Si-phian 6 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ; ēng hiân ê ga̍k-khì phōaⁿ-chàu; tiāu, kàng poeh tō͘.Kî-kiû Pó-hō͘ ê Chá-tó

1Siōng Chú ah, kiû lí m̄-thang siū-khì chek-pī góa,

m̄-thang hoat tōa siū-khì chek-hoa̍t góa.

2Siōng Chú ah, kiû lí khó-lîn góa, in-ūi góa soe-lám;

Siōng Chú ah, kiû lí i-tī góa, in-ūi góa ê kut-thâu gi̍h-gi̍h-chùn.

3Góa ê sim hui-siông kiaⁿ-hiâⁿ;

Siōng Chú ah, lí tī-sî chiah beh kiù góa?

4Siōng Chú ah, kiû lí oa̍t tò-tńg lâi kiù góa ê sìⁿ-miā,

kiû lí in-ūi lí ê chû-ài, chín-kiù góa.

5In-ūi sí-lâng bōe kì-liām lí;

tī Im-hú, siáⁿ-lâng ōe kám-siā lí?

6Góa in-ūi haiⁿ-haiⁿ-chhan ià-siān;

góa ta̍k-mî lâu ba̍k-sái im góa ê bîn-chhn̂g,

sip-tâm góa ê chhn̂g-pho͘.

7Góa in-ūi iu-būn ba̍k-chiu phah-pháiⁿ,

in-ūi tùi-te̍k chōe, ba̍k-chiu hoe.

8Lín chòe pháiⁿ ê lâng lóng tio̍h lī-khui góa,

in-ūi Siōng Chú ū thiaⁿ-kìⁿ góa thî-khàu ê siaⁿ.

9Siōng Chú ū thiaⁿ góa ê khún-kiû;

Siōng Chú beh chiap-la̍p góa ê kî-tó.

10Góa ê tùi-te̍k lóng ōe kiàn-siàu tōa kiaⁿ-hiâⁿ;

in ōe hut-jiân kiàn-siàu thiat-thè.

Learn More About Us