Sū-su-kì 7

Sū-su-kì 7 - 現代台語譯本羅馬字版(TTVR)-闽南语

Ki-tiân Phah-pāi Bí-tiân-lâng

1 Iâ-lō͘-pa-le̍k, chiū-sī Ki-tiân, kap só͘-ū tè i ê lâng thàu-chá khí--lâi, tī Hap-lu̍t chúi-chôaⁿ piⁿ chat-iâⁿ; Bí-tiân-lâng tī in ê pak-pêng, óa-kūn Mô͘-lī-soaⁿ ê soaⁿ-kok chat-iâⁿ.

2Siōng Chú tùi Ki-tiân kóng, “Tè lí ê lâng siuⁿ chōe, góa bōe-tàng chiong Bí-tiân-lâng kau tī lín ê chhiú, chiah bián Í-sek-lia̍t-lâng tùi góa khoa-kháu, kóng, ‘Sī goán khò ka-kī thâi-iâⁿ--ê.’

3Lí tio̍h tùi jîn-bîn soan-pò͘, ‘Nā ū lâng kiaⁿ-sí, thang lī-khui Ki-lia̍t-soaⁿ tò--khì.’” Án-ni, chiū ū nn̄g-bān nn̄g-chheng lâng tò--khì, iáu chhun chi̍t-bān lâng.

4Siōng Chú tùi Ki-tiân kóng, “Lâng iáu siuⁿ chōe. Lí tio̍h chhōa in lo̍h-khì kàu chúi-piⁿ, góa beh tī hia ūi-tio̍h lí kéng chi̍t-kóa lâng. Góa kā lí kóng tó chi̍t ê lâng thang kap lí khì, hit-ê lâng chiū ōe-tàng kap lí khì; góa kā lí kóng tó chi̍t ê m̄-thang khì, hit-ê lâng chiū m̄-thang kap lí khì.”

5Ki-tiân chiū chhōa jîn-bîn khì kàu chúi-piⁿ; Siōng Chú tùi Ki-tiân kóng, “Hiah-ê chhin-chhiūⁿ káu ēng chi̍h chī-chúi ê lâng, khiā chi̍t pêng; kūi lo̍h-khì lim-chúi ê lâng, khiā lēng-gōa chi̍t pêng.”

6Ēng chhiú phóng-chúi khí-lâi chī--ê, ū saⁿ-pah lâng; kî-tha hiah-ê lóng kūi lo̍h-khì lim-chúi.

7Siōng Chú kā Ki-tiân kóng, “Góa beh ēng chiah-ê phóng-chúi khí-lâi chī ê saⁿ-pah lâng kái-kiù lín, chiong Bí-tiân-lâng kau tī lí ê chhiú; kî-tha ê lâng lóng thang tò-khì in tau.”

8Án-ni, lâu--lo̍h-lâi hit saⁿ-pah lâng tùi kî-tha ê lâng chiap niû-si̍t kap sàu-kak; Ki-tiân chiū kái-sàn kî-tha ê Í-sek-lia̍t-lâng, hō͘ in tò-khì in tau. Bí-tiân-lâng chat-iâⁿ tī Í-sek-lia̍t-lâng ē-bīn ê soaⁿ-kok.

9Hit-mî, Siōng Chú kā Ki-tiân kóng, “Khí--lâi, lo̍h-khì kong-táⁿ hit-ê peng-iâⁿ, in-ūi góa í-keng chiong in kau tī lí ê chhiú.

10Lí nā m̄-káⁿ chìn-kong, lí kap lí ê po̍k-jîn Phó͘-la tio̍h lo̍h-khì in ê peng-iâⁿ,

11chù-ì thiaⁿ in teh kóng sím-mi̍h, chiū ū tám-liōng lo̍h-khì kong-kek.” I chiū kap i ê po̍k-jîn Phó͘-la lo̍h-khì bú-chong pō͘-tūi ê iâⁿ-piⁿ.

12Kui-ê soaⁿ-kok lóng sī Bí-tiân-lâng, A-má-le̍k-lâng, kap tang-pêng ê pō͘-cho̍k, in chhin-chhiūⁿ chháu-meh hiah chōe; in ê lo̍k-tô chhin-chhiūⁿ hái-piⁿ ê soa sǹg bōe liáu.

13 Ki-tiân kàu ê sî, ū chi̍t ê Bí-tiân ê peng-á kā i ê tâng-phōaⁿ kóng i ê bāng, kóng, “Góa bāng-kìⁿ chi̍t ê bāng. Góa khòaⁿ-tio̍h chi̍t ê tōa-be̍h-piáⁿ kō-ji̍p Bí-tiân ê peng-iâⁿ, kā chi̍t ê pò͘-pîⁿ lòng-tó, pò͘-pîⁿ péng-lìn-tńg, tó kah pîⁿ-pîⁿ.”

14I ê tâng-phōaⁿ ìn kóng, “Che it-tēng sī Í-sek-lia̍t-lâng Iok-a-si ê kiáⁿ Ki-tiân ê to; Siōng-tè í-keng chiong Bí-tiân-lâng kap choân-kun kau tī i ê chhiú.”

15 Ki-tiân thiaⁿ-tio̍h hit-ê lâng ê bāng kap kóe-seh, chiū kūi-pài Siōng-tè. I tò-lâi Í-sek-lia̍t-lâng ê peng-iâⁿ, hoah kóng, “Khí--lâi! Siōng Chú í-keng chiong Bí-tiân ê kun-tūi kau tī lín ê chhiú lah.”

16I chiū chiong hit saⁿ-pah lâng pun-chòe saⁿ tūi, chiong sàu-kak kap khang àng-á kau hō͘ in ta̍k-ê lâng, àng-á lāi khǹg hé-pé.

17I kā in kóng, “Lín tio̍h khòaⁿ góa án-chóaⁿ chòe. Góa kàu iâⁿ-piⁿ ê sî án-chóaⁿ chòe, lín tio̍h chiàu án-ni chòe.

18Góa kap hiah-ê kap góa chòe-hé khì ê lâng pûn sàu-kak ê sî, lín tio̍h tī iâⁿ ê sì-ûi pûn sàu-kak, koh hoah, ‘Ūi Siōng Chú, ūi Ki-tiân!’”

19Tī pòaⁿ-mî í-chêng, ōe-peng tú-á ōaⁿ-pan liáu-āu, Ki-tiân kap tè i ê chi̍t-pah lâng lâi kàu iâⁿ-piⁿ. In chiū pûn sàu-kak, kòng-phòa chhiú--ni̍h ê àng-á;

20saⁿ tūi ê lâng lóng pûn sàu-kak, kòng-phòa àng-á, tò-chhiú gia̍h hé-pé, chiàⁿ-chhiú gia̍h sàu-kak; in tōa-siaⁿ hoah kóng, “Ūi Siōng Chú gia̍h to, ūi Ki-tiân gia̍h to.”

21In tī peng-iâⁿ ê sì-ûi, ta̍k-ê lâng khiā tī ka-kī ê só͘-chāi; choân-iâⁿ ê te̍k-kun ná hoah ná tô-cháu.

22Hit saⁿ-pah ê lâng pûn sàu-kak ê sî, Siōng Chú hō͘ Bí-tiân choân-iâⁿ ê lâng hō͘-siōng thâi-lâi-thâi-khì. Choân-iâⁿ ê lâng lóng tô-cháu khì Se-lī-la ê Pek Sī-tha, it-ti̍t kàu óa-kūn Tha-pa ê A-pek Bí-hô-la.

23 Í-sek-lia̍t-lâng tùi Ná-hut-tha-lī, A-siat, kap Má-ná-se só͘-ū ê tōe-khu chū-chi̍p, lâi tui-jip Bí-tiân-lâng.

24Ki-tiân phài sù-chiá kàu Í-hoat-liân soaⁿ-khu ta̍k só͘-chāi, kóng, “Lín lo̍h-lâi tui-jip Bí-tiân-lâng, kò͘-siú Iok-tàn-hô ê tō͘-kháu, it-ti̍t kàu Pek Pa-la, hông-chí Bí-tiân-lâng kè-hô.” Tùi án-ni, Í-hoat-liân-lâng chiū chū-chi̍p, kò͘-siú Iok-tàn-hô tō͘-kháu, ti̍t-kàu Pek Pa-la.

25In lia̍h-tio̍h Bí-tiân nn̄g ê léng-siù, Gô-li̍p kap Se-i-pek, tī Gô-li̍p ê chio̍h-pôaⁿ thâi Gô-li̍p, tī Se-i-pek ê chiú-khut thâi Se-i-pek; in koh tui-jip Bí-tiân-lâng, chiong Gô-li̍p kap Se-i-pek ê thâu-khak tòa-khì Iok-tàn-hô tang-pêng, kau hō͘ Ki-tiân.

Sū-su-kì 7 - 現代台語譯本羅馬字版(TTVR)-闽南语

Learn More About Us