sek-lia̍t ê chû-ài sòa kàu éng-oán.

In chheng-chàn Siōng Chú ê sî, chèng-lâng tōa-siaⁿ hoah, in-ūi Siōng Chú sèng-tiān ê tōe-ki í-keng hē hó-sè.

12Ū chin chōe chè-si, Lī-bī-lâng, kap ta̍k-cho̍k ê cho̍k-tiúⁿ, chiū-sī hiah-ê bat khòaⁿ-tio̍h í-chêng ê sèng-tiān ê lāu-lâng, hiān-chāi chhin-ba̍k khòaⁿ-tio̍h hē chit-keng tiān ê tōe-ki, chiū tōa-siaⁿ háu; koh ū chin chōe lâng in-ūi hoaⁿ-hí tōa-siaⁿ hoah.

13Jîn-bîn hun bōe chheng sī hoan-ho͘ ê siaⁿ á-sī thî-khàu ê siaⁿ; jîn-bîn tōa-siaⁿ hoah ê siaⁿ chin hn̄g lóng thiaⁿ ōe tio̍h.

Í-su-la-kì 3 - 現代台語譯本羅馬字版(TTVR)-闽南语

Learn More About Us