Iok-pek-kì 34

Iok-pek-kì 34 - 現代台語譯本羅馬字版(TTVR)-闽南语

1 Í-lī-hō͘ koh kóng:

2Lín ū tì-hūi ê lâng, tio̍h thiaⁿ góa ê ōe;

ū tì-sek ê lâng tio̍h chù-ì thiaⁿ.

3Lán ēng hī-khang thiaⁿ-chhut ì-sù,

ēng chi̍h chhì-chhut chu-bī.

4Lán tio̍h piān-pia̍t sím-mi̍h sī tio̍h,

bêng-pe̍k sím-mi̍h sī hó.

5In-ūi Iok-pek kóng, “Góa bô m̄-tio̍h,

Siōng-tè khiok kū-choa̍t góa ê sin-sò͘.

6Góa bô m̄-tio̍h, I iáu khòaⁿ góa chòe pe̍h-chha̍t;

góa bô kè-sit, iáu-kú siū-tio̍h bōe-i--tit ê siong.”

7Siáⁿ-lâng chhin-chhiūⁿ Iok-pek móa-chhùi thí-chhiò,

ká-ná teh lim-chúi?

8I kap siâ-ok ê lâng tàu-tīn,

kap pháiⁿ-lâng lâi-óng;

9in-ūi i bat kóng, “Lâng in-ūi chhin-kūn Siōng-tè lâi hoaⁿ-hí,

lóng bô lī-ek.”

10Só͘-í, lín bêng-lí ê lâng, tio̍h thiaⁿ góa ê ōe.

Siōng-tè choa̍t-tùi bōe chòe pháiⁿ;

Choân-lêng-chiá it-tēng bōe kiâⁿ put-gī.

11I ōe chiàu lâng ê hêng-ûi kā i pò-èng,

chiàu lâng ê kiâⁿ-chòe kā i tùi-thāi.

12Siōng-tè it-tēng bōe chòe m̄-tio̍h;

Choân-lêng-chiá bōe tian-tò sī-hui.

13Kiám ū lâng chí-phài Siōng-tè chiáng-koán tāi-tōe?

Kiám ū lâng chiong choân sè-kài kau-tài I?

14Siōng-tè nā chiong I ê sîn kap khùi siu-hôe,

15só͘-ū ê lâng lóng ōe bia̍t-bông,

lâng lóng ōe kui-thó͘.

16Lí nā bêng-lí, tio̍h thiaⁿ góa kóng,

àⁿ hī-khang thiaⁿ góa beh kóng ê ōe:

17Siōng-tè nā iàm-ò͘ⁿ kong-pêng, I kiám ōe-tàng tī-lí?

I sī kong-gī koh ū koân-lêng, lí kiám ōe-tàng kā I tēng-chōe?

18Siōng-tè ōe-tàng tùi kun-ông kóng “Lí sī pháiⁿ-lâng”,

tùi kùi-cho̍k kóng “Lín chin ok-to̍k”.

19I tùi-thāi ū koân-sè ê lâng bōe phian-su,

mā bōe tiōng-hù-kheng-pîn,

in-ūi in lóng sī I ê chhiú só͘ chō--ê.

20In tī pòaⁿ-mî hut-jiân sí--khì;

Siōng-tè tī hūn-loān tiong kā in siau-bia̍t.

I m̄-bián ēng lâng ê chhiú chiū ōe châu-bia̍t ū koân-le̍k ê lâng.

21Siōng-tè ê ba̍k-chiu chù-ì khòaⁿ ta̍k-ê lâng ê lō͘,

kàm-chhat in ê kha-pō͘.

22O͘-àm á-sī sí-ìm,

lóng bōe-tàng hō͘ chòe pháiⁿ ê lâng bih.

23Siōng-tè m̄-bián tēng sî-kan,

sûi-sî ōe-tàng tiàu lâng lâi siū I sím-phòaⁿ.

24I m̄-bián chhâ-mn̄g chiū ōe-tàng thiat-tóe táⁿ-tó ū koân-le̍k ê lâng,

siat-li̍p pa̍t-lâng lâi chiap in ê ūi.

25In-ūi I chai in ê hêng-ûi;

it-iā-chi-kan kā in chhia-tó, in chiū bia̍t-bông.

26I tī chèng-lâng ê ba̍k-chiu chêng phah in,

in-ūi in ê chōe kā in hêng-hoa̍t.

27In phian-lī bô tè I,

bô ài kiâⁿ I ê tō-lō͘,

28tì-kàu sàn-chhiah-lâng âu-kiò ê siaⁿ thàu kàu I ê bīn-chêng;

I ū thiaⁿ-tio̍h khùn-khó͘ ê lâng ê âu-kiò.

29Siōng-tè nā tiām-tiām, siáⁿ-lâng káⁿ kā I chí-chek?

I nā bīn oa̍t-cháu m̄ chhap lán, siáⁿ-lâng ōe tit-tio̍h I koàn-kò͘?

Bô-lūn kok-ka á-sī kò-jîn, Siōng-tè lóng ū teh kàm-chhat,

30chiah bián bô kèng-ùi I ê lâng chòe thóng-tī-chiá,

hām-hāi jîn-bîn.

31Lí kiám ū tùi Siōng-tè kóng

“Góa í-keng siū hêng-hoa̍t, bōe koh hoān-chōe;

32góa khòaⁿ bōe tio̍h--ê, kiû lí chí-sī;

góa nā ū chòe m̄-tio̍h, góa bōe koh chòe”?

33Kiám sī Siōng-tè só͘ chòe--ê bô chiàu lí ê ì-sù, lí chiah m̄ hóe-kái?

Tio̍h koat-tēng--ê sī lí, m̄-sī góa;

lí chai--ê, chòe lí kóng.

34Bêng-lí ê lâng tùi góa kóng;

tì-hūi ê lâng thiaⁿ góa ê ōe chiū kóng,

35“Iok-pek kóng--ê bô tì-sek,

I ê ōe bô tì-hūi.

36 Iok-pek tio̍h thiat-tóe siū chhì-giām,

in-ūi i ê ìn-tap chhin-chhiūⁿ siâ-ok ê lâng.

37I chōe-siōng-ka-chōe,

tī lán tiong-kan chè-chō khùn-jiáu,

koh kóng chin chōe ōe te̍k-tùi Siōng-tè.”

Iok-pek-kì 34 - 現代台語譯本羅馬字版(TTVR)-闽南语

Learn More About Us