Hô-se-a-su 11 - 現代台語譯本羅馬字版(TTVR)-闽南语

Siōng-tè Lîn-bín Pōe-poān ê Chú-bîn

1Siōng Chú kóng:

Í-sek-lia̍t sòe-hàn ê sî góa chiū thiàⁿ i;

góa ū tiàu góa ê kiáⁿ chhut Ai-ki̍p

2Góa ná kiò in, in ná cháu-khui;

in kā Pa-le̍k hiàn-chè,

tùi ngó͘-siōng sio-hiuⁿ.

3Góa khan Í-hoat-liân ê chhiú kà in kiâⁿ;

m̄-kú in m̄ chai góa ū i-hó in, chiàu-kò͘ in.

4Góa ēng chû-pi ê soh, jîn-ài ê tòa khan in;

góa tùi in ê ām-kún giâ-khui in ê taⁿ,

àⁿ lo̍h-khì iúⁿ-chhī in.

5In m̄-khéng tńg-lâi góa chia;

án-ni, in it-tēng ōe koh tò-tńg-khì Ai-ki̍p,

hō͘ A-su̍t-ông thóng-tī.

6Chiàn-loān ōe lîm-kàu in ê siâⁿ,

húi-hoāi in ê siâⁿ-mn̂g,

phò-hoāi in ê kè-bô͘.

7Góa ê chú-bîn kian-koat pōe-poān góa;

án-ni, in kiò thiⁿ, thiⁿ bōe ìn.

8 Í-hoat-liân ah, góa ná kam khì-sak lí?

Í-sek-lia̍t ah, góa ná kam chiong lí kau hō͘ pa̍t-lâng?

Góa ná ōe hō͘ lí chhin-chhiūⁿ Ap-má,

tùi-thāi lí chhin-chhiūⁿ tùi-thāi Sé-pián?

Góa ê sim í-keng kái-piàn;

góa ê chêng chhiong-móa lîn-bín.

9Góa bōe hoat-chhut béng-lia̍t ê siū-khì,

bōe koh húi-bia̍t Í-hoat-liân.

In-ūi góa sī Siōng-tè, m̄-sī sè-kan-lâng,

sī tī lín tiong-kan Chì-sèng ê Siōng-tè;

góa bōe koh tùi lín hoat siū-khì.

10Siōng Chú ōe chhin-chhiūⁿ sai teh háu,

I ê chú-bîn ōe kun-tè I.

I chi̍t-ē háu, in chiū ngia̍uh-ngia̍uh-chhoah tùi sai-pêng kóaⁿ--lâi;

11in ōe chhin-chhiūⁿ chhek-chiáu ngia̍uh-ngia̍uh-chhoah tùi Ai-ki̍p pe--lâi,

chhin-chhiūⁿ hún-chiáu tùi A-su̍t kóaⁿ--lâi.

Góa beh hō͘ in tòa tī ka-kī ê chhù.

Siōng Chú án-ni soan-pò͘.

Í-sek-lia̍t kap Iû-tāi Siū Khiàn-chek

12 Í-hoat-liân ēng pe̍h-chha̍t,

Í-sek-lia̍t-ke ēng khúi-chà pau-ûi góa;

Iû-tāi mā pōe-poān Siōng-tè,

tùi sîn-sèng ê Siōng-tè bô tiong-si̍t.

Learn More About Us