Thoân-tō-su 6

Thoân-tō-su 6 - 現代台語譯本羅馬字版(TTVR)-闽南语

1Góa khòaⁿ-kìⁿ ji̍t-kng ê ē-bīn ū chi̍t hāng put-hēng tāng-tāng teh tī lâng ê sin-chiūⁿ.

2Ū lâng tit-tio̍h Siōng-tè sù i chîⁿ-châi, hó-gia̍h, chun-kùi, i ê sim só͘ ài--ê bô khiàm pòaⁿ-hāng; m̄-kú Siōng-tè hō͘ i bōe-tàng hióng-siū, hoán-tńg hō͘ gōa-lâng hióng-siū; che mā-sī khang-hu, sī tōa pi-ai.

3Lâng nā ū chi̍t-pah ê kiáⁿ, koh chia̍h tn̂g-hè-siū, sui-jiân oa̍h chin chōe hè, m̄-kú bô hióng-hok bô boán-chiok, koh bô tit-tio̍h an-chòng; góa kóng, liû-sán ê thai mā pí i khah hó.

4Chit-ê thai lâi sī khang-hu, sûi-sî chìn-ji̍p o͘-àm; i ê miâ siū o͘-àm khàm-ba̍t siau-sit.

5I m̄-bat khòaⁿ-tio̍h ji̍t-kng, mā bô ti-kak, iáu-kú pí hit-ê lāu-lâng tit-tio̍h khah hó ê an-hioh.

6Hit-ê lâng sui-jiân oa̍h kàu chi̍t-chheng nî koh chi̍t-chheng nî, m̄-kú bô hióng-hok; in nn̄g khoán lâng kiám m̄-sī lóng tio̍h khì kâng chi̍t ê só͘-chāi?

7Lâng ê lô-lo̍k lóng sī ūi-tio̍h pak-tó͘, m̄-kú si̍t-io̍k éng bōe boán-chiok.

8Tì-hūi ê lâng pí gû-gōng ê lâng kiám ū khah gâu? Sàn-chhiah-lâng chai án-chóaⁿ choh-lâng, kiám ū lō͘-ēng?

9Ba̍k-chiu khòaⁿ--tio̍h-ê pí sim siūⁿ--ê khah hó. Che mā-sī khang-hu, mā-sī lia̍h-hong.

10Í-keng ū--ê, chá chiū hō-miâ; lâng sī sím-mi̍h, mā chá chiū chai; bô lâng ōe-tàng kap pí i khah kiông--ê tùi-khòng.

11Ōe chōe, khang-hu chiū ná chōe, tùi lâng ū sím-mi̍h lī-ek?

12Lâng it-seng hu-tō͘-kong-im chhin-chhiūⁿ iáⁿ kè--khì, siáⁿ-lâng ōe chai lâng oa̍h--teh ê sî sím-mi̍h siōng hó? Siáⁿ-lâng ōe-tàng kā i kóng, i sí-āu, tī ji̍t-kng ê ē-bīn ōe hoat-seng sím-mi̍h tāi-chì?

Thoân-tō-su 6 - 現代台語譯本羅馬字版(TTVR)-闽南语

Learn More About Us