Lia̍t-ông-kì Siōng-koàn 15

Lia̍t-ông-kì Siōng-koàn 15 - 現代台語譯本羅馬字版(TTVR)-闽南语

Iû-tāi-ông A-pí-ngá(2 Tāi 13.1-14.1)

1 Nî-pat ê kiáⁿ Í-sek-lia̍t-ông Iâ-lô-pho-an tē-cha̍p-poeh nî, A-pí-ngá chòe Iû-tāi-ông,

2tī Iâ-lō͘-sat-léng choh-ông saⁿ nî; i ê lāu-bú kiò-chòe Má-ka, sī Ap-sa-liông ê cha-bó͘-kiáⁿ.

3A-pí-ngá chòe i ê lāu-pē í-chêng só͘ chòe it-chhè ê chōe-ok; i ê sim bô chhin-chhiūⁿ i ê a-chó͘ Tāi-pi̍t ê sim oân-choân sūn-ho̍k Siōng Chú — i ê Siōng-tè.

4M̄-kú Siōng Chú — i ê Siōng-tè in-ūi Tāi-pi̍t ê iân-kò͘, hō͘ i tī Iâ-lō͘-sat-léng ū chi̍t pha teng, hō͘ i ê kiáⁿ sòa-chiap i ê ūi, koh hō͘ Iâ-lō͘-sat-léng kian-kò͘.

5Tāi-pi̍t tī Hek-lâng O͘-lī-a hit-kiāⁿ sū í-gōa, lóng chòe Siōng Chú khòaⁿ-chòe hó ê sū, it-seng bô ûi-pōe Siōng Chú ê bēng-lēng.

6Lô-pho-an kap Iâ-lô-pho-an siông-siông kau-chiàn.

7A-pí-ngá kî-tha ê sū-chek, i só͘ chòe it-chhè ê sū lóng kì-chài tī Iû-tāi Lia̍t-ông-sú. A-pí-ngá mā bat kap Iâ-lô-pho-an kau-chiàn.

8A-pí-ngá tńg-khì i ê lia̍t-chó͘ hia, lâng kā i an-chòng tī Tāi-pi̍t-siâⁿ; i ê kiáⁿ A-sat sòa-chiap i choh-ông.

Iû-tāi-ông A-sat(2 Tāi 15.16-16.6)

9 Í-sek-lia̍t-ông Iâ-lô-pho-an tē-jī-cha̍p nî, A-sat chòe Iû-tāi-ông.

10I tī Iâ-lō͘-sat-léng choh-ông sì-cha̍p-it nî; i ê a-má kiò-chòe Má-ka, sī Ap-sa-liông ê cha-bó͘-kiáⁿ.

11A-sat chhin-chhiūⁿ i ê chó͘ Tāi-pi̍t chòe Siōng Chú khòaⁿ-chòe hó ê sū,

12tùi kok-lāi tû-khì loân-tông, í-ki̍p i ê chó͘-sian só͘ chō it-chhè ê ngó͘-siōng;

13koh hòe-tû i ê a-má Má-ka thài-hō͘ ê ūi, in-ūi Má-ka ū chō A-sià-la khó-ò͘ⁿ ê sîn-siōng. A-sat chiong sîn-siōng chhò-tiāu, tī Khip-lûn Khoe-kok pàng-hé sio.

14Sui-jiân hiah-ê soaⁿ-thâu-tôaⁿ iáu-bē tû--khì, m̄-kú A-sat it-seng oân-choân sūn-ho̍k Siōng Chú.

15I chiong i ê lāu-pē kap i pún-sin hun-pia̍t-choh-sèng ê kim, gûn, kap khì-khū, lóng tòa-ji̍p Siōng Chú ê sèng-tiān.

16 A-sat kap Í-sek-lia̍t-ông Pa-sa siông-siông kau-chiàn.

17Í-sek-lia̍t-ông Pa-sa lâi kong-kek Iû-tāi, siu-kiàn La-má-siâⁿ, beh chó͘-tòng lâng tī Iû-tāi-ông A-sat hia chhut-ji̍p.

18A-sat chiū chiong Siōng Chú sèng-tiān kap ông-kiong ê hú-khò͘ chhun ê kim gûn, lóng kau hō͘ i ê jîn-sîn, phài in khì Tāi-má-sū-kek kìⁿ Sū-lī-a-ông, Hi-sûn ê sun, Tha-pek-lîm-bûn ê kiáⁿ Piān Hap-ta̍t, tùi i kóng,

19“Lán lâi kiat-bêng, chhin-chhiūⁿ lí ê lāu-pē bat kap góa ê lāu-pē kiat-bêng. Taⁿ góa ēng kim-gûn chòe lé-mi̍h sàng lí, chhiáⁿ lí hòe-tû lí kap Í-sek-lia̍t-ông Pa-sa li̍p ê iok, hō͘ i tùi Iû-tāi thiat-thè.”

20 Piān Hap-ta̍t tông-ì A-sat-ông ê ōe, chiū phài i ê kun-tiúⁿ khì kong-kek Í-sek-lia̍t ê siâⁿ, kong-phòa Í-hûn, Tān, A-pek Pek Má-ka, Ka-lī-lī-ô͘ hù-kūn ê tōe-khu, Ná-hut-tha-lī tōe-khu.

21Pa-sa thiaⁿ-tio̍h chit-ê siau-sit, chiū thêng-kang bô koh siu-kiàn La-má, iû-goân tòa tī Tek-sat.

22Tùi án-ni, A-sat-ông bēng-lēng Iû-tāi só͘-ū ê jîn-bîn, ta̍k-ê lâng lóng tio̍h ho̍k-chiông, chiong Pa-sa ēng lâi beh siu-kiàn La-má ê chio̍h-thâu kap chhâ-liāu, poaⁿ-khì tiông-kiàn Piān-ngá-bín tōe-khu ê Ka-pa kap Bí-su-pa.

23 A-sat kî-tha ê sū-chek, i ê sêng-chiū, i só͘ chòe ê sū, kap i só͘ khí ê siâⁿ, lóng kì-chài tī Iû-tāi Lia̍t-ông-sú. A-sat nî-lāu ê sî, tì-tio̍h kha ê pīⁿ.

24A-sat tńg-khì i ê lia̍t-chó͘ hia, kap i ê lia̍t-chó͘ an-chòng tī Tāi-pi̍t-siâⁿ; i ê kiáⁿ Iok-sa-hoat sòa-chiap i choh-ông.

Í-sek-lia̍t-ông Ná-tap

25 Iû-tāi-ông A-sat tē-jī nî, Iâ-lô-pho-an ê kiáⁿ Ná-tap chòe Í-sek-lia̍t-ông. I thóng-tī Í-sek-lia̍t nn̄g nî.

26Ná-tap chòe Siōng Chú khòaⁿ-chòe pháiⁿ ê sū, kiâⁿ i lāu-pē ê lō͘, kap i ê lāu-pē kâng-khoán hō͘ Í-sek-lia̍t-lâng hām-lo̍h chōe.

27 Í-sat-ka chi-cho̍k A-hi-ngá ê kiáⁿ Pa-sa pōe-poān Ná-tap. Ná-tap kap Í-sek-lia̍t kun-peng ûi-khùn Hui-lī-sū-lâng ê Ki-pí-tùn-siâⁿ ê sî, Pa-sa kā i thâi-sí.

28Iû-tāi-ông A-sat tē-saⁿ nî, Pa-sa thâi-sí Ná-tap, chhoàn i ê ūi.

29Pa-sa chi̍t-ē choh-ông, chiū thâi-sí Iâ-lô-pho-an choân-ke, chiong só͘-ū ōe chhoán-khùi--ê lóng châu-bia̍t, bô kā Iâ-lô-pho-an lâu chi̍t ê; tú-tú chiàu Siōng Chú thong-kè I ê po̍k-jîn Sī-lô-lâng A-hi-ngá só͘ kóng ê ōe.

30Che sī in-ūi Iâ-lô-pho-an ū hoān-chōe, koh hō͘ Í-sek-lia̍t-lâng hām-lo̍h chōe; i án-ni chòe ū kek-tōng Siōng Chú — Í-sek-lia̍t ê Siōng-tè siū-khì.

31 Ná-tap kî-tha ê sū-chek, kap i só͘ chòe it-chhè ê sū, lóng kì-chài tī Í-sek-lia̍t Lia̍t-ông-sú.

32A-sat kap Í-sek-lia̍t-ông Pa-sa siông-siông kau-chiàn.

Í-sek-lia̍t-ông Pa-sa

33 Iû-tāi-ông A-sat tē-saⁿ nî, A-hi-ngá ê kiáⁿ Pa-sa tī Tek-sat chòe Í-sek-lia̍t jîn-bîn ê ông jī-cha̍p-sì nî.

34I chòe Siōng Chú khòaⁿ-chòe pháiⁿ ê sū, kiâⁿ Iâ-lô-pho-an ê lō͘, hō͘ só͘-ū ê Í-sek-lia̍t-lâng hām-lo̍h chōe.

Lia̍t-ông-kì Siōng-koàn 15 - 現代台語譯本羅馬字版(TTVR)-闽南语

Learn More About Us