Si-phian 89

Si-phian 89 - 現代台語譯本羅馬字版(TTVR)-闽南语

Í-su-la-lâng Í-thàm kà-sī ê si.Ūi Biān-lîm Chai-lān ê Kok-ka Kî-tó

1Góa beh éng-oán chhiùⁿ-koa chheng-chàn Siōng Chú ê chû-ài,

beh sè-sè-tāi-tāi soan-iông lí ê sìn-si̍t.

2Góa bat kóng, “Lí ê chû-ài éng-oán kian-li̍p;

lí ê sìn-si̍t chhin-chhiūⁿ thiⁿ bōe tōng-iâu.”

3Lí ū kóng, “Góa kap góa kéng-soán ê lâng li̍p-iok,

tùi góa ê po̍k-jîn Tāi-pi̍t soan-sè,

4‘Góa beh kiàn-li̍p lí ê hō͘-tāi kàu éng-oán,

kian-kò͘ lí ê pó-chō kàu bān-tāi.’”

5Siōng Chú ah, goān thiⁿ chheng-chàn lí kî-biāu ê chok-ûi,

thiⁿ-sài tī chū-hōe tiong siōng-chàn lí ê sìn-si̍t.

6Tī khong-tiong tó chi̍t ê ōe-pí-tit Siōng Chú?

Chèng sîn-bêng tiong tó chi̍t ê ōe chhin-chhiūⁿ Siōng Chú?

7I tī thiⁿ-sài ê gī-hōe tiong sī ū tōa ui-giâm ê Siōng-tè,

pí it-chhè tī I sì-ûi ê sîn-bêng koh-khah thang kiaⁿ-ùi.

8Siōng Chú — Bān-kun ê Thóng-sòe Siōng-tè ah,

lí ê tōa koân-lêng tó chi̍t ê ōe-tàng kap lí pí?

Lí tī ta̍k-hāng tāi-chì lóng hián-chhut sìn-si̍t.

9Hái-chúi tiòng-koân, lí kā i koán-chè;

hái-éng giâ--khí-lâi, lí hō͘ i pêng-chēng.

10Lí chi̍t-ē-chhiú chiū phah-chhùi hái-koài La-hap-pek;

lí ēng tōa khùi-la̍t ê chhiú phah-sòaⁿ tùi-te̍k.

11Thiⁿ sio̍k lí, tōe mā lí ê;

sè-kài kap bān-mi̍h lóng sī lí só͘ kiàn-li̍p.

12Lâm kap pak sī lí só͘ chhòng-chō;

Tha-po̍k-soaⁿ kap Hek-bûn-soaⁿ lóng hoaⁿ-hí chheng-chàn lí ê miâ.

13Lí ê chhiú-kut ū koân-lêng;

lí ê chhiú ū la̍t, lí ê chiàⁿ-chhiú gia̍h-koân-koân.

14Kong-gī kap chèng-ti̍t sī lí pó-chō ê tōe-ki;

chû-ài kap sìn-si̍t kiâⁿ tī lí bīn-chêng.

15Ōe-hiáu tùi lí hoan-ho͘ ê lâng chin ū hok-khì!

Siōng Chú ah, in beh tè lí ê bīn hoat-chhut ê kng lâi kiâⁿ.

16In kui-ji̍t in-ūi lí ê miâ hoaⁿ-hí,

in-ūi lí ê kong-gī khoài-lo̍k.

17Lí sī in kî-biāu ê khùi-la̍t;

in-ūi lí ê un-tián, goán ōe tit-tio̍h sèng-lī.

18Siōng Chú sī goán ê pó-hō͘-chiá;

Í-sek-lia̍t sîn-sèng ê Siōng-tè sī goán ê Kun-ông.

Siōng-tè tùi Tāi-pi̍t ê Èng-ún

19Lí chá bat tī īⁿ-siōng tiong tùi lí tiong-si̍t ê chú-bîn kóng,

“Góa ū ēng hoa-koan tì tī ióng-sū ê thâu-khak;

góa tùi chú-bîn tiong kéng-soán i, ko-seng i.

20Góa chhē-tio̍h góa ê po̍k-jîn Tāi-pi̍t,

ēng sèng-iû boah i.

21Góa ê chhiú beh chi-chhî i;

góa ê chhiú-kut beh sù i khùi-la̍t.

22Tùi-te̍k bô hoat-tō͘ ēng kè-tì iâⁿ-kè i;

hiong-ok ê lâng bô hoat-tō͘ khún-pek i.

23Góa beh tī i ê bīn-chêng phah-chhùi i ê tùi-te̍k,

phah-pāi hiah-ê oàn-hūn i ê lâng.

24Góa ê sìn-si̍t kap góa ê chû-ài beh kap i tông-chāi,

in-ūi góa ê miâ, i ōe tit-tio̍h sèng-lī.

25Góa beh hō͘ i ê chhiú chhun kàu Tōe-tiong-hái,

i ê chiàⁿ-chhiú chhun kàu Iù-hoat-la-tí-hô.

26I beh tùi góa kóng, ‘Lí sī góa ê Pē, góa ê Siōng-tè,

sī chín-kiù góa ê chio̍h-pôaⁿ.’

27Góa beh siat-li̍p i chòe tōa-kiáⁿ,

chòe sè-chiūⁿ siōng-tōa ê kun-ông.

28Góa beh tùi i chhî-siú chû-ài kàu éng-oán;

góa kap i só͘ li̍p ê iok it-tēng bōe kái-piàn.

29Góa beh pó-siú i ê hō͘-tāi kàu éng-oán,

hō͘ i ê pó-chō chhin-chhiūⁿ thiⁿ hiah-ni̍h kú-tn̂g.

30“I ê kiáⁿ-sun nā khì-sak góa ê Lu̍t-hoat,

bô chun-siú góa ê bēng-lēng,

31ûi-pōe góa ê kui-lē,

bô chun-hêng góa ê kài-bēng,

32góa beh ēng koáiⁿ-á hêng-hoa̍t in ê kè-sit,

ēng piⁿ chhú-hoa̍t in ê chōe-ok.

33Chóng-sī góa it-tēng bōe tùi i siu-hôe góa lóng-chóng ê chû-ài,

mā bōe ûi-pōe góa ê sìn-si̍t.

34Góa it-tēng bōe ûi-hoán góa ê iok,

mā bōe kái-piàn góa kóng ê ōe.

35“Góa kí ka-kī ê sèng-kiat kian-koat li̍p-sè,

choa̍t-tùi bōe tùi Tāi-pi̍t kóng pe̍h-chha̍t.

36I ê hō͘-tāi ōe thoân kàu éng-oán,

i ê pó-chō tī góa ê bīn-chêng chhin-chhiūⁿ ji̍t-thâu hiah-ni̍h kú-tn̂g;

37chhin-chhiūⁿ ge̍h éng-oán ún-kò͘,

tī thiⁿ-téng choh khak-si̍t ê kiàn-chèng.”

Ūi Kun-ông Chiàn-pāi Ai-siong

38Chóng-sī lí ū tùi lí boah-iû soán-li̍p--ê hoat siū-khì,

kā i kū-choa̍t khì-sak.

39Lí hòe-tû kap lí ê po̍k-jîn só͘ li̍p ê iok,

chiong i ê hoa-koan tàn tī thô͘-kha thún-ta̍h.

40Lí thiah-húi i só͘-ū ê siâⁿ-chhiûⁿ,

hō͘ i ê pó-lúi pìⁿ-chòe pha-hng ê só͘-chāi.

41Kè-lō͘-lâng lóng kā i chhiúⁿ-toa̍t;

keh-piah-kok lóng kā i lêng-jio̍k.

42Lí hō͘ i tùi-te̍k ê chiàⁿ-chhiú gia̍h-koân,

hō͘ in lóng hoaⁿ-hí.

43Lí hō͘ i ê to-kiàm tun--khì bōe-tàng ēng,

hō͘ i tī kau-chiàn ê sî chiàn-pāi.

44Lí chiong i koân-pèng ê koáiⁿ chhiúⁿ--khí-lâi,

chiong i ê pó-chō chhia-tó tī tōe--ni̍h.

45Lí kiám-chió i siàu-liân ê ji̍t-chí,

hō͘ i tōa-tōa kiàn-siàu.

Khún-kiû Siōng-tè Chín-kiù

46Siōng Chú ah, lí beh bih jōa kú, kàu éng-oán sī--bô?

Lí chhin-chhiūⁿ hé to̍h teh siū-khì beh jōa kú?

47Kiû lí tài-liām góa ê sìⁿ-miā hiah-ni̍h té,

lí chhòng-chō ê sè-kan-lâng hiah-ni̍h khang-hu!

48Siáⁿ-lâng ōe-tàng kú-tn̂g oa̍h--teh, bô kìⁿ-tio̍h sí,

ōe kiù ka-kī ê sìⁿ-miā thoat-lī Im-hú ê koân-sè?

49Chú ah, lí í-chêng ê chû-ài tī tó-ūi?

Lí tùi Tāi-pi̍t li̍p-sè èng-ún ê sìn-si̍t tī tó-ūi?

50Chú ah, kiû lí ōe-kì-tit lí ê po̍k-jîn só͘ siū ê lêng-jio̍k,

ōe-kì-tit góa ê sim án-chóaⁿ sêng-siū lia̍t-kok ê bú-jio̍k.

51Siōng Chú ah, lí ê tùi-te̍k án-ni teh bú-jio̍k lí ê po̍k-jîn;

lí boah-iû kéng-soán--ê kiâⁿ kàu tó-ūi, in lóng tè teh kā i lêng-jio̍k.

52Goān chheng-chàn kui hō͘ Siōng Chú kàu éng-oán!

Amen! Amen!

Si-phian 89 - 現代台語譯本羅馬字版(TTVR)-闽南语

Learn More About Us