Iâ-lī-bí-su 34

Iâ-lī-bí-su 34 - 現代台語譯本羅馬字版(TTVR)-闽南语

Kéng-kò Se-tí-ka

1 Pa-pí-lûn-ông Nî-pò͘-kah-nî-sat chhōa i choân-pō͘ ê kun-tūi, kap i só͘ thóng-tī sè-kài ê ta̍k-kok ta̍k-cho̍k, lâi kong-táⁿ Iâ-lō͘-sat-léng kap hù-kūn ê siâⁿ-tìn. Hit-sî, Siōng Chú tùi Iâ-lī-bí kóng,

2“Góa Siōng Chú — Í-sek-lia̍t ê Siōng-tè hoan-hù lí tio̍h khì kā Iû-tāi-ông Se-tí-ka án-ni kóng: Siōng Chú beh kā chit-ê siâⁿ kau hō͘ Pa-pí-lûn-ông, i ōe kā i pàng-hé sio.

3Lí bô hoat-tō͘ thoat-lī i ê chhiú-thâu, it-tēng ōe hō͘ lâng lia̍h-khì kau hō͘ i. Lí ōe hō͘ i tng-bīn sím-mn̄g, hō͘ i lia̍h-khì Pa-pí-lûn.

4Iû-tāi-ông Se-tí-ka, lí tio̍h chù-ì thiaⁿ góa ê ōe. Siōng Chú án-ni kā lí kóng: Lí bōe hō͘ lâng thâi-sí,

5ōe pêng-an sí. Lí sí-liáu, lâng ōe chhin-chhiūⁿ teh kā lí ê chó͘-sian í-chêng ê ông sio-hiuⁿ án-ni, kā lí sio-hiuⁿ. In ōe kā lí chhiùⁿ ai-ko, kóng, ‘Ài ah, goán ê ông!’ Siōng Chú án-ni soan-kò.”

6Sian-ti Iâ-lī-bí chiū chiong chiah-ê ōe kā tī Iâ-lō͘-sat-léng ê Iû-tāi-ông Se-tí-ka kóng.

7Hit-sî, Pa-pí-lûn-ông ê kun-tūi í-keng teh kong-táⁿ Iâ-lō͘-sat-léng kap Iû-tāi ê siâⁿ La-kiat kap A-se-ka; Iû-tāi kian-kò͘ ê siâⁿ chí-ū chhun chit nn̄g ê.

Ûi-pōe Kái-hòng Lô͘-lē ê Iok

8 Se-tí-ka-ông ū kap Iâ-lō͘-sat-léng ê jîn-bîn li̍p-iok, beh kā lô͘-lē soan-pò͘ chū-iû,

9ta̍k-ê lâng tháu-pàng Hi-pek-lâi lâm-lú lô͘-lē, bô koh ū lâng ēng tông-pau Iû-tāi-lâng chòe lô͘-lē.

10Hiah-ê ū chham-ú chit-ê iok ê léng-siù kap jîn-bîn chiū tháu-pàng in ê lâm-lú lô͘-lē, hō͘ in tit-tio̍h chū-iû, bô koh ēng in chòe lô͘-lē; hiah-ê léng-siù kap jîn-bîn lóng tông-ì, tháu-pàng lâm-lú lô͘-lē.

11M̄-kú, āu-lâi in hō͘-hóe, kiò in só͘ tháu-pàng ê lâm-lú lô͘-lē lóng tò--lâi, kiông-pek in koh chòe lô͘-lē.

12Siōng Chú chiū hoan-hù Iâ-lī-bí tùi Í-sek-lia̍t-lâng kóng,

13“Siōng Chú — Í-sek-lia̍t ê Siōng-tè án-ni kóng: Góa kā lín ê chó͘-sian tùi Ai-ki̍p chòe lô͘-lē ê tōe chhōa--chhut-lâi ê sî, ū kap in li̍p-iok, hoan-hù in,

14‘Lín bóe--lâi ê Hi-pek-lâi tông-pau ho̍k-sāi lín la̍k nî liáu-āu, kàu tē-chhit nî, lín ta̍k-ê lâng tio̍h kā in tháu-pàng, hō͘ in chū-iû lī-khui.’ M̄-kú lín ê chó͘-sian lóng bô thiaⁿ, bô sūn-thàn góa.

15Chòe-kūn, lín ū kái-piàn sim-ì, chòe góa khòaⁿ-chòe chèng-ti̍t ê sū, ta̍k-ê lâng tī kèng-pài góa ê sèng-tiān, tī góa ê bīn-chêng li̍p-iok, kā lín ê tông-pau soan-pò͘ chū-iû.

16M̄-kú lín soah hō͘-hóe, kèng-jiân kā lín tháu-pàng ê lâm-lú lô͘-lē kiò--tò-lâi, kiông-pek in koh chòe lô͘-lē, siat-to̍k góa ê miâ.

17Só͘-í, góa Siōng Chú án-ni kóng: Lín kì-jiân bô beh sūn-thàn góa, bô kā lín chòe lô͘-lē ê tông-pau, chhù-piⁿ soan-pò͘ chū-iû, án-ni, góa beh pàng lín hō͘ chiàn-loān, un-e̍k, ki-hng thún-ta̍h, hō͘ lia̍t-kok ê lâng khòaⁿ-tio̍h lín ê cho-gū kám-kak tio̍h-kiaⁿ. Siōng Chú án-ni soan-kò.

18-19Iû-tāi kap Iâ-lō͘-sat-léng ê léng-siù, koaⁿ-oân, chè-si, í-ki̍p só͘-ū ê jîn-bîn kap góa li̍p-iok; in chiong sòe-chiah gû phòa-chòe nn̄g pêng, tùi nn̄g pêng ê tiong-ng kiâⁿ--kè, m̄-kú in ûi-pōe chit-ê iok, bô chun-siú iok ê kui-tēng. Só͘-í, góa beh hō͘ in chhin-chhiūⁿ sòe-chiah gû siū phòa-khui.

20Góa beh kā in kau hō͘ in ê tùi-te̍k kap siàu-siūⁿ in sìⁿ-miā ê lâng. In ê sin-si ōe chiâⁿ-chòe khong-tiong pe-chiáu kap tōe-chiūⁿ iá-siù ê chia̍h-mi̍h.

21Góa mā beh chiong Iû-tāi-ông Se-tí-ka kap i ê jîn-sîn kau hō͘ in ê tùi-te̍k kap siàu-siūⁿ in sìⁿ-miā ê lâng, í-ki̍p chiām-sî thiat-thè ê Pa-pí-lûn kun-tūi.

22Góa beh bēng-lēng Pa-pí-lûn ê kun-tūi koh tò-lâi kong-táⁿ chit-ê siâⁿ, kā i kong-chiàm, pàng-hé sio; góa beh hō͘ Iû-tāi ê siâⁿ-tìn pha-hng, bô lâng tòa. Siōng Chú án-ni soan-kò.”

Iâ-lī-bí-su 34 - 現代台語譯本羅馬字版(TTVR)-闽南语

Learn More About Us