Hi-pek-lâi-su 2

Hi-pek-lâi-su 2 - 現代台語譯本羅馬字版(TTVR)-闽南语

Úi-tāi ê Chín-kiù

1Só͘-í, lán it-tēng tio̍h koh-khah tì-ì só͘ thiaⁿ--tio̍h ê sìn-sit, chiah bián phian-lī chin-tō.

2In-ūi thong-kè thiⁿ-sài só͘ thoân ê sìn-sit nā ū kong-hāu, pōe-ge̍k bô sūn-chiông ê lâng tio̍h siū èng-siū ê hêng-hoa̍t;

3án-ni lán hut-lio̍k chiah-ni̍h tōa ê chín-kiù, beh ná ōe-tàng siám-pī tio̍h siū ê hêng-hoa̍t? Chú pún-sin ū tāi-seng soan-pò͘ chit-ê chín-kiù, thiaⁿ--kìⁿ ê lâng mā ū tùi lán chèng-si̍t chit-ê sū.

4Siōng-tè koh ū ēng sîn-jiah, kî-sū, ta̍k-khoán tōa koân-lêng ê chok-ûi, kap chiàu I ka-kī ê ì-sù só͘ hun-phòe Sèng Sîn ê un-sù chòe-hé choh-chèng.

Chín-kiù ê Khai-thok-chiá

5Siōng-tè bô chiong lán só͘ kóng chit-ê chiong-lâi ê sè-kài kau hō͘ thiⁿ-sài koán-lí.

6M̄-kú Sèng-keng ū chi̍t ê só͘-chāi choh-chèng kóng:

Lâng sǹg sím-mi̍h, lí hiah-ni̍h koan-sim?

Sè-kan-lâng sǹg sím-mi̍h, lí hiah-ni̍h chiàu-kò͘?

7Lí hō͘ i pí thiⁿ-sài sió-khóa khah kē;

lí sù êng-kng chun-kùi chòe hoa-koan kā i tì,

8hō͘ bān-iú lóng hâng-ho̍k tī i kha-ē.

Siōng-tè kì-jiân hō͘ bān-iú lóng hâng-ho̍k i, chiū bô chi̍t hāng bô hâng-ho̍k i. M̄-kú kàu hiān-chāi lán iáu-bē khòaⁿ-kìⁿ bān-iú lóng hâng-ho̍k i.

9Lán khòaⁿ-kìⁿ hit-ūi pí thiⁿ-sài sió-khóa khah kē ê Iâ-so͘ í-keng keng-kè sí ê thòng-khó͘, tit-tio̍h êng-kng chun-kùi ê hoa-koan; án-ni I khò Siōng-tè ê un-tián thang ūi-tio̍h chèng-lâng sí.

10Hit-ūi chhòng-chō koh î-chhî bān-iú ê Siōng-tè ūi-tio̍h beh chhōa chin chōe kiáⁿ-jî chìn-ji̍p êng-kng, chiah tio̍h hō͘ chín-kiù ê khai-thok-chiá Iâ-so͘ keng-kè khó͘-lān chiâⁿ-chòe oân-choân.

11Sū-si̍t, hō͘ lâng chiâⁿ-sèng--ê kap tit-tio̍h chiâⁿ-sèng--ê, lóng tùi kâng chi̍t ê goân-thâu chhut, in-ūi án-ni, Iâ-so͘ chheng-ho͘ in chòe hiaⁿ-tī chí-bē ia̍h bô kám-kak kiàn-siàu.

12I tùi Siōng-tè kóng:

Góa beh tùi góa ê hiaⁿ-tī kap chí-bē pò-iông lí ê miâ,

tī in ê chū-hōe tiong gîm-si o-ló lí.

13I koh kóng:

Góa beh sìn-khò I;

iā kóng:

Khòaⁿ leh, góa kap Siōng-tè sù hō͘ góa ê kiáⁿ-jî lóng tī chia.

14Kì-jiân chiah-ê kiáⁿ-jî sī ū-huih-ū-bah ê lâng, I pún-sin mā kap in siâng-khoán chiâⁿ-chòe ū-huih-ū-bah ê lâng, thang thong-kè I ê sí húi-bia̍t hit-ê chiáng-koán sí-bông ê Mô͘-kúi,

15koh tháu-pàng hiah-ê in-ūi sí-bông ê kiaⁿ-hiâⁿ it-seng chòe lô͘-châi ê lâng.

16Tong-jiân, I teh koan-sim--ê m̄-sī thiⁿ-sài, sī A-pek-la-hán ê kiáⁿ-sun.

17Só͘-í, I tī ta̍k hong-bīn tio̍h kap I ê hiaⁿ-tī chí-bē kâng-khoán, thang tī Siōng-tè ê bīn-chêng choh jîn-chû tiong-sìn ê Tōa-chè-si, thang hō͘ chèng-lâng ê chōe tit-tio̍h sià-bián.

18In-ūi I ka-kī ū siū-khó͘, siū khó-giām, I ōe-tàng pang-chān hiah-ê siū chhì-thàm ê lâng.

Hi-pek-lâi-su 2 - 現代台語譯本羅馬字版(TTVR)-闽南语

Learn More About Us