Sū-su-kì 8

Sū-su-kì 8 - 現代台語譯本羅馬字版(TTVR)-闽南语

Phah-pāi Bí-tiân-lâng

1 Í-hoat-liân-lâng tùi Ki-tiân kóng, “Lí khì kap Bí-tiân-lâng kau-chiàn, ná bô kiò goán? Lí ná án-ni tùi-thāi goán?” In chiū kiông-lia̍t chí-chek Ki-tiân.

2Ki-tiân tùi in kóng, “Góa só͘ chòe--ê kap lín bōe-pí--tit. Í-hoat-liân khioh chhun--lo̍h-lâi ê phû-tô, kiám bô pí goán A-pí-í-siā-cho̍k ê lâng siu-sêng ê phû-tô khah hó?

3Siōng-tè í-keng chiong Bí-tiân nn̄g ê léng-siù Gô-li̍p kap Se-i-pek kau tī lín ê chhiú; góa só͘ chòe--ê kap lín kiám ōe-pí--tit?” Ki-tiân kóng chiah-ê ōe liáu-āu, in chiū bô koh siū-khì.

4 Ki-tiân kap tè i ê saⁿ-pah lâng kè Iok-tàn-hô; sui-jiân chin thiám, m̄-kú iáu kè-sio̍k tui-jip.

5Ki-tiân tùi So͘-kat-lâng kóng, “Chhiáⁿ lín the̍h chi̍t-kóa piáⁿ hō͘ tè góa ê kun-peng, in-ūi in chin ià-siān, góa mā teh tui-jip Bí-tiân nn̄g ê ông, Se-pa kap Sat-bō͘-ná.”

6 So͘-kat hiah-ê léng-siù ìn kóng, “Lí to iáu-bē lia̍h-tio̍h Se-pa kap Sat-bō͘-ná, goán ná tio̍h ēng piáⁿ hō͘ lí ê kun-tūi?”

7 Ki-tiân kóng, “Siōng Chú hō͘ góa lia̍h-tio̍h Se-pa kap Sat-bō͘-ná liáu-āu, góa chiū beh ēng khòng-iá ê chhì-phè kap tîn-tiâu kā lín sut.”

8I tùi hia khì kàu Pí-ló͘-i-le̍k, mā tùi in thê-chhut siâng-khoán ê iau-kiû; Pí-ló͘-i-le̍k-lâng mā ēng kap So͘-kat-lâng kâng-khoán ê ōe ìn i.

9I tùi Pí-ló͘-i-le̍k-lâng kóng, “Góa pêng-an tò--lâi ê sî, góa beh thiah chit-ê siâⁿ-lâu.”

10Hit-sî, Se-pa kap Sat-bō͘-ná, í-ki̍p in ê kun-tūi lóng tī Ka-kok, tāi-iok ū chi̍t-bān gō͘-chheng lâng, lóng sī tang-pêng ê pō͘-cho̍k chhun--lo̍h-lâi ê kun-peng; in gia̍h-to ê chiàn-sū í-keng sí cha̍p-jī-bān lâng.

11Ki-tiân tùi Ná-pa kap Iok-pí-hap tang-pêng, sūn siong-tūi ê lō͘ chiūⁿ--khì, thàn Bí-tiân ê kun-tūi bô teh kéng-kak ê sî kā in tu̍t-kek.

12Se-pa kap Sat-bō͘-ná chit nn̄g ê ông tô-cháu, Ki-tiân tui-jip in, lia̍h-tio̍h in, in ê kun-tūi pāi-thè sì-sòaⁿ.

13 Iok-a-si ê kiáⁿ Ki-tiân tùi chiàn-tiûⁿ, sūn Hi-lia̍t-su ê soaⁿ-phiâⁿ tò--lâi ê sî,

14lia̍h-tio̍h chi̍t ê So͘-kat ê siàu-liân-lâng, kā i cha-mn̄g; i chiū chiong So͘-kat chhit-cha̍p-chhit ê léng-siù kap tiúⁿ-ló ê miâ siá chhut-lâi kau hō͘ Ki-tiân.

15Ki-tiân kàu So͘-kat, tùi hia ê lâng kóng, “Lín í-chêng kā góa thí-chhiò, kóng, ‘Lí to iáu-bē lia̍h-tio̍h Se-pa kap Sat-bō͘-ná, goán ná tio̍h ēng piáⁿ hō͘ lín ià-siān ê kun-peng?’ Taⁿ lín khòaⁿ, Se-pa kap Sat-bō͘-ná tī chia.”

16I chiū lia̍h siâⁿ-lāi ê tiúⁿ-ló, ēng khòng-iá ê chhì-phè kap tîn-tiâu kà-sī So͘-kat-lâng;

17koh thiah Pí-ló͘-i-le̍k ê siâⁿ-lâu, thâi-sí siâⁿ-lāi ê lâng.

18 Ki-tiân mn̄g Se-pa kap Sat-bō͘-ná kóng, “Lín tī Tha-po̍k-soaⁿ thâi ê lâng siⁿ-chòe sím-mi̍h khoán?”

In ìn kóng, “Chhin-chhiūⁿ lí, ta̍k-ê lâng khòaⁿ--khí-lâi lóng chhin-chhiūⁿ ông-chú.”

19 Ki-tiân kóng, “In sī góa kâng-bú ê hiaⁿ-tī. Góa kí éng-oa̍h ê Siōng Chú chiù-chōa, lín nā ū lâu in ê sìⁿ-miā, góa chiū bōe thâi lín.”

20I chiū kā i ê tōa-kiáⁿ Ek-thiap kóng, “Kā in thâi-sí!” M̄-kú Ek-thiap kiaⁿ, m̄-káⁿ pu̍ih to, in-ūi i iáu siàu-liân.

21 Se-pa kap Sat-bō͘-ná kā Ki-tiân kóng, “Lí ka-kī tāng-chhiú. Lí chiah ū-kàu la̍t.” Ki-tiân chiū khí-lâi thâi-sí Se-pa kap Sat-bō͘-ná, chiong in ê lo̍k-tô ām-kún ge̍h-bâi-hêng ê chng-thāⁿ the̍h--khì.

22 Í-sek-lia̍t-lâng tùi Ki-tiân kóng, “Lí í-keng kiù goán thoat-lī Bí-tiân-lâng, chhiáⁿ lí kap lí ê kiáⁿ, lí ê sun thóng-tī goán.”

23 Ki-tiân kóng, “Góa bô beh thóng-tī lín, góa ê kiáⁿ mā bô beh thóng-tī lín; chí-ū Siōng Chú chiah sī lín ê thóng-tī-chiá.”

24Ki-tiân koh tùi in kóng, “Góa ū chi̍t hāng iau-kiû, chhiáⁿ lín ta̍k-ê lâng chiong chhiúⁿ--tio̍h ê hī-khoân hō͘ góa.” (In ê tùi-te̍k Í-si̍t-má-lī-lâng ū chit-khoán kim ê hī-khoân.)

25In kóng, “Goán chin hoaⁿ-hí hō͘ lí.” In chiū chhu chi̍t niá gōa-saⁿ, ta̍k-ê lâng chiong chhiúⁿ--lâi ê hī-khoân hiat tī hit téng-bīn.

26Jîn-bîn hō͘ Ki-tiân ê kim hī-khoân, tāi-iok jī-cha̍p kong-kun; í-gōa koh ū Bí-tiân-ông ge̍h-bâi-hêng ê chng-thāⁿ, hī-tūi, chí-sek ê gōa-phàu, kap lo̍k-tô ām-kún ê liān-á.

27Ki-tiân ēng chiah-ê kim-á chè-chō chi̍t ê í-hut-tek, hē tī i ê pún-siâⁿ Gô-hut-la; āu-lâi Í-sek-lia̍t-lâng lóng khì hia pài hit-ê í-hut-tek pōe-poān Siōng-tè; chit-ê tāi-chì chiâⁿ-chòe Ki-tiân kap i choân-ke ê lô-bāng.

28Án-ni, Bí-tiân-lâng siū Í-sek-lia̍t-lâng chè-ho̍k, bô-la̍t thang koh hoán-khòng. Tī Ki-tiân oa̍h--teh ê ji̍t, hit-ê tōe-khu thài-pêng sì-cha̍p nî.

Ki-tiân Sí

29 Iok-a-si ê kiáⁿ Ki-tiân tò-khì tòa tī i ka-kī ê chhù.

30Ki-tiân chhōa chin chōe bó͘, ū siⁿ chhit-cha̍p ê kiáⁿ.

31I tī Sī-kiàm ê sòe-î mā kā i siⁿ chi̍t ê kiáⁿ, i kā hō-miâ kiò-chòe A-pí-bí-le̍k.

32Iok-a-si ê kiáⁿ Ki-tiân nî-lāu hè-siū chōe, chiū sí; lâng kā i an-chòng tī A-pí-í-siā-cho̍k ê Gô-hut-la, in lāu-pē Iok-a-si ê bōng.

33 Ki-tiân sí liáu-āu, Í-sek-lia̍t-lâng pōe-poān Siōng-tè, khì pài Pa-le̍k, ēng Pa-le̍k Pí-lī-thó͘ chòe in ê sîn-bêng.

34Í-sek-lia̍t-lâng bōe-kì-tit kái-kiù in thoat-lī sì-ûi tùi-te̍k ê Siōng Chú — in ê Siōng-tè,

35mā bô in-ūi Iâ-lō͘-pa-le̍k, chiū-sī Ki-tiân, ūi-tio̍h Í-sek-lia̍t-lâng chòe ê hó-sū, hó khoán-thāi i ê ka-têng.

Sū-su-kì 8 - 現代台語譯本羅馬字版(TTVR)-闽南语

Learn More About Us