Iâ-lī-bí-su 30

Iâ-lī-bí-su 30 - 現代台語譯本羅馬字版(TTVR)-闽南语

Siōng Chú kā Chú-bîn Èng-ún

1-2Siōng Chú — Í-sek-lia̍t ê Siōng-tè tùi Iâ-lī-bí án-ni kóng, “Só͘-ū góa tùi lí kóng ê ōe, lí lóng tio̍h siá tī chheh-kǹg.

3Siōng Chú kóng: Sî-ji̍t teh-beh kàu, góa beh hō͘ góa siū-lia̍h ê chú-bîn Í-sek-lia̍t kap Iû-tāi tò-tńg--lâi. Góa beh hō͘ in tò-lâi góa siúⁿ-sù in chó͘-sian ê thó͘-tōe, in chiū tit-tio̍h chit-tè thó͘-tōe chòe sán-gia̍p. Siōng Chú án-ni soan-pò͘.”

4Í-hā sī Siōng Chú chiam-tùi Í-sek-lia̍t kap Iû-tāi kóng ê ōe.

5Siōng Chú án-ni kóng:

Lín ū thiaⁿ-tio̍h khióng-pò͘ ê hoah-siaⁿ;

chí-ū kiaⁿ-hiâⁿ, bô pêng-an.

6Lín ka-kī khì mn̄g khòaⁿ-bāi, tiâu-cha khòaⁿ-bāi,

ta-po͘-lâng kiám ōe siⁿ-kiáⁿ?

Sī-án-chóaⁿ góa khòaⁿ-tio̍h ta̍k-ê ta-po͘-lâng siang-chhiú thìⁿ-io,

chhin-chhiūⁿ teh-beh seng-sán ê cha-bó͘-lâng,

bīn lóng chhiⁿ-sún-sún?

7Chhám ah! Hit-ji̍t sī khióng-pò͘ ê ji̍t-chí,

chêng-kàu-taⁿ m̄-bat ū ê ji̍t-chí,

sī góa ê chú-bîn tú-tio̍h chai-lān ê ji̍t-chí,

m̄-kú in ōe tit-tio̍h kái-kiù, thoat-lī chai-lān.

8Siōng Chú — Bān-kun ê Thóng-sòe án-ni soan-pò͘, “Kàu hit-ji̍t, góa beh kòng-tn̄g góa chú-bîn ām-kún ê taⁿ, chhoah-tn̄g pa̍k in ê soh; in bōe koh chòe gōa-cho̍k-lâng ê lô͘-lē.

9In beh sū-hōng Siōng Chú — in ê Siōng-tè, mā beh ho̍k-sāi góa ūi-tio̍h in heng-khí choh-ông ê Tāi-pi̍t ê kiáⁿ-sun.

10Góa ê po̍k-jîn Ngá-kok, m̄-bián kiaⁿ!

Í-sek-lia̍t, m̄-bián sit-chì!

Góa beh tùi chin hn̄g ê só͘-chāi kái-kiù lí,

tùi lí siū-lia̍h ê tōe kái-kiù lí ê hō͘-tāi;

Ngá-kok ê hō͘-tāi ōe tò-lâi ka-kī ê hiong-thó͘ an-ku-lo̍k-gia̍p,

bô lâng ōe koh hō͘ in kiaⁿ-hiâⁿ.

Siōng Chú án-ni soan-pò͘.

11Góa kap lí tông-chāi, beh kái-kiù lí,

mā beh oân-choân húi-bia̍t góa kóaⁿ lí khì hiah-ê kok-ka.

Góa bōe kā lí oân-choân siau-bia̍t,

m̄-kú bōe-tàng bô hêng-hoa̍t lí;

góa beh chiàu kong-gī koán-kàu lí.”

Siōng Chú án-ni soan-pò͘.

12Siōng Chú tùi Sek-an ê jîn-bîn kóng:

Lí siū ê siong bōe-i--tit,

lí ê khang-chhùi chin siong-tiōng.

13Lí siū siong-hāi, bô lâng thòe lí piān-hō͘;

mā bô io̍h thang kā lí i-tī.

14Lí ê ài-jîn lóng bōe-kì-tit lí,

bōe koh lâi tui-kiû lí.

In-ūi lí ê chōe chin tāng, chōe-ok chin chōe,

góa táⁿ-kek lí chhin-chhiūⁿ tùi-te̍k teh phah lí,

chân-jím hêng-hoa̍t lí.

15Lí sī-án-chóaⁿ in-ūi lí siū ê siong-hāi hoah-hiu,

kóng, lí ê thòng-khó͘ bōe-i--tit?

In-ūi lí ê chōe chin tāng, chōe-ok chin chōe,

góa chiah án-ni tùi-thāi lí.

16Taⁿ, só͘-ū thun-bia̍t lí--ê, beh siū thun-bia̍t,

lí ê tùi-te̍k chi̍t-ê chi̍t-ê lóng beh siū-lia̍h;

lia̍h lí--ê, beh hō͘ lâng lia̍h--khì,

chhiúⁿ lí--ê, beh chiâⁿ-chòe la̍h-bu̍t.

17Sui-jiân lâng lóng kóng, Sek-an sī siū pàng-sak--ê,

bô lâng beh chhap i;

m̄-kú, góa beh i-tī lí ê siong,

hō͘ lí ê khang-chhùi siⁿ-bah kè-phê.

Siōng Chú án-ni soan-pò͘.

18Siōng Chú án-ni kóng:

Khòaⁿ leh, góa beh hō͘ Ngá-kok ê kiáⁿ-sun tò-tńg--lâi,

beh lîn-bín in siū húi-hoāi ê ka-hn̂g;

siâⁿ ōe tī goân-lâi ê thô͘-tui téng-bīn tiông-kiàn,

kiong-tiān koh khí tī goân-lâi ê só͘-chāi.

19Hiah-ê chū-bîn beh hoat-chhut kám-siā hoaⁿ-hí ê siaⁿ;

góa beh hō͘ in ê jîn-kháu ke-thiⁿ, bōe kiám-chió,

hō͘ in ū chun-êng, bōe koh siū khòaⁿ-khin.

20In ê kiáⁿ-sun beh chhin-chhiūⁿ chá-chêng hiah-ni̍h kiông-sēng;

in ê kok-ka ōe siū góa khòaⁿ-kò͘ tit-tio̍h kian-li̍p;

só͘-ū ap-pek in--ê, góa beh kā in hêng-hoa̍t.

21Tī-lí in--ê sī in ka-kī ê lâng,

in ê thóng-tī-chiá sī in ê tông-pau.

Góa beh hō͘ i chhin-kūn góa,

i mā ōe lâi chhin-kūn góa;

nā m̄-sī án-ni, siáⁿ-lâng káⁿ lâi kàu góa bīn-chêng?

Siōng Chú án-ni soan-pò͘.

22Lín beh chòe góa ê chú-bîn,

góa beh chòe lín ê Siōng-tè.

23Khòaⁿ leh, Siōng Chú ê siū-khì chhin-chhiūⁿ pō-hong hoat-chhut, sī húi-bia̍t ê kńg-lê-á-hong, beh siàn pháiⁿ-lâng ê thâu-khak.

24Siōng Chú ê siū-khì bōe siau, ti̍t-kàu I ê kè-ōe oân-sêng; tī chiong-lâi ê ji̍t-chí, lín chiū ōe bêng-pe̍k.

Iâ-lī-bí-su 30 - 現代台語譯本羅馬字版(TTVR)-闽南语

Learn More About Us