Í-sài-a-su 13

Í-sài-a-su 13 - 現代台語譯本羅馬字版(TTVR)-闽南语

Siōng-tè Beh Chhú-hoa̍t Pa-pí-lûn

1Che sī A-mô͘-su ê kiáⁿ Í-sài-a tùi Siōng-tè só͘ niá-siū iú-koan Pa-pí-lûn ê sìn-sit.

2Tio̍h tī kng-thut-thut ê soaⁿ-téng chhāi chi̍t ki tōa-kî,

tùi chiàn-sū hoat hō-lēng;

tio̍h kā in ia̍t-chhiú,

hō͘ in chìn-ji̍p kùi-cho̍k ê mn̂g.

3Góa ū bēng-lēng te̍k-pia̍t kéng--chhut-lâi ê lâng,

ū soán-tiàu iāu-bú-iông-ui ê ióng-sū,

lâi chip-hêng góa ê siū-khì.

4Thiaⁿ leh, soaⁿ-téng ū soan-hoa ê siaⁿ,

ná-chhin-chhiūⁿ chi̍t tōa-tūi kun-peng teh chū-chi̍p!

Thiaⁿ leh, ū bān-kok chi̍p-ha̍p chháu-nāu ê siaⁿ!

Siōng Chú — Bān-kun ê Thóng-sòe teh tiàu-chi̍p kun-tūi pī-chiàn.

5In tùi iâu-oán ê só͘-chāi,

tùi tōe ê hit-pêng lâi;

in sī Siōng Chú siū-khì ēng ê bú-khì,

beh húi-hoāi choân-tōe.

6Lín tio̍h tōa-siaⁿ ai-khàu, in-ūi Siōng Chú ê ji̍t kūn lah;

Choân-lêng-chiá si-hêng húi-bia̍t ê sî kàu lah!

7Só͘-ū ê chhiú-kut lóng ōe sng-nńg bô-la̍t,

lâng ê sim ōe siau-iûⁿ sit-táⁿ.

8In lóng ōe hō͘ khióng-hông chhiong-móa,

hō͘ thàng-thiàⁿ kan-khó͘ khîⁿ--teh.

In ōe chhin-chhiūⁿ sán-hū chhui-chūn, kiáu-ká thàng-thiàⁿ,

in-ūi khióng-pò͘ gông-ngia̍h, hō͘-siōng siòng-lâi-siòng-khì;

in lóng kiaⁿ kah bīn chhiⁿ-sún-sún.

9Khòaⁿ leh, Siōng Chú ê ji̍t teh-beh kàu ah!

Ū chân-khok, hùn-lō͘, kap tōa siū-khì,

beh hō͘ tāi-tōe hong-hòe,

hō͘ tōe-chiūⁿ ê chōe-jîn siū húi-bia̍t.

10Thiⁿ-téng ê chhiⁿ-sîn thian-thé lóng bōe hoat-kng.

Ji̍t-thâu chi̍t-ē chhut--lâi sûi-sî pìⁿ o͘-àm,

ge̍h-niû mā àm-tām bô kng.

11Siōng Chú kóng,

“Góa beh in-ūi lâng ê siâ-ok hêng-hoa̍t sè-kài,

in-ūi in ê chōe-ok kā in chhú-hoa̍t.

Góa beh chiong-chí kiau-ngō͘ ê lâng ê chū-ko,

beh chè-ho̍k pō-kun ê chhiong-kông.

12Góa ōe hō͘ lâng pí siōng-téng ê kim khah chió,

pí Gô-hui ê sûn-kim koh-khah hi-hán.

13Góa Siōng Chú — Bān-kun ê Thóng-sòe hùn-lō͘ ê sî,

hoat tōa siū-khì hit-ji̍t,

beh hō͘ thiⁿ iô-choah,

hō͘ tāi-tōe tín-tāng, lī-khui goân-ūi.

14“Hit-sî, in ōe chhin-chhiūⁿ siū tui-kóaⁿ ê lo̍k-á,

chhin-chhiūⁿ bô bo̍k-chiá khòaⁿ-kò͘ ê iûⁿ,

múi chi̍t ê lâng lóng ōe tńg-khì ka-kī ê tông-pau hia,

ta̍k-ê lâng tô-cháu tńg-khì ka-kī ê kò͘-hiong.

15Hō͘ lâng jip--tio̍h-ê, ōe hō͘ chhiuⁿ chha̍k--sí;

hō͘ lâng lia̍h--tio̍h-ê, ōe hō͘ to thâi--sí.

16In ê eⁿ-á ōe tī in bīn-chêng

hō͘ lâng siak kah chhùi-kô͘-kô͘.

In ê chhù ōe hō͘ lâng chhiúⁿ-kiap;

in ê bó͘ siū bú-jio̍k.

17“Khòaⁿ leh, góa beh siàn-tōng Bí-tí-a

-lâng khí-lâi kong-kek in;

Bí-tí-a-lâng bô khòaⁿ-tāng gûn, mā bô ài kim.

18In ê keng-chìⁿ ōe siā-tó siàu-liân-lâng;

in bōe lîn-bín pak-tó͘ lāi ê eⁿ-á,

mā bōe pó-sioh gín-á ê sìⁿ-miā.

19 Pa-pí-lûn goân-pún sī lia̍t-kok ê êng-kng,

Ka-le̍k-tí-lâng khoa-kháu ê êng-iāu,

m̄-kú in ōe hō͘ Siōng-tè chhia-tó,

tú chhin-chhiūⁿ Só͘-to-má kap Gô-mô͘-la siū húi-bia̍t.

20 Pa-pí-lûn bōe koh ū lâng tòa,

tāi-tāi bōe koh ū lâng khiā-khí.

Bô-pòaⁿ-ê A-la-pek-lâng ōe tī hia tah pò͘-pîⁿ,

kò͘-iûⁿ--ê mā bōe chhōa iûⁿ-kûn khì hia hioh-khùn.

21M̄-kú, khòng-iá ê cháu-siù ōe lâi tó tī hia,

tī hia ê chhù ū chin chōe àm-kong-chiáu.

Tô-chiáu ōe tī hia choh-siū,

iá-soaⁿ-iûⁿ tī hia thiàu-bú.

22Chhâi-lông ōe tī in ê pó-lúi kho͘-káu-lê,

in chhia-hoa ê kiong-tiān ū chhâi-lông teh háu.

Pa-pí-lûn ê kiat-kio̍k í-keng pek-kūn;

i bia̍t-bông ê ji̍t bōe koh iân-tî!

I ê ji̍t bô kú lah!”

Í-sài-a-su 13 - 現代台語譯本羅馬字版(TTVR)-闽南语

Learn More About Us