Iok-su-a-kì 14

Iok-su-a-kì 14 - 現代台語譯本羅馬字版(TTVR)-闽南语

Hun-phòe Iok-tàn-hô Sai-pêng ê Thó͘-tōe

1Ē-bīn sī Í-sek-lia̍t-lâng tī Ka-lâm-tōe, chiū-sī Iok-tàn-hô sai-pêng, só͘ tit--tio̍h ê ke-gia̍p, sī chè-si Í-lī-a-sat kap Lūn ê kiáⁿ Iok-su-a, í-ki̍p Í-sek-lia̍t ta̍k chi-cho̍k ê cho̍k-tiúⁿ, pun hō͘ in--ê.

2In chiàu Siōng Chú tùi Mô͘-se ê bēng-lēng, thiu-chhiam hun-phòe hō͘ káu ê chi-cho̍k koh pòaⁿ chi-cho̍k ê thó͘-tōe.

3Mô͘-se tī Iok-tàn-hô tang-pêng, í-keng chiong nn̄g ê chi-cho̍k koh pòaⁿ chi-cho̍k ê ke-gia̍p pun hō͘ in, m̄-kú bô pun ke-gia̍p hō͘ Lī-bī-lâng;

4Iok-sek ê hō͘-tāi hun-chòe Má-ná-se kap Í-hoat-liân nn̄g ê chi-cho̍k. Sui-jiân Mô͘-se bô chiong thó͘-tōe pun hō͘ Lī-bī-lâng chòe ke-gia̍p, m̄-kú hō͘ in siâⁿ-tìn thang tòa, chháu-po͘ thang chhī cheng-siⁿ.

5Í-sek-lia̍t-lâng chiàu Siōng Chú bēng-lēng Mô͘-se ê ōe hun-phòe hit-ê tōe.

Ka-le̍k Pun-tio̍h Hi-pek-lûn

6Ū chi̍t ji̍t, Iû-tāi-lâng lâi Kiat-kah kìⁿ Iok-su-a, Ki-nî-sé-lâng Iâ-hu-nî ê kiáⁿ Ka-le̍k tùi i kóng, “Siōng Chú tī Ka-te-su Pa-nî-a, tùi Siōng-tè tiōng-iōng ê lâng Mô͘-se só͘ kóng koan-hē lí kap góa ê tāi-chì, lí lóng chai.

7Siōng Chú ê po̍k-jîn Mô͘-se tùi Ka-te-su Pa-nî-a phài góa lâi thàm-cha chit-ê tōe ê sî, góa tú-á sì-cha̍p hè; góa chiàu góa sim-lāi só͘ khak-sìn--ê kā i pò-kò.

8M̄-kú kap góa chòe-hé khì thàm-cha ê hiaⁿ-tī ê pò-kò hō͘ jîn-bîn kiaⁿ kah sîn-put-hū-thé, chí-ū góa tiong-si̍t sìn-khò Siōng Chú — góa ê Siōng-tè.

9Hit-ji̍t, Mô͘-se chiù-chōa kóng, ‘Lí ê kha só͘ ta̍h ê tōe, it-tēng beh hō͘ lí kap lí ê hō͘-tāi chòe éng-oán ê ke-gia̍p, in-ūi lí tiong-si̍t sìn-khò Siōng Chú — góa ê Siōng-tè.’

10Tùi Í-sek-lia̍t-lâng tī khòng-iá phiau-liû, Siōng Chú kā Mô͘-se kóng chiah-ê ōe ê sî kàu taⁿ, í-keng kè sì-cha̍p-gō͘ nî. Lí khòaⁿ, Siōng Chú chiàu I ê èng-ún, hō͘ góa iáu oa̍h--teh, hiān-chāi góa í-keng poeh-cha̍p-gō͘ hè lah.

11Kin-á-ji̍t góa iáu ióng-kiāⁿ, kap Mô͘-se phài góa khì thàm-cha ê sî kâng-khoán; bô-lūn sī kau-chiàn, sī chhut-chhut-ji̍p-ji̍p, góa ê khùi-la̍t hit-sî án-chóaⁿ, hiān-chāi mā án-ni.

12Chhiáⁿ lí chiong Siōng Chú hit-ji̍t só͘ èng-ún ê soaⁿ-khu hō͘ góa. Hit-ji̍t lí mā ū thiaⁿ--tio̍h, tī hia ū A-la̍p-cho̍k ê lâng, in ê siâⁿ tōa koh kian-kò͘; nā Siōng Chú kap góa tông-chāi, chiàu I ê èng-ún, góa chiū ōe kā in kóaⁿ--chhut-khì.”

13 Iok-su-a chiū kā Iâ-hu-nî ê kiáⁿ Ka-le̍k chiok-hok, ēng Hi-pek-lûn hō͘ i chòe ke-gia̍p.

14Só͘-í, Hi-pek-lûn sī Ki-nî-sé-lâng Iâ-hu-nî ê kiáⁿ Ka-le̍k ê ke-gia̍p, ti̍t-kàu kin-á-ji̍t; in-ūi i tiong-si̍t sìn-khò Siōng Chú — Í-sek-lia̍t ê Siōng-tè.

15Hi-pek-lûn í-chêng kiò-chòe Ki-lia̍t A-pa. A-pa sī A-la̍p-cho̍k siōng úi-tāi ê lâng.

Tùi án-ni, hit-ê tōe thài-pêng, bô koh ū chiàn-cheng.

Iok-su-a-kì 14 - 現代台語譯本羅馬字版(TTVR)-闽南语

Learn More About Us