Nî-hi-bí-kì 4

Nî-hi-bí-kì 4 - 現代台語譯本羅馬字版(TTVR)-闽南语

Nî-hi-bí Khek-ho̍k Chó͘-tòng

1 Chham-pa-la thiaⁿ-kìⁿ goán teh tiông-kiàn siâⁿ-chhiûⁿ, chiū chin siū-khì, hui-siông hùn-lō͘, thí-chhiò Iû-thài-lâng,

2tī i ê tâng-phōaⁿ kap Sat-má-lī-a ê kun-peng bīn-chêng kóng, “Chiah-ê bô lō͘-ēng ê Iû-thài-lâng teh chòe sím-mi̍h? In beh tiông-kiàn chit-ê siâⁿ o͘h? Beh hiàn-chè o͘h? Beh chi̍t ji̍t chiū oân-sêng o͘h? Beh tùi thô͘-tui tiong the̍h-chhut sio--kè ê chio̍h-thâu lâi koh khí o͘h?”

3 A-bûn-lâng To-pí-ngá khiā tī i ê sin-piⁿ kóng, “In só͘ khí ê chio̍h-chhiûⁿ, nā ū chi̍t chiah hô͘-lî peh--khí-khì, chiū ōe pang--lo̍h-khì.”

4Góa kî-tó kóng, “Goán ê Siōng-tè, kiû lí thiaⁿ, in-ūi goán hō͘ lâng thí-chhiò, kiû lí hō͘ in tùi goán ê bú-jio̍k kui tī in sin-chiūⁿ, hō͘ in chiâⁿ-chòe chiàn-lī-phín siū-lia̍h khì gōa-kok;

5kiû lí m̄-thang jia-khàm in ê chōe, m̄-thang chhat-siau in tī lí bīn-chêng só͘ hoān ê chōe-kò; in-ūi in bú-jio̍k chiah-ê tiông-kiàn ê lâng.”

6Án-ni, goán kè-sio̍k tiông-kiàn siâⁿ-chhiûⁿ; bô-jōa-kú, siâⁿ-chhiûⁿ chiū lóng chiap chòe-hé, kàu chi̍t-pòaⁿ koân, in-ūi jîn-bîn choan-sim chòe kang.

7 Chham-pa-la, To-pí-ngá, A-la-pek-lâng, A-bûn-lâng, A-si̍t-tu̍t-lâng, thiaⁿ-kìⁿ tiông-kiàn Iâ-lō͘-sat-léng siâⁿ-chhiûⁿ ê kang-thêng sūn-lī chìn-hêng, khai-sí siu-pó͘ phòa-khiah ê só͘-chāi, chiū chin siū-khì;

8tāi-ke chòe-hé kè-bô͘ beh kong-kek Iâ-lō͘-sat-léng, chè-chō hūn-loān.

9Goán ǹg goán ê Siōng-tè kî-tó, koh in-ūi in ê iân-kò͘, phài lâng siú-bōng, mî-ji̍t hông-pī.

10M̄-kú Iû-thài-lâng kóng:

Choh-kang ê lâng khùi-la̍t chīn,

chio̍h-thâu thô͘-soa kui tōa-tui,

siâⁿ-chhiûⁿ oân-kang kàu hô-sî?

11Goán ê tùi-te̍k koh kóng, “Thàn in m̄ chai, khòaⁿ bōe tio̍h ê sî, lán ji̍p-khì in tiong-kan, thâi-sí in, hō͘ in ê kang-thêng thêng-chí.”

12Hiah-ê tòa tī tùi-te̍k hù-kūn ê Iû-thài-lâng, chi̍t-piàn koh chi̍t-piàn kā goán kéng-kò, kóng, “Tùi-te̍k ōe tùi ta̍k só͘-chāi lâi kong-kek lín.”

13Só͘-í góa hō͘ jîn-bîn chiàu in ka-kī ê chong-cho̍k gia̍h to, gia̍h chhiuⁿ, gia̍h keng, khiā tī siâⁿ-chhiûⁿ āu-bīn kē koh khòng-khoah ê só͘-chāi.

14Góa sûn-sī liáu, chiū khí-lâi tùi kùi-cho̍k, koaⁿ-tiúⁿ, kap kî-tha ê jîn-bîn kóng, “M̄-bián kiaⁿ in! Tio̍h ōe-kì-tit Chú sī chì-tōa thang kiaⁿ-ùi ê Siōng-tè; tio̍h ūi-tio̍h lín ê tông-pau, lín ê kiáⁿ, cha-bó͘-kiáⁿ, lín ê bó͘, lín ê chhù-the̍h kau-chiàn.”

15Tùi-te̍k thiaⁿ-kìⁿ goán í-keng chai in ê kè-bô͘, koh Siōng-tè mā phò-hoāi in ê kè-bô͘, chiū bô lâi kong-kek goán, goán chiū lóng tò-tńg-lâi siâⁿ-chhiûⁿ hia, ta̍k-ê lâng kè-sio̍k chòe ka-kī ê kang-chok.

16Tùi hit-ji̍t khí, góa ê pō͘-hā chi̍t-pòaⁿ ê lâng chòe kang, chi̍t-pòaⁿ gia̍h chhiuⁿ, the̍h tún-pâi, gia̍h keng, chhēng chiàn-kah; koaⁿ-tiúⁿ lóng choân-le̍k chi-chhî hiah-ê tiông-kiàn siâⁿ-chhiûⁿ ê Iû-thài chèng-lâng.

17Taⁿ mi̍h-kiāⁿ--ê, chi̍t-chhiú chòe kang, chi̍t-chhiú gia̍h bú-khì.

18Kiàn-chō ê lâng, ta̍k-ê phāiⁿ to chiàu-siông kang-chok; pûn lat-pah--ê tī góa ê sin-piⁿ.

19Góa kā chiah-ê kùi-cho̍k, koaⁿ-tiúⁿ, kap kî-tha ê jîn-bîn kóng, “Chit-ê kang-thêng chin tōa, lán tī siâⁿ-chhiûⁿ téng hun-khui chin hn̄g;

20lín bô-lūn tī tó-ūi thiaⁿ-tio̍h lat-pah ê siaⁿ, tio̍h sûi-sî chū-chi̍p lâi goán chia; lán ê Siōng-tè beh ūi lán kau-chiàn.”

21Ta̍k-ji̍t tùi thiⁿ phú-kng kàu chhiⁿ chhut-hiān ê sî, goán chi̍t-pòaⁿ ê lâng chòe kang, chi̍t-pòaⁿ ê lâng gia̍h chhiuⁿ siú-ōe.

22Hit-sî, góa koh tùi jîn-bîn kóng, “Ta̍k-ê lâng kap i ê po̍k-jîn tio̍h tī Iâ-lō͘-sat-léng siâⁿ-lāi hioh-mî, thang mî--sî khiā ōe-peng, ji̍t--sî chòe kang.”

23Án-ni, góa kap góa ê chhin-cho̍k, pō͘-hā, kap ōe-peng, bô chi̍t ê thǹg-saⁿ khùn; ta̍k-ê lâng khì chhiūⁿ-chúi mā lóng gia̍h bú-khì.

Nî-hi-bí-kì 4 - 現代台語譯本羅馬字版(TTVR)-闽南语

Learn More About Us