Tān-í-lí-su 1

Tān-í-lí-su 1 - 現代台語譯本羅馬字版(TTVR)-闽南语

Tān-í-lí kap I ê Pêng-iú(1.1-6.28)Tān-í-lí tī Nî-pò͘-kah-nî-sat ê Ông-kiong

1 Iû-tāi-ông Iok-ngá-kèng chē-ūi tē-saⁿ nî, Pa-pí-lûn-ông Nî-pò͘-kah-nî-sat lâi ûi-kong Iâ-lō͘-sat-léng.

2Chú chiong Iok-ngá-kèng kap Siōng-tè sèng-tiān lāi-bīn chi̍t-pō͘-hūn ê khì-khū kau tī i ê chhiú. Nî-pò͘-kah-nî-sat chiong hu-ló͘ tòa-khì Pa-pí-lûn ê sîn-biō, kā hiah-ê khì-khū siu ji̍p-khì sîn-biō ê khò͘-pâng.

3 Nî-pò͘-kah-nî-sat-ông bēng-lēng thài-kàm chóng-koán A-si-pí-ná, tùi Í-sek-lia̍t ê ông-sek kap kùi-cho̍k ê kiáⁿ-sun soán chi̍t-kóa siàu-liân-lâng;

4in tio̍h seng-khu kiān-choân, eng-chùn, phok-ha̍k, ū tì-hūi, thong-ta̍t-sū-lí, thang lâi ông-kiong sū-hāu. A-si-pí-ná kā in kà Pa-pí-lûn ê gú-giân kap bûn-ha̍k.

5Ông koh hoan-hù, chiong kiong-lāi ê chia̍h-mi̍h kap chiú ta̍k-ji̍t chiàu hūn-liōng hō͘ in chia̍h; án-ni kā in chai-pôe saⁿ nî kú, hō͘ in kî-móa liáu-āu, ōe-tàng sū-hāu ông.

6Chiah-ê chheng-liân tiong-kan ū Iû-tāi chi-cho̍k ê Tān-í-lí, Hap-ná-nî-ngá, Bí-sa-lī, kap A-sat-lī-ngá.

7Thài-kàm chóng-koán kā in hō sin ê miâ: Kā Tān-í-lí hō-chòe Pek-thê-sa-sat, Hap-ná-nî-ngá hō-chòe Sa-tek-la, Bí-sa-lī hō-chòe Bí-sa, A-sat-lī-ngá hō-chòe A-pek-nî-ko.

8 Tān-í-lí koat-sim m̄ chia̍h ông-kiong ê chia̍h-mi̍h kap chiú, chiah bián chia̍h chiah-ê mi̍h-kiāⁿ kā ka-kī phah lâ-sâm. I chiū chhéng-kiû thài-kàm chóng-koán ún-chún, bô hō͘ i phah lâ-sâm ka-kī.

9Siōng-tè hō͘ Tān-í-lí tit-tio̍h thài-kàm chóng-koán ê lîn-bín kap hó khoán-thāi.

10Thài-kàm chóng-koán tùi Tān-í-lí kóng, “Góa kiaⁿ góa ê chú góa ê ông. I í-keng chí-tēng lín tio̍h chia̍h chiah-ê chia̍h-mi̍h; bān-it i khòaⁿ-tio̍h lí pí kî-tha ê siàu-liân-lâng khah siau-sán pháiⁿ-khòaⁿ, lí ōe hāi góa hō͘ ông chām-thâu.”

11 Tān-í-lí tùi thài-kàm chóng-koán phài-lâi kàm-hō͘ i, Hap-ná-nî-ngá, Bí-sa-lī, A-sat-lī-ngá ê lâng kóng,

12“Chhiáⁿ hō͘ lí ê po̍k-jîn cha̍p ji̍t ê sî-kan, goán chit kúi ê kan-ta chia̍h-chhài lim-chúi.

13Cha̍p ji̍t āu, chhiáⁿ lí chiong goán ê bīn-iông kap hiah-ê chia̍h ông-kiong chia̍h-mi̍h ê siàu-liân-lâng ê bīn-iông pí-kàu. Jiân-āu, chiàu lí ê koan-chhat koat-tēng beh án-chóaⁿ kā goán chhú-lí.”

14Kàm-hō͘ ê lâng chiū ún-chún hō͘ in chhì cha̍p ji̍t.

15Cha̍p ji̍t āu, in sì ê lâng pí kî-tha chia̍h ông-kiong chia̍h-mi̍h ê siàu-liân-lâng koh-khah kiān-khong hó-khòaⁿ.

16Kàm-hō͘ ê lâng chiū bô koh hō͘ in chia̍h ông-kiong ê chia̍h-mi̍h kap chiú, chí-ū hō͘ in chia̍h chhiⁿ-chhài.

17Siōng-tè hō͘ chit sì ê siàu-liân-lâng tī bûn-ha̍k kap ha̍k-būn hong-bīn chin ū châi-lêng kap ha̍k-sek, koh hō͘ Tān-í-lí ōe-hiáu bêng-pe̍k ta̍k-chióng īⁿ-siōng kap bîn-bāng.

18 Nî-pò͘-kah-nî-sat-ông kui-tēng só͘-ū ê siàu-liân-lâng tio̍h chìn-kiong ê ji̍t-kî kàu, thài-kàm chóng-koán chiū chhōa in khì kìⁿ ông.

19Ông kap in biān-tâm, hoat-kiàn kî-tha ê lâng bô chi̍t ê kap Tān-í-lí, Hap-ná-nî-ngá, Bí-sa-lī, kap A-sat-lī-ngá ōe-pí--tit, chiū hō͘ in sì ê lâng sū-hāu i.

20Ông kā in mn̄g iú-koan tì-hūi kap kiàn-sek ê sū, chiū chai in pí choân-kok ê su̍t-sū kap kiâⁿ hoat-su̍t--ê khah gâu cha̍p pē.

21 Tān-í-lí kàu Sài-ló͘-sū chē-ūi goân-nî iáu oa̍h--teh.

Tān-í-lí-su 1 - 現代台語譯本羅馬字版(TTVR)-闽南语

Learn More About Us