Sū-su-kì 12

Sū-su-kì 12 - 現代台語譯本羅馬字版(TTVR)-闽南语

Iâ-hut-tha kap Í-hoat-liân-lâng

1 Í-hoat-liân-lâng tī Sat-hun chū-chi̍p, tùi Iâ-hut-tha kóng, “Lí khì kap A-bûn-lâng kau-chiàn, sī-án-chóaⁿ bô tiàu-chi̍p goán chham-ka? Goán beh ēng hé sio lí kap lí ê chhù.”

2 Iâ-hut-tha kā in kóng, “Góa kap góa ê kun-peng kap A-bûn-lâng tōa kau-chiàn ê sî, góa chio lín lâi, lín m̄-khéng lâi kiù góa thoat-lī in ê chhiú;

3góa khòaⁿ-tio̍h lín bô lâi kiù góa, chiū piàⁿ-miā chìn-chêng kong-kek A-bûn-lâng; Siōng Chú chiong in kau tī góa ê chhiú. Kin-á-ji̍t lín sī-án-chóaⁿ lâi beh kong-kek góa?”

4Iâ-hut-tha chiū tiàu-chi̍p Ki-lia̍t ê kun-peng kap Í-hoat-liân-lâng kau-chiàn. Ki-lia̍t-lâng phah-pāi Í-hoat-liân-lâng. Í-hoat-liân-lâng bat kóng, “Lín Ki-lia̍t-lâng tī Í-hoat-liân kap Má-ná-se ê tiong-kan, sī Í-hoat-liân ê tô-peng.”

5Ki-lia̍t-lâng kò͘-siú Iok-tàn-hô ê tō͘-kháu, m̄ hō͘ Í-hoat-liân-lâng kè--khì; tô-cháu ê Í-hoat-liân-lâng nā kóng, “Chhiáⁿ hō͘ goán kè--khì.” Ki-lia̍t-lâng chiū mn̄g i kóng, “Lí kiám sī Í-hoat-liân-lâng?”

6I nā kóng, “M̄-sī.” In chiū kiò i kóng Sī-pò͘-lia̍t; i ōe kóng chòe Se-pò͘-lia̍t, in-ūi Í-hoat-liân-lâng ê hoat-im kóng bōe chiàⁿ; Ki-lia̍t-lâng chiū lia̍h i, tī Iok-tàn-hô ê tō͘-kháu kā i thâi-sí. Hit-sî ū sì-bān nn̄g-chheng ê Í-hoat-liân-lâng siū thâi-sí.

7 Iâ-hut-tha chòe Í-sek-lia̍t ê sū-su la̍k nî. Ki-lia̍t-lâng Iâ-hut-tha sí, lâng kā i an-chòng tī Ki-lia̍t ê chi̍t chō siâⁿ.

Í-pí-chàn, Í-lûn, A-pek-tùn

8 Iâ-hut-tha sí liáu-āu, Pek-lī-hêng-lâng Í-pí-chàn chòe Í-sek-lia̍t ê sū-su.

9I ū saⁿ-cha̍p ê kiáⁿ, saⁿ-cha̍p ê cha-bó͘-kiáⁿ; i chiong cha-bó͘-kiáⁿ kè hō͘ pa̍t-ê chong-cho̍k, mā ūi-tio̍h i ê hāu-siⁿ tùi pa̍t-ê chong-cho̍k chhōa saⁿ-cha̍p ê sin-pū. I chòe Í-sek-lia̍t ê sū-su chhit nî.

10Í-pí-chàn sí, lâng kā i an-chòng tī Pek-lī-hêng.

11 Í-pí-chàn sí liáu-āu, Se-pò͘-lûn chi-cho̍k ê lâng Í-lûn chòe Í-sek-lia̍t ê sū-su cha̍p nî.

12Í-lûn sí, lâng kā i an-chòng tī Se-pò͘-lûn tōe-khu ê A-ngá-lûn.

13 Í-lûn sí liáu-āu, Pí-la-tùn-lâng Hi-lia̍t ê kiáⁿ A-pek-tùn chòe Í-sek-lia̍t ê sū-su.

14I ū sì-cha̍p ê kiáⁿ, saⁿ-cha̍p ê sun; in khiâ chhit-cha̍p chiah lû-á. I chòe Í-sek-lia̍t ê sū-su poeh nî.

15Pí-la-tùn-lâng Hi-lia̍t ê kiáⁿ A-pek-tùn sí, lâng kā i an-chòng tī A-má-le̍k-lâng ê soaⁿ-tōe, Í-hoat-liân tōe-khu ê Pí-la-tùn.

Sū-su-kì 12 - 現代台語譯本羅馬字版(TTVR)-闽南语

Learn More About Us