Chim-giân 5

Chim-giân 5 - 現代台語譯本羅馬字版(TTVR)-闽南语

Kìm-kài Îm-loān

1Góa ê kiáⁿ ah, tio̍h liû-sim góa ê tì-hūi,

àⁿ hī-khang thiaⁿ góa bêng-lí ê ōe,

2hō͘ lí thang sīn-tiōng kè-ōe,

hō͘ lí ê giân-gú hián-chhut tì-sek.

3In-ūi îm-hū ê chhùi-tûn tiⁿ-but-but,

i ê chhùi ku̍t-liu-liu;

4m̄-kú āu-lâi pìⁿ-chòe khó͘-te̍h-te̍h,

chhin-chhiūⁿ siang-bīn-lāi ê kiàm ōe siong-hāi lâng.

5I ê kha kiâⁿ ǹg sí-tōe;

i ê kha-pō͘ kiâⁿ-lo̍h Im-hú.

6Oa̍h-miā pîⁿ-tháⁿ ê lō͘, i bô siūⁿ-beh kiâⁿ;

kiâⁿ-ji̍p oan-khiau gûi-hiám ê lō͘, i mā m̄ chai.

7Góa ê kiáⁿ-jî ah, tio̍h thiaⁿ-thàn góa;

m̄-thang khì-sak góa só͘ kóng ê ōe.

8Tio̍h lī-khui îm-hū ê lō͘ hn̄g-hn̄g,

m̄-thang kūn-óa i ê mn̂g-kháu,

9chiah bián lí chiong ka-kī ê cheng-le̍k hō͘ pa̍t-lâng,

chiong lí ê hè-siū kau hō͘ chân-jím bô-chêng ê lâng;

10chiah bián siⁿ-hūn-lâng the̍h lí ê chîⁿ-châi khì hióng-lo̍k;

lí phah-piàⁿ tit--tio̍h ê châi-hù lóng pìⁿ-chòe pa̍t-lâng ê.

11Kàu-bé lí ê seng-khu soe-pāi,

lí chiū pi-ai thó͘-khùi, kóng,

12“Hāi ah, góa ná ōe iàm-ò͘ⁿ koán-kàu,

biáu-sī chek-pī;

13koh bô thiaⁿ tō-su ê ōe,

bô thiaⁿ-thàn kà-sī góa ê lâng.

14Góa tī hōe-chiòng ê tāi-hōe tiong,

siū-tio̍h chek-hoa̍t, kiàn-siàu kah beh sí.”

15Tio̍h lim ka-kī chúi-tî ê chúi,

lim ka-kī chíⁿ-lāi chhut ê chúi.

16Lí ê chôaⁿ-chúi kiám thang móa kàu gōa-bīn?

Lí ê khoe-chúi kiám thang lâu khì chhī-tiûⁿ-kháu?

17I chí-ū sio̍k lí chi̍t lâng;

m̄-thang kap pa̍t-lâng kong-ke.

18Tio̍h hō͘ lí ê chúi-chôaⁿ siū chiok-hok;

tio̍h tùi lí siàu-liân ê sî só͘ chhōa ê bó͘ tit-tio̍h hoaⁿ-hí khoài-lo̍k.

19I chhin-chhiūⁿ khó-ài ê lo̍k-bú, súi ê soaⁿ-iûⁿ-bú;

lí tī i ê heng-chêng put-sî tit-tio̍h boán-chiok;

i ê ài-chêng hō͘ lí sî-siông loân-bō͘.

20Góa ê kiáⁿ ah, lí sī-án-chóaⁿ loân-bō͘ îm-hū?

Sī-án-chóaⁿ lám pa̍t-lâng ê bó͘?

21In-ūi lâng só͘ kiâⁿ ê lō͘ Siōng Chú lóng khòaⁿ ōe tio̍h;

lâng it-chhè ê kiâⁿ-chòe I lóng teh kàm-chhat.

22Pháiⁿ-lâng ōe hō͘ ka-kī ê chōe-kò khîⁿ-tiâu-tiâu,

ōe hō͘ ka-kī chōe-ok ê soh pa̍k-sí-sí.

23I ōe in-ūi bô siū koán-kàu tì-kàu sí-bông,

ōe in-ūi kè-thâu gû-gōng kiâⁿ bê-lō͘.

Chim-giân 5 - 現代台語譯本羅馬字版(TTVR)-闽南语

Learn More About Us