Iâ-lī-bí-su 5

Iâ-lī-bí-su 5 - 現代台語譯本羅馬字版(TTVR)-闽南语

Iâ-lō͘-sat-léng ê Chōe-ok

1Tio̍h kiâⁿ-thàu Iâ-lō͘-sat-léng ê koe-lō͘,

sì-kòe thàm-thiaⁿ,

tī siâⁿ-mn̂g-kháu chhē,

khòaⁿ ōe-tàng chhē-tio̍h chi̍t ê kiâⁿ kong-gī, tui-kiû chin-sêng ê lâng á bô;

nā ū, góa chiū beh sià-bián chit-ê siâⁿ.

2In sui-jiân kí oa̍h-oa̍h ê Siōng Chú chiù-chōa,

m̄-kú in chiù ê chōa sī ké--ê.

3Siōng Chú, lí kiám m̄-sī teh chhē chin-sêng ê lâng?

Chit-ê siâⁿ ê lâng lí phah in, in m̄-chai thiàⁿ;

lí húi-bia̍t in, in m̄-khéng siū-kà;

in kò͘-chip ngī-sim, m̄-khéng hôe-thâu.

4Góa siūⁿ: In sī sàn-chhiah, bû-ti ê jîn-bîn;

in m̄ bat Siōng Chú ê tō-lō͘,

m̄ chai Siōng-tè ê bēng-lēng.

5Góa chiū khì chhē ū koân-sè ê lâng, kap in tâm-lūn.

In eng-kai bat Siōng Chú ê tō-lō͘,

chai in ê Siōng-tè ê bēng-lēng.

Ná ōe chai, in kèng-jiân kòng-tn̄g taⁿ,

tháu-khui soh, bô beh sūn-ho̍k Siōng Chú.

6Só͘-í, chhiū-nâ ê sai ōe lâi kā in thun-chia̍h,

iá-gōa ê chhâi-lông ōe lâi kā-sí in,

siâⁿ-gōa ê pà teh tng-tán in.

Nā ū lâng chhut-siâⁿ, it-tēng siū thiah-chhùi,

in-ūi in put-sî ûi-pōe Siōng Chú,

tùi Siōng Chú put-tiong ê sū sǹg bōe liáu.

7Siōng Chú kóng, “Góa ná tio̍h sià-bián lín?

Lín ê kiáⁿ-jî pàng-sak góa,

koh kí ké-sîn chiù-chōa.

Góa hō͘ in pá-chiok,

in soah khì kiâⁿ-îm,

kui-tīn khì khoeh tī ki-lú ê chhù.

8In chhin-chhiūⁿ chhī-pá khí-chhio ê bé,

ǹg chhù-piⁿ ê bó͘ kho͘ si-á.

9In chòe chiah-ê sū, góa kiám m̄-bián pān?

Chhin-chhiūⁿ chit-khoán kok-ka, góa kiám m̄-bián pò-ho̍k?

Siōng Chú án-ni soan-kò.

10Lín tio̍h khì húi-hoāi i ê phû-tô-hn̂g,

m̄-kú m̄-thang kā in húi-liáu-liáu,

kan-ta chhò i ê ki,

in-ūi in bô sio̍k tī Siōng Chú.

11 Í-sek-lia̍t-ke kap Iû-tāi-ke oân-choân pōe-poān góa.”

Siōng Chú án-ni soan-kò.

Siōng Chú Pàng-sak Í-sek-lia̍t

12 Í-sek-lia̍t m̄ sêng-jīn Siōng Chú só͘ kóng ê ōe, kóng, “Siōng Chú bōe chòe sím-mi̍h, bōe kàng chai-hō, bōe hō͘ lán tú-tio̍h chiàn-loān á-sī ki-hng.

13-14Sian-ti ê kà-sī put-kò chhin-chhiūⁿ chi̍t chūn hong, Siōng Chú ê ōe bô tī in lāi-bīn.” Só͘-í Siōng Chú — Bān-kun ê Thóng-sòe Siōng-tè tùi góa kóng, “In kì-jiân án-ni kóng, góa beh hō͘ góa khǹg tī lí chhùi-lāi ê ōe chiâⁿ-chòe hé, hō͘ chiah-ê jîn-bîn chiâⁿ-chòe chhâ, hé beh kā in sio-tiāu.”

15Siōng Chú kóng, “Í-sek-lia̍t-lâng, góa beh hō͘ chi̍t ê kok-ka tùi chin hn̄g ê só͘-chāi lâi kong-kek lí. Chit-ê kok-ka chin kiông, le̍k-sú iu-kiú; in ê gú-giân lín m̄ bat, in kóng sím-mi̍h lín thiaⁿ bô.

16In lóng sī ióng-béng ê chiàn-sū; in ê chìⁿ-tē chhin-chhiūⁿ phah-khui ê bōng, ōe-tàng siā-sí chin chōe lâng.

17In beh kā lín ê ngó͘-kok kap bí-niû chia̍h-liáu-liáu, thun-bia̍t lín ê hāu-siⁿ cha-bó͘-kiáⁿ, koh thun-chia̍h lín ê gû-kûn iûⁿ-kûn, chiong lín ê phû-tô kap bû-hoa-kó chia̍h kah lóng bô chhun, koh ēng to-kiàm húi-hoāi lín só͘ óa-khò kian-kò͘ ê siâⁿ.”

18Siōng Chú kóng, “Chiū-sī kàu hit-sî, góa mā bōe kā góa ê chú-bîn thiat-tóe húi-bia̍t.

19In nā mn̄g, ‘Siōng Chú — goán ê Siōng-tè sī-án-chóaⁿ kā goán chòe chiah-ê tāi-chì?’ Lí tio̍h kā in kóng, ‘Kì-jiân lín pàng-sak góa, tī lín ka-kī ê thó͘-tōe ho̍k-sāi pa̍t-ê sîn-bêng, lín mā beh chhin-chhiūⁿ án-ni, tī m̄-sī sio̍k lín ê tōe ho̍k-sāi gōa-cho̍k-lâng.’”

Siōng Chú Kéng-kò I ê Chú-bîn

20Tio̍h kā Ngá-kok ê hō͘-tāi thoân-pò, kā Iû-tāi ê jîn-bîn soan-pò͘:

21Lín chit-ê gōng koh bû-ti ê jîn-bîn, tio̍h chù-ì thiaⁿ! Lín ū ba̍k-chiu m̄-kú khòaⁿ bô, ū hī-khang m̄-kú thiaⁿ bô.

22Siōng Chú kóng, “Lín m̄ kiaⁿ góa sī--bô? Tī góa ê bīn-chêng bōe kiaⁿ-hiâⁿ ngia̍uh-ngia̍uh-chhoah sī--bô? Góa ēng soa kā hái siat éng-oán ê kài-hān, hō͘ hái bōe-tàng chhiau-kè; hái-éng poah-lâi-poah-khì chhèng-koân, mā bōe-tàng pôaⁿ--kè.

23M̄-kú chit-ê jîn-bîn kò͘-chip, ngó͘-ge̍k, pōe-poān góa, lī-khui góa.

24In sim-lāi lóng bô siūⁿ, ‘Lán tio̍h kèng-ùi Siōng Chú — lán ê Siōng-tè, I chiàu-sî sù chhun-lîm chhiu-ú hō͘ lán, koh kā lán tēng siu-sêng ê kùi-choeh.’

25Lín ê chōe-kò soah hō͘ hong-ú sit-tiau; lín ê chōe-gia̍t hō͘ lín bōe-tàng tit-tio̍h hok-khì.

26“Góa ê chú-bîn tiong-kan ū pháiⁿ-lâng; in chhin-chhiūⁿ lia̍h-chiáu ê lâng bâi-ho̍k tng-tán, siat oa̍h-tauh beh lia̍h lâng.

27In kui chhù-keng lóng sī khúi-chà, chhin-chhiūⁿ chiáu-láng-á lāi lóng sī chiáu, só͘-í in hó-gia̍h koh ū-sè.

28In âng-ko-chhiah-chhi̍h, chòe chīn pháiⁿ-tāi. In bô thòe ko͘-jî sin-oan, mā bô thòe sàn-chhiah-lâng chú-chhî kong-tō.”

29Siōng Chú koh kóng, “In chòe chiah-ê sū, góa kiám m̄-bián kā in pān? Chhin-chhiūⁿ chit-khoán kok-ka, góa kiám m̄-bián kā in pò-ho̍k?

30Khióng-pò͘ kiaⁿ-hiâⁿ ê sū kèng-jiân tī chit-ê kok-ka hoat-seng:

31Sian-ti kóng ké sìn-sit, chè-si la̍k-koân, góa ê chú-bîn mā ì-ài án-ni. Sím-phòaⁿ kàu ê sî, khòaⁿ lín beh án-chóaⁿ?”

Iâ-lī-bí-su 5 - 現代台語譯本羅馬字版(TTVR)-闽南语

Learn More About Us