Lī-bī-kì 11

Lī-bī-kì 11 - 現代台語譯本羅馬字版(TTVR)-闽南语

Chheng-khì kap Bô Chheng-khì ê Chia̍h-mi̍h(Sin 14.3-21)

1Siōng Chú koh bēng-lēng Mô͘-se kap A-lûn

2-3tio̍h tùi Í-sek-lia̍t-lâng soan-pò͘:

Tōe-chiūⁿ só͘-ū pun-tôe koh hoan-chháu ê cheng-siⁿ, lín lóng thang chia̍h.

4-6M̄-kú, lín m̄-thang chia̍h lo̍k-tô, chio̍h-hoan, kap thò͘-á, in-ūi in ū hoan-chháu bô pun-tôe, tùi lín sī bô chheng-khì.

7Ti, ū pun-tôe, m̄-kú bô hoan-chháu, tùi lín sī bô chheng-khì.

8Chiah-ê tōng-bu̍t ê bah lín m̄-thang chia̍h; in ê si-thé mā m̄-thang bong; chiah-ê tùi lín sī bô chheng-khì.

9Chúi-tiong, bô-lūn sī hái--ni̍h á-sī hô--ni̍h, ū-kî ū-lân--ê, lín lóng thang chia̍h.

10M̄-kú chúi-tiong, bô-lūn sī hái--ni̍h á-sī hô--ni̍h, bô-kî bô-lân--ê, lín lóng tio̍h khòaⁿ-chòe thang iàm-ò͘ⁿ ê mi̍h.

11Hiah-ê tùi lín thang iàm-ò͘ⁿ ê mi̍h, lín m̄-thang chia̍h in ê bah; in ê si-thé mā m̄-thang bong.

12Só͘-ū chúi-lāi bô-kî bô-lân--ê, lín lóng tio̍h khòaⁿ-chòe thang iàm-ò͘ⁿ--ê.

13Ē-bīn chiah-ê chiáu-lūi lín tio̍h khòaⁿ-chòe thang iàm-ò͘ⁿ--ê, lóng m̄-thang chia̍h: eng, hiau, tiau,

14iân, sió-eng kap i ê lūi,

15o͘-a kap i ê lūi,

16tô-chiáu, iā-eng, hî-eng, chhiok-eng kap i ê lūi,

17àm-kong-chiáu, lô͘-chî, ko͘-n̂g,

18niau-thâu-eng, thê-ô͘, chhàu-thâu-eng,

19ho̍h, pe̍h-lēng-si kap i ê lūi, tì-kè-chiáu, kap bi̍t-pô.

20Só͘-ū ū-si̍t koh ēng sì kha teh pê--ê, sī thang iàm-ò͘ⁿ--ê.

21M̄-kú ū-si̍t, ēng sì kha teh pê, koh ū kha-thúi tī tōe-bīn teh thiàu--ê, lín thang chia̍h;

22pau-koat chháu-meh, chháu-meh-kong, tō͘-peh-á, sih-sut-á, kap in ê lūi, lín lóng thang chia̍h.

23M̄-kú ū-si̍t koh ēng sì kha teh pê--ê, lín m̄-thang chia̍h.

24Ē-bīn chiah-ê lóng ōe hō͘ lín bô chheng-khì: Só͘-ū bong-tio̍h si-thé--ê, ji̍t lo̍h í-chêng lóng bô chheng-khì.

25Nā ū lâng poaⁿ-sóa si-thé, tio̍h sóe ka-kī ê saⁿ, ji̍t lo̍h í-chêng lóng bô chheng-khì.

26Só͘-ū ū pun-tôe bô hoan-chháu ê cheng-siⁿ, tùi lín sī bô chheng-khì; kā in bong--tio̍h-ê mā bô chheng-khì.

27Só͘-ū ū sì kha, ēng kha-chiúⁿ teh kiâⁿ ê cháu-siù, tùi lín sī bô chheng-khì; bong-tio̍h in ê si-thé--ê, ji̍t lo̍h í-chêng mā lóng bô chheng-khì.

28Poaⁿ-sóa chiah-ê cháu-siù ê si-thé--ê, tio̍h sóe ka-kī ê saⁿ, ji̍t lo̍h í-chêng lóng bô chheng-khì. Chiah-ê tùi lín lóng bô chheng-khì.

29Ē-bīn chiah-ê tī tōe-chiūⁿ teh pê ê tōng-bu̍t, tùi lín sī bô chheng-khì--ê: chîⁿ-chhú, niáu-chhú, tō͘-tēng kap i ê lūi,

30piah-hó͘, liông-chú, siān-lâng-á, siâ-i, piàn-sek-liông.

31Í-siōng chiah-ê teh pê ê tōng-bu̍t, tùi lín sī bô chheng-khì; só͘-ū bong-tio̍h in ê si-thé--ê, ji̍t lo̍h í-chêng lóng bô chheng-khì.

32In ê si-thé nā lak tī ēng chhâ, pò͘, phê chòe ê mi̍h-kiāⁿ, á-sī môa-tē, chiah-ê khì-khū chiū bô chheng-khì; tio̍h kā in chìm tī chúi--ni̍h, kàu ji̍t lo̍h chiah chheng-khì.

33Chiah-ê si-thé nā lak tī chho͘-hûi lāi-bīn, hit lāi-bīn bô-lūn ū sím-mi̍h mi̍h-kiāⁿ, chiū lóng bô chheng-khì; tio̍h chiong hit-ê chho͘-hûi phah-phòa.

34Chia̍h-mi̍h nā bak-tio̍h bô chheng-khì ê khì-khū lāi-bīn ê chúi, hiah-ê chia̍h-mi̍h chiū bô chheng-khì, khì-khū lāi-bīn ōe-lim--tit ê mi̍h-kiāⁿ mā bô chheng-khì.

35Hiah-ê si-thé ê chi̍t-pō͘-hūn nā lak tī sím-mi̍h mi̍h-kiāⁿ, hit-ê mi̍h-kiāⁿ chiū bô chheng-khì; liân hang-lô͘ á-sī chàu mā tio̍h kòng-phòa, in-ūi í-keng bô chheng-khì, tùi lín mā bô chheng-khì.

36Put-kò, chúi-chôaⁿ á-sī thiok-chúi-tî lāi-bīn nā ū si-thé, chúi iû-goân chheng-khì; m̄-kú kha̍p-tio̍h hit-ê si-thé--ê, chiū bô chheng-khì.

37Si-thé ê chi̍t-pō͘-hūn nā lak tī beh iā ê chéng-chí, hiah-ê chéng-chí iû-goân chheng-khì.

38Nā chúi í-keng kā hiah-ê chéng-chí phah-tâm, si-thé ê chi̍t-pō͘-hūn koh lak tī hit téng-bīn, hiah-ê chéng-chí tùi lín sī bô chheng-khì.

39Lín thang chia̍h ê cheng-siⁿ nā sí, ū lâng bong-tio̍h i ê si-thé, ji̍t lo̍h í-chêng lóng bô chheng-khì.

40Nā ū lâng chia̍h hit-ê bah, tio̍h sóe ka-kī ê saⁿ, ji̍t lo̍h í-chêng lóng bô chheng-khì; poaⁿ-sóa sí ê cheng-siⁿ--ê mā tio̍h sóe ka-kī ê saⁿ, ji̍t lo̍h í-chêng lóng bô chheng-khì.

41-42Só͘-ū tī tōe-chiūⁿ teh pê ê oa̍h-mi̍h, bô-lūn sī ēng pak-tó͘ sô--ê, ēng sì kha á-sī khah chōe kha teh kiâⁿ--ê, sī thang iàm-ò͘ⁿ--ê, lóng m̄-thang chia̍h.

43Lín m̄-thang in-ūi teh pê ê oa̍h-mi̍h, tì-kàu ka-kī chiâⁿ-chòe thang iàm-ò͘ⁿ--ê; mā m̄-thang hō͘ chiah-ê phah lâ-sâm, tì-kàu ka-kī bô chheng-khì.

44Góa sī Siōng Chú — lín ê Siōng-tè, só͘-í lín tio̍h hun-pia̍t-choh-sèng, in-ūi góa sī sèng; lín m̄-thang in-ūi tōe-chiūⁿ teh pê ê oa̍h-mi̍h hō͘ ka-kī bô chheng-khì.

45Góa sī chhōa lín chhut Ai-ki̍p ê Siōng Chú, beh chòe lín ê Siōng-tè; lín tio̍h sèng-kiat, in-ūi góa sī sèng-kiat.

46Í-siōng sī koan-hē iá-siù, pe-chiáu, chúi-tiong ê oa̍h-mi̍h, í-ki̍p tī tōe-chiūⁿ teh pê ê oa̍h-mi̍h ê tiâu-lē.

47Tio̍h hun-pia̍t chheng-khì--ê kap bô chheng-khì--ê, ōe-chia̍h--tit kap bōe-chia̍h--tit ê oa̍h-mi̍h.

Lī-bī-kì 11 - 現代台語譯本羅馬字版(TTVR)-闽南语

Learn More About Us