Í-se-kiat-su 36

Í-se-kiat-su 36 - 現代台語譯本羅馬字版(TTVR)-闽南语

Siōng-tè Sù-hok Í-sek-lia̍t

1-2Siōng Chú bēng-lēng góa tùi Í-sek-lia̍t ê chèng-soaⁿ thoân-ta̍t I ê sìn-sit, chiong Chì-koân Siōng Chú ê ōe kā in kóng. Siōng Chú kóng, “Jîn-chú ah, in-ūi Í-sek-lia̍t ê tùi-te̍k bat kóng, ‘Ha ha! Í-sek-lia̍t kó͘-chá chiū ū ê soaⁿ-lûn-á beh pìⁿ-chòe goán ê sán-gia̍p lah!’

3Só͘-í lí tio̍h thoân-ta̍t góa — Chì-koân ê Siōng Chú ê sìn-sit, kóng, ‘In-ūi tùi-te̍k hō͘ lí hong-hòe, tùi sì-bīn thún-ta̍h lí, hō͘ lí chiâⁿ-chòe kî-tha kok-ka ê sán-gia̍p, hō͘ in ê jîn-bîn kā lí thí-chhiò, tòng-chòe chhiàu-tâm;

4só͘-í, lín chiah-ê tōa-soaⁿ sió-soaⁿ, khoe-kau soaⁿ-kok, pha-hng ê tōe, hong-hòe ê siâⁿ, hō͘ chiu-ûi lia̍t-kok chiàm-léng siū ki-chhì--ê, tio̍h thiaⁿ Chì-koân Siōng Chú ê ōe.

5Góa — Chì-koân ê Siōng Chú án-ni kóng: Góa ê siū-khì chhin-chhiūⁿ hé teh to̍h, beh khiàn-chek lia̍t-kok kap Í-tong-lâng, in-ūi in sim chûn ok-to̍k, chiàm-léng góa ê thó͘-tōe, hoaⁿ-hí khoài-lo̍k chiong i tòng-chòe chiàn-lī-phín.’

6-7“Só͘-í, lí tio̍h tùi tōa-soaⁿ sió-soaⁿ, khoe-kau soaⁿ-kok thoân-ta̍t góa iú-koan Í-sek-lia̍t thó͘-tōe ê sìn-sit, kóng, ‘In-ūi lín ū siū lia̍t-kok lêng-jio̍k, só͘-í, góa — Chì-koân ê Siōng Chú tōa siū-khì li̍p-sè kóng: Lín sì-chiu-ûi ê lia̍t-kok it-tēng mā ōe siū lêng-jio̍k. Chì-koân ê Siōng Chú án-ni soan-kò.

8M̄-kú, Í-sek-lia̍t ê chèng-soaⁿ, chhiū-ba̍k ōe koh bō͘-sēng, ūi-tio̍h góa ê chú-bîn Í-sek-lia̍t lín chiah-ê lâng kiat ké-chí. Lín chin-kín chiū ōe tńg--lâi.

9Góa koan-sim lín, thiàⁿ-sioh lín, beh hō͘ lín ê thó͘-tōe ōe-tàng koh khai-khún chèng-choh.

10Góa beh hō͘ Í-sek-lia̍t jîn-kháu ke-thiⁿ, siâⁿ-tìn ū lâng khiā-khí, hong-po͘ koh-chài tiông-kiàn.

11Góa beh hō͘ lín kap lín ê cheng-siⁿ lóng heng-ōng, siⁿ-thòaⁿ chin chōe. Góa beh hō͘ lín tòa tī chá-chêng tòa--kè ê só͘-chāi, siúⁿ-sù lín pí í-chêng koh-khah chōe ê hok-khì. Án-ni, lín chiū chai góa sī Siōng Chú.

12Góa beh hō͘ góa ê chú-bîn Í-sek-lia̍t lín chiah-ê lâng tī chèng-soaⁿ ê téng-bīn kiâⁿ-ta̍h; in beh chiâⁿ-chòe lín ê sán-gia̍p, bōe koh hō͘ lín tī hia sòng-sit jî-lú.

13“‘Góa — Chì-koân ê Siōng Chú án-ni kóng, lâng bat kóng: Chit-tè tōe ōe thun-chia̍h lâng, koh hō͘ kok-ka sòng-sit jîn-bîn.

14Taⁿ, chit-tè thó͘-tōe bōe koh thun-chia̍h lâng, bōe koh hō͘ jîn-bîn sòng-sit chú-lú. Góa — Chì-koân ê Siōng Chú án-ni soan-pò͘.

15Lí chit-tè thó͘-tōe bōe koh siū lia̍t-kok lêng-jio̍k, bōe koh siū bān-cho̍k ki-chhì, mā bōe koh hō͘ jîn-bîn sòng-sit chú-lú. Góa — Chì-koân ê Siōng Chú án-ni soan-pò͘.’”

Í-sek-lia̍t ê Sin Seng-oa̍h

16Siōng Chú tùi góa kóng,

17“Jîn-chú ah, Í-sek-lia̍t-lâng tòa tī in pún-tōe ê sî, in ê só͘-kiâⁿ-só͘-chòe chiong hit-tè thó͘-tōe phah lâ-sâm. Tùi góa khòaⁿ, in ê hêng-ûi chhin-chhiūⁿ keng-kî tiong ê hū-lú bô chheng-khì.

18In-ūi in tī hia thâi-lâng, pài ngó͘-siōng, phah lâ-sâm hit-tè thó͘-tōe, só͘-í, góa beh chiong góa ê tōa siū-khì piàⁿ-lo̍h tī in sin-chiūⁿ.

19Góa beh chiàu in ê só͘-kiâⁿ-só͘-chòe hêng-hoa̍t in, kā in hòng-tio̍k khì gōa-pang, sì-sòaⁿ tī lia̍t-kok.

20Lâng lóng teh kóng, ‘Chiah-ê lâng sī Siōng Chú ê jîn-bîn, soah tio̍h lī-khui Siōng Chú ê tōe.’ In hō͘ góa sîn-sèng ê miâ tī in khì ê lia̍t-kok siū siat-to̍k.

21Góa tin-sioh góa ê sèng-miâ, m̄-kú Í-sek-lia̍t-lâng bô-lūn hō͘ lâng lia̍h-khì tó-ūi, lóng hō͘ góa sîn-sèng ê miâ siū siat-to̍k.

22“Só͘-í, tio̍h kā Í-sek-lia̍t-lâng kóng, góa — Chì-koân ê Siōng Chú án-ni kóng, ‘Í-sek-lia̍t-lâng, góa beh chòe ê sū, m̄-sī ūi-tio̍h lín, sī ūi-tio̍h góa sîn-sèng ê miâ, in-ūi chit-ê miâ tī lín khì ê lia̍t-kok tiong siū siat-to̍k.

23Lín bat hō͘ góa ê miâ tī lia̍t-kok tiong siū siat-to̍k, m̄-kú góa beh tī in tiong-kan hián-bêng góa ê miâ sī chì-tōa sîn-sèng. Án-ni, in chiū chai góa sī Siōng Chú. Góa — Chì-koân ê Siōng Chú án-ni soan-pò͘.

24Góa beh tùi lia̍t-kok tiong chhōa lín chhut--lâi, tùi bān-pang chū-chi̍p lín, chhōa lín tńg-khì ka-kī ê hiong-thó͘.

25Góa beh ēng chheng-chúi kā lín hiù, lín chiū chheng-khì. Góa beh kā lín sóe chheng-khì, tû-khì lín it-chhè ê ù-òe kap só͘-ū ê ngó͘-siōng.

26“‘Góa beh sù lín sin ê sim, chiong sin ê sîn khǹg tī lín lāi-bīn. Góa beh tùi lín ê seng-khu tû-khì chhin-chhiūⁿ chio̍h-thâu hiah-ni̍h tēng ê sim, koh siúⁿ-sù lín chhin-chhiūⁿ bah hiah-ni̍h nńg ê sim.

27Góa beh chiong góa ê sîn khǹg tī lín lāi-bīn, hō͘ lín ōe chun-siú góa ê kui-lē, sūn-thàn góa ê bēng-lēng.

28Lín beh tòa tī góa sù hō͘ lín chó͘-sian ê hit-tè thó͘-tōe. Lín beh chòe góa ê chú-bîn, góa chòe lín ê Siōng-tè.

29Góa beh kiù lín thoat-lī it-chhè ê ù-òe, mā beh hō͘ lín ngó͘-kok hong-siu, bōe koh ū ki-hng.

30Góa beh hō͘ lín ê chhiū-ba̍k gâu kiat ké-chí, chhân-hn̂g chhut-sán chin chōe, hō͘ lín bōe koh in-ūi ki-hng siū lia̍t-kok bú-jio̍k.

31Hit-sî, lín ōe siūⁿ-khí ka-kī siâ-ok ê hêng-ûi kap só͘ hoān ê chōe-kò, mā beh in-ūi lín ê chōe-ok kap thang iàm-ò͘ⁿ ê sū iàm-chiān ka-kī.

32Í-sek-lia̍t-lâng, lín tio̍h chai, góa án-ni chòe m̄-sī ūi-tio̍h lín. Lín tio̍h ūi ka-kī ê hêng-ûi kiàn-siàu pháiⁿ-sè. Chì-koân ê Siōng Chú án-ni soan-pò͘.’

33“Chì-koân ê Siōng Chú án-ni kóng, ‘Góa chiong lín só͘-ū ê chōe kiat-chēng liáu-āu, beh hō͘ lín ê siâⁿ-tìn ū lâng khiā-khí, hong-po͘ koh-chài tiông-kiàn.

34Chit-tè pha-hng ê tōe, chiū-sī kè-lō͘ ê lâng chá-chêng khòaⁿ-chòe hong-po͘ ê só͘-chāi, taⁿ ōe-tàng khai-khún chèng-choh.

35In beh kóng: Chit-tè í-chêng pha-hng ê tōe, hiān-chāi kèng-jiân chhin-chhiūⁿ I-tiân-hn̂g; chiah-ê pha-hng, hong-hòe, hō͘ lâng húi-hoāi ê só͘-chāi, hiān-chāi pìⁿ-chòe kian-kò͘, ū lâng khiā-khí ê siâⁿ-tìn.

36Hit-sî, lí sì-chiu-ûi iáu-bē bia̍t-bông ê kok-ka beh chai, sī góa Siōng Chú tiông-kiàn hong-hòe ê siâⁿ-tìn, koh-chài chiong hong-po͘ khai-khún chèng-choh. Góa Siōng Chú kóng chhut-chhùi, it-tēng si̍t-hêng.’

37“Chì-koân ê Siōng Chú án-ni kóng, ‘Góa beh koh hôe-èng Í-sek-lia̍t-lâng tùi góa ê khún-kiû, hō͘ in ê jîn-kháu chhin-chhiūⁿ iûⁿ-kûn hiah-ni̍h chōe.

38Hong-hòe ê siâⁿ-tìn beh koh ū lâng oe-oe-khoeh-khoeh, chhin-chhiūⁿ Iâ-lō͘-sat-léng tī choeh-kî hiàn-chè ê iûⁿ-kûn hiah-ni̍h chōe. Án-ni, in chiū chai góa sī Siōng Chú.’”

Í-se-kiat-su 36 - 現代台語譯本羅馬字版(TTVR)-闽南语

Learn More About Us