Iâ-lī-bí-su 4

Iâ-lī-bí-su 4 - 現代台語譯本羅馬字版(TTVR)-闽南语

Ho͘-tiàu Í-sek-lia̍t Hóe-kái

1Siōng Chú kóng, “Í-sek-lia̍t ah, lí nā oa̍t tò-tńg, tò-tńg-lâi góa chia, chiong chiah-ê thang iàm-ò͘ⁿ ê ngó͘-siōng tû-tiāu, bô koh sam-sim-lióng-ì,

2lí nā chiàu chin-sêng, kong-pêng, chèng-ti̍t kí éng-oa̍h ê Siōng Chú chiù-chōa, lia̍t-kok chiū beh tit-tio̍h góa ê chiok-hok, koh khoa-iāu góa.”

3Siōng Chú kā Iû-tāi-lâng kap Iâ-lō͘-sat-léng ê chū-bîn kóng, “Lín tio̍h khai-khún iáu-bē lôe--kè ê hn̂g, m̄-thang iā-chéng tī chhì-phè lāi-bīn.

4Iû-tāi-lâng kap Iâ-lō͘-sat-léng ê chū-bîn ah, tio̍h kā lín ê sim kiâⁿ kat-lé kui-sio̍k Siōng Chú, tû-khì lín lāi-sim ê lâ-sâm, chiah bián góa in-ūi lín ê pháiⁿ hêng-ûi hoat siū-khì, chhin-chhiūⁿ hé to̍h--khí-lâi, bô lâng ōe-tàng phah-hoa.”

Gōa-kok Ōe Lâi Chhim-hoān

5Lín tio̍h tī Iû-tāi soan-kò, tī Iâ-lō͘-sat-léng soan-thoân:

Tio̍h tī choân-kok pûn sàu-kak, tōa-siaⁿ hoah kóng,

“Lán tio̍h chi̍p-ha̍p,

cháu ji̍p-khì siat-hông ê siâⁿ!”

6Tio̍h gia̍h tōa-kî kí ǹg Sek-an!

Tio̍h tô-miā, m̄-thang thêng-kha!

Siōng Chú beh hō͘ chai-hō kap khó-phàⁿ ê húi-bia̍t tùi pak-pêng lâi.

7Húi-bia̍t lia̍t-kok--ê í-keng chhut-hoat,

chhin-chhiūⁿ sai tùi ām-ām ê chhiū-nâ chhut--lâi.

I beh hō͘ lí ê thó͘-tōe pha-hng,

hō͘ lí ê siâⁿ-tìn hong-hòe, bô lâng tòa.

8Só͘-í, lín tio̍h chhēng môa-saⁿ, lâu ba̍k-sái thî-khàu,

in-ūi Siōng Chú iáu-teh tùi lán siū-khì.

9Siōng Chú kóng, “Kàu hit-ji̍t, ông kap koaⁿ-oân beh sit-khì ióng-khì; chè-si lóng ōe kiaⁿ-hiâⁿ, sian-ti mā ōe chhiⁿ-kông.”

10Góa chiū kóng, “Ài ah! Chì-koân ê Siōng Chú, lí si̍t-chāi khi-phiàn chiah-ê jîn-bîn kap Iâ-lō͘-sat-léng-lâng. Lí kóng ‘Pêng-an bô-sū’, kî-si̍t to-kiàm í-keng tú tī goán ê nâ-âu.”

11Hit-sî chiah-ê jîn-bîn kap Iâ-lō͘-sat-léng-lâng ōe thiaⁿ-tio̍h chiah-ê ōe: Tùi bô chhiū bô chháu ê khòng-iá koân ê só͘-chāi, ōe ū sio-hong chhe-lâi góa ê chú-bîn hia; m̄-sī beh chhe be̍h-hiūⁿ, á-sī kā ngó͘-kok ê cha̍p-chit chhe-cháu,

12sī siū góa bēng-lēng chhe--lâi ê kiông-hong. Hiān-chāi góa beh soan-pò͘ góa ê sím-phòaⁿ.

Iû-tāi Siū Ûi-khùn

13Lí khòaⁿ, tùi-te̍k teh lâi chhin-chhiūⁿ o͘-hûn teh ká; in ê chiàn-chhia chhin-chhiūⁿ kńg-lê-á-hong, in ê chiàn-bé pí eng-chiáu khah kín. Goán ū chai-hō lah! Goán bô-miā lah!

14 Iâ-lō͘-sat-léng ah, tio̍h chiong lí sim-lāi ê siâ-ok sóe chheng-khì, hō͘ lí thang tit-tio̍h kái-kiù. Lí sim-lāi ê pháiⁿ liām-thâu beh khǹg kàu tī-sî?

15Ū siau-sit tùi Tān tōe-khu thoân--chhut-lâi; ū pháiⁿ siau-sit tùi Í-hoat-liân soaⁿ-khu thoân--lâi.

16Lín tio̍h kā lia̍t-kok thoân-pò͘, kā Iâ-lō͘-sat-léng soan-kò: Ū ûi-kong ê lâng tùi chin hn̄g ê só͘-chāi lâi, tōa-siaⁿ hoah, beh kong-táⁿ Iû-tāi ê siâⁿ-tìn.

17In chhin-chhiūⁿ kò͘-siú hn̂g-tōe ê lâng pau-ûi Iâ-lō͘-sat-léng, in-ūi Iâ-lō͘-sat-léng pōe-poān góa. Siōng Chú án-ni soan-kò.

18Lí ê só͘-chòe, lí ê hêng-ûi jiá-khí chiah-ê sū; che sī lí chō-sêng ê ok-kó. Chit-ê ok-kó chin khó͘, khó͘ kàu lí ê sim-tn̂g.

Iâ-lī-bí ūi Tông-pau Pi-siong

19Góa ê pak-lāi, góa ê chōng-hú, góa ê sim ká-thiàⁿ!

Góa ê sim pho̍k-pho̍k-chhéng.

Góa bô kóng-ōe tòng bōe tiâu,

góa í-keng thiaⁿ-tio̍h sàu-kak kap kau-chiàn hoah-hiàm ê siaⁿ.

20Húi-bia̍t ê siau-sit kè-sio̍k thoân--lâi;

choân-tōe lóng siū phò-hoāi.

Góa ê pò͘-pîⁿ hut-jiân tó--khì;

góa ê tiùⁿ-ûi liâm-piⁿ li̍h--khì.

21Góa khòaⁿ tùi-te̍k ê tōa-kî, tio̍h koh khòaⁿ jōa kú?

Góa thiaⁿ sàu-kak ê siaⁿ, tio̍h koh thiaⁿ jōa kú?

22“Góa ê chú-bîn gû-gōng, m̄ bat góa;

góa ê kiáⁿ-jî bû-ti, bô tì-hūi;

in choh-pháiⁿ chin gâu, choh-hó han-bān.”

Iâ-lī-bí Khòaⁿ-kìⁿ Chiong-lâi ê Húi-bia̍t

23Góa khòaⁿ tāi-tōe, tāi-tōe hūn-tūn bô chiâⁿ-hêng;

góa khòaⁿ thiⁿ, thiⁿ àm-tām bô kng.

24Góa khòaⁿ tōa-soaⁿ, tōa-soaⁿ tín-tāng,

sió-soaⁿ mā iô-lâi-iô-khì.

25Góa sì-kòe khòaⁿ, ta̍k-ūi lóng bô lâng,

pe-chiáu mā lóng cháu-khì bih.

26Góa koh khòaⁿ, pûi-súi ê hn̂g pìⁿ-chòe hong-po͘,

só͘-ū ê siâⁿ-tìn lóng siū thiah-húi,

in-ūi Siōng Chú hoat tōa siū-khì.

27Siōng Chú án-ni kóng:

Choân-tōe lóng ōe hong-hòe,

m̄-kú góa bōe thiat-tóe kā i húi-bia̍t.

28Tāi-tōe ōe khòng-hān,

thiⁿ ōe o͘-àm.

Góa chi̍t-ē kóng-chhut, it-tēng bōe hō͘-hóe;

góa kì-jiân koat-tēng, it-tēng bōe kái-piàn.

29Siâⁿ-lāi ê lâng thiaⁿ-tio̍h bé-peng kap siā-chìⁿ ê lâng hoah-hiàm ê siaⁿ

chiū lóng tô-cháu,

cháu-ji̍p chhiū-nâ, peh-chiūⁿ soaⁿ-giâm;

choân-siâⁿ lóng siū pàng-sak,

bô lâng tòa tī hit lāi-bīn.

30Lí chit-ê beh siū húi-hoāi ê siâⁿ,

ná tio̍h chhēng âng-sek ê súi-saⁿ,

kòa n̂g-kim ê chng-thāⁿ,

soe-chng-táⁿ-pān,

tián lí ê iau-kiau bí-lē?

Lí án-ni táⁿ-pān kiám ū-chhái-kang?

Lí ê ài-jîn kā lí pàng-sak,

beh siu-si̍p lí ê sìⁿ-miā.

31Góa thiaⁿ-kìⁿ chhin-chhiūⁿ sán-hū chhui-chūn

beh siⁿ thâu-chiūⁿ-kiáⁿ thàng-thiàⁿ ê siaⁿ,

sī Sek-an ê chū-bîn teh phi̍hⁿ-phe̍hⁿ-chhoán,

in chhun siang-chhiú, kóng, “Góa chhám ah!

Ū lâng beh lâi thâi góa, góa beh hūn--khì lah.”

Iâ-lī-bí-su 4 - 現代台語譯本羅馬字版(TTVR)-闽南语

Learn More About Us