Í-sài-a-su 61

Í-sài-a-su 61 - 現代台語譯本羅馬字版(TTVR)-闽南语

Chín-kiù ê Hó Siau-sit

1Chì-koân Siōng Chú ê sîn lîm-kàu góa,

in-ūi Siōng Chú ēng iû boah góa;

I chhe góa khì thoân hó siau-sit hō͘ sàn-chhiah-lâng,

i-tī sim-lêng phò-chhùi ê lâng,

soan-pò͘ siū-lia̍h--ê tit-tio̍h tháu-pàng,

siū-koaiⁿ--ê chhut kaⁿ-lô,

2soan-pò͘ Siōng Chú un-thāi lâng ê nî

kap lán ê Siōng-tè thòe I ê chú-bîn sin-oan ê ji̍t,

an-ùi só͘-ū pi-ai ê lâng;

3tī Sek-an pi-ai ê lâng, I sù in hoa-koan tāi-thòe hé-hu,

hoaⁿ-hí ê iû tāi-thòe pi-ai,

chheng-chàn ê saⁿ tāi-thòe iu-siong ê sim.

In siū chheng-chòe “Kong-gī ê siōng-chhiū”,

sī Siōng Chú chai-chèng--ê, beh hián-bêng I ka-kī ê êng-kng.

4In ōe tiông-kiàn kú-kú pha-hng ê tōe,

siu-kiàn chá-chêng húi-hoāi ê só͘-chāi,

têng-chài khí-chō sè-sè-tāi-tāi hong-hòe ê siâⁿ-chhī.

5Gōa-cho̍k-lâng ōe lâi chhī lín ê iûⁿ-kûn,

gōa-kok-lâng ōe thòe lín keng-choh chhân-hn̂g,

chiàu-kò͘ lín ê phû-tô-hn̂g.

6Lín beh kiò-chòe “Siōng Chú ê chè-si”,

sū-hōng lán ê Siōng-tè.

Lín ōe tit-tio̍h lia̍t-kok ê châi-bu̍t,

hióng-siū in ê châi-hù lâi khoa-kháu.

7Lín ū siū-tio̍h siang-pē ê lêng-jio̍k;

lâng siūⁿ-kóng lêng-jio̍k sī lín èng-tit ê hūn-gia̍h.

Chóng-sī, lín ōe tī ka-kī ê thó͘-tōe tit-tio̍h siang-pē ê sán-gia̍p;

lín ê hoaⁿ-hí ōe éng-oán chûn-sio̍k.

8Góa Siōng Chú ì-ài kong-pêng,

iàm-ò͘ⁿ chhiúⁿ-toa̍t kap hoān-chōe.

Góa beh ēng sìn-si̍t kā in pò-siúⁿ,

beh kap in li̍p éng-oán ê iok.

9In ê hō͘-tāi tī lia̍t-kok tiong ōe chin chhut-miâ;

in ê kiáⁿ-sun tī bān-bîn tiong ū hó miâ-siaⁿ.

Só͘-ū khòaⁿ-kìⁿ in ê lâng ōe sêng-jīn

in sī Siōng Chú sù-hok ê chú-bîn.

10Góa ōe in-ūi Siōng Chú tōa-tōa hoaⁿ-hí,

in-ūi góa ê Siōng-tè khoài-lo̍k.

Siōng-tè ēng chín-kiù chòe saⁿ kā góa chhēng,

ēng sèng-lī chòe gōa-phàu kā góa moa;

chhin-chhiūⁿ sin-lông tì hoa-koan,

sin-niû kòa chu-pó.

11Tú chhin-chhiūⁿ thó͘-tōe hō͘ chéng-chí puh-gê,

chhân-hn̂g hō͘ só͘ iā--ê seng-tióng,

Chì-koân ê Siōng Chú ōe hō͘ sèng-lī kap chàn-bí

tī bān-kok ê bīn-chêng khui-hoe kiat-chí.

Í-sài-a-su 61 - 現代台語譯本羅馬字版(TTVR)-闽南语

Learn More About Us