Sat-ka-lī-a-su 11

Sat-ka-lī-a-su 11 - 現代台語譯本羅馬字版(TTVR)-闽南语

Pō-kun ê Soe-pāi

1 Lê-pa-lūn, phah-khui lí ê mn̂g,

hō͘ hé sio lí ê pek-hiuⁿ-chhiū.

2Siông-chhiū ah, tōa-siaⁿ háu,

in-ūi pek-hiuⁿ-chhiū í-keng tó--lo̍h-khì,

súi ê chhiū í-keng tó-hoāi.

Pa-san ê siōng-chhiū, tōa-siaⁿ háu,

in-ūi bō͘-sēng ê chhiū-nâ í-keng chhò-liáu-liáu.

3Thiaⁿ leh, ū bo̍k-chiá teh ai-chhan,

in-ūi chhiⁿ-chhùi ê chháu-po͘ siū húi-hoāi.

Thiaⁿ leh, ū béng-sai hm̄-hm̄-háu,

in-ūi Iok-tàn hô-piⁿ ê chhiū-nâ í-keng hong-hòe.

Nn̄g Ê Bo̍k-chiá

4Siōng Chú — góa ê Siōng-tè án-ni kóng, “Tio̍h bo̍k-ióng beh hō͘ lâng thâi ê iûⁿ-kûn,

5in-ūi kā in bóe khì thâi ê lâng bô siūⁿ-kóng ka-kī ū-chōe; bōe-in--ê kóng ‘Tio̍h chheng-chàn Siōng Chú, in-ūi góa hó-gia̍h lah’; liân in ê bo̍k-chiá mā bô khó-lîn in.”

6Siōng Chú koh kóng, “Góa bōe koh lîn-bín chit só͘-chāi ê chū-bîn. Góa beh kā in lóng kau hō͘ keh-piah-kok kap in ê thóng-tī-chiá, hō͘ in lâi húi-bia̍t chit-ê tōe; góa mā bô beh kiù in thoat-lī tùi-te̍k ê chhiú.”

7Tùi án-ni, góa bo̍k-ióng beh hō͘ lâng thâi ê iûⁿ-kûn, te̍k-pia̍t sī iûⁿ-kûn tiong siōng khùn-khó͘--ê. Góa the̍h nn̄g ki koáiⁿ-á bo̍k-ióng chiah-ê iûⁿ-kûn, chi̍t ki kiò-chòe “Un-hūi”, chi̍t ki kiò-chòe “liân-ha̍p”.

8Chi̍t ge̍h-ji̍t lāi, góa khai-tû saⁿ ê bo̍k-chiá, in-ūi góa bōe-tàng koh iông-jím in, in mā thó-ià góa.

9Góa kóng, “Góa bô beh bo̍k-ióng lín. Teh-beh sí--ê chhut-chāi i sí; beh bia̍t-bông--ê, chhut-chāi i bia̍t-bông; chhun--ê, hō͘ in hō͘-siōng thun-chia̍h.”

10Góa chiū at-chi̍h hit-ki kiò-chòe “Un-hūi” ê koáiⁿ-á, piáu-sī Siōng Chú hòe-tû kap bān-bîn só͘ li̍p ê iok.

11Hit-ji̍t, chit-ê iok chiū hòe-tû. Hiah-ê teh gióng-bōng góa ê siōng khùn-khó͘ ê iûⁿ-kûn, chiū chai che sī Siōng Chú ê sìn-sit.

12Góa tùi in kóng, “Lín nā tông-ì, chiū hō͘ góa kang-chîⁿ; nā bô, chiū soah.” In chiū sǹg hō͘ góa saⁿ-cha̍p ê gûn-á chòe góa ê kang-chîⁿ.

13Che sī in só͘ kó͘-kè ê hó kè-siàu. Siōng Chú kā góa kóng, “Chiong gûn-á hiat hō͘ sio-hûi-lâng.” Góa chiū the̍h hit saⁿ-cha̍p ê gûn-á tī Siōng Chú ê sèng-tiān hiat hō͘ sio-hûi-lâng.

14Góa koh at-chi̍h kiò-chòe “Liân-ha̍p” ê tē-jī ki koáiⁿ-á, piáu-sī Iû-tāi kap Í-sek-lia̍t ê hiaⁿ-tī-koan-hē í-keng chhiat-tn̄g.

15Siōng Chú koh kā góa kóng, “Tio̍h kā hit-ê bô lō͘-ēng ê bo̍k-chiá só͘ ēng ê khì-khū the̍h--khí-lâi.

16Góa beh tī chit-ê kok-ka heng-khí chi̍t ê bo̍k-chiá. Teh-beh sí--ê, i bô khòaⁿ-kò͘; sit-bê--ê, i bô chhiau-chhē; siū-siong--ê, i bô i-tī; ióng-chòng--ê, i bô iúⁿ-chhī; kan-ta beh chia̍h pûi-iûⁿ ê bah, thiah-li̍h in ê tôe.

17Pàng-sak iûⁿ-kûn, bô lō͘-ēng ê bo̍k-chiá, chhám ah!

I ê chhiú-kut ōe hō͘ to thâi, khê--khì;

chiàⁿ-ba̍k hō͘ to siong, sit-bêng.”

Sat-ka-lī-a-su 11 - 現代台語譯本羅馬字版(TTVR)-闽南语

Learn More About Us