Iok-pek-kì 4

Iok-pek-kì 4 - 現代台語譯本羅馬字版(TTVR)-闽南语

Tē-it Piàn Tùi-ōe(4.1-14.22)

1 Thê-bān-lâng Í-lī-hoat ìn Iok-pek kóng:

2Lâng beh kap lí kóng-ōe, lí ōe hiâm mâ-hoân bōe?

Kiám ū lâng ōe-tàng lún--teh bô kóng-ōe?

3Lí bat kà-sī chin chōe lâng,

hō͘ loán-jio̍k ê chhiú kian-kiông.

4Poa̍h-tó--ê, lí ēng ōe kā i hû--khí-lâi;

kha-thâu-u sng-nńg--ê, lí hō͘ i ióng-kiāⁿ.

5Chóng-sī chai-lān chi̍t-ē hoat-seng,

lí chiū bōe-tàng jím-siū;

chi̍t-ē kha̍p-tio̍h lí, lí chiū kiaⁿ-hiâⁿ.

6Lí kiám m̄-sī tùi kèng-ùi Siōng-tè tit-tio̍h khak-sìn?

Kiám m̄-sī tùi sûn-choân ê hêng-ûi tit-tio̍h ǹg-bāng?

7Siūⁿ-khòaⁿ leh, bû-ko͘ ê lâng ná ōe bia̍t-bông?

Chèng-ti̍t ê lâng kiám ōe húi-bia̍t?

8Góa khòaⁿ, lâng nā chai-chèng chōe-kò,

iā siâ-ok ê chéng-chí,

it-tēng ōe siu-sêng kâng-lūi ê ké-chí.

9Siōng-tè pûn-khùi, in chiū bia̍t-bông;

I hoat tōa siū-khì, in chiū siau-bia̍t,

10sai teh háu, béng-sai tián-ui ê siaⁿ lóng soah,

sai-á-thûn ê chhùi-khí mā lóng kòng-tn̄g;

11sai in-ūi bô thang chia̍h sí--khì,

sai-á-kiáⁿ mā lóng sì-sòaⁿ.

12Ū ōe tiām-tiām-á thoân kàu góa chia;

góa ê hī-khang ū thiaⁿ-tio̍h i sòe-sòe ê siaⁿ.

13Mî--sî lâng khùn tāng-bîn,

siū ok-bāng kiáu-jiáu ê sî,

14kiaⁿ-hiâⁿ lîm-kàu góa,

hō͘ góa kui seng-khu phi̍h-phi̍h-chhoah.

15Ū chi̍t chūn hong tùi góa ê bīn chhe--kè;

góa kui seng-khu ê mn̂g chhàng--khí-lâi.

16I thêng--teh, m̄-kú góa khòaⁿ bōe chhut i ê hêng-chōng.

Ū hêng-siōng tī góa ba̍k-chiu chêng;

sì-ûi chēng-chēng-chēng, góa thiaⁿ-tio̍h ū siaⁿ kóng:

17Ōe-sí ê lâng tī Siōng-tè gán-tiong kiám sī gī-lâng?

Lâng tī Chhòng-chō-chú bīn-chêng kiám ōe-tàng sǹg-chòe bô-chōe?

18Siōng-tè bô sìn-jīm ka-kī ê po̍k-jîn,

mā ōe chí-chek I sù-chiá ê chhò-gō͘.

19Hiah-ê tòa tī thô͘-kak-chhù ê lâng koh-khah bián-kóng;

in ê pún-chit sī thô͘-hún,

chhin-chhiūⁿ chiù-thâng hō͘ lâng chi̍t-ē jôe chiū sí.

20In chá-khí-sî oa̍h--teh, ē-hng-sî chiū siū húi-bia̍t,

éng-oán bô--khì, bô lâng ōe-kì--tit.

21In pò͘-pîⁿ ê soh khiú--khí-lâi chiū tó--lo̍h-khì,

sí kah bô-bêng-bô-pe̍k.

Iok-pek-kì 4 - 現代台語譯本羅馬字版(TTVR)-闽南语

Learn More About Us