FAAALIGA, 7 - Samoan Old Version Bible

O LE MATAUPU VII.Ua faailogaina auauna a le Atua.

1Ua mavae atu ia mea, ona a‘u iloa ai lea o agelu e toafa o tutū mai i itu e fa o le lalolagi, o taofi i matagi e fa o le lalolagi, ina ia le agi atu le matagi i le fanua, po o le sami, po o se laau e tasi.

2Ua a‘u iloa foi le tasi agelu ua ui ae i le mea e alu ae ai le la, ua ia te ia le faamaufaailoga a le Atua soifua; ua alaga ia ma le leo tele i agelu e toafa na tuuina atu ia i latou ia faaleaga i le fanua ma le sami,

3ua faapea atu, Aua tou te faaleaga i le fanua, po o le sami, po o laau, seia matou faamaufaailogaina auauna a lo tatou Atua i o latou muaulu.

4Na ou faalogo foi i le faitau aofai o e na faamaufaailogaina; e selau afe ma afe e fagafulu ma afe e fa o e ua faamaufaailogaina i itu aiga uma o le fanauga a Isaraelu;

5e sefulu afe ma afe e lua o e ua faamaufaailogaina i le itu aiga o Iuta; e sefulu afe ma afe e lua o e ua faamaufaailogaina i le itu aiga o Reupena; e sefulu afe ma afe e lua o e ua faamaufaailogaina i le itu aiga o Kato;

6e sefulu afe ma afe e lua o e ua faamaufaailogaina i le itu aiga o Asera; e sefulu afe ma afe e lua o e ua faamaufaailogaina i le itu aiga o Nafatali; e sefulu afe ma afe e lua o e ua faamaufaailogaina i le itu aiga o Manase;

7e sefulu afe ma afe e lua o e ua faamaufaailogaina i le itu aiga o Simeona; e sefulu afe ma afe e lua o e ua faamaufaailogaina i le itu aiga o Levi; e sefulu afe ma afe e lua o e ua faamaufaailogaina i le itu aiga o Isakara;

8e sefulu afe ma afe e lua o e ua faamaufaailogaina i le itu aiga o Sepulona; e sefulu afe ma afe e lua o e ua faamaufaailogaina i le itu aiga i Iosefa; e sefulu afe ma afe e lua o e ua faamaufaailogaina i le itu aiga o Peniamina.

9Ua mavae atu ia mea, ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamai mamoe, ua oofu i latou i ofu sisina, ua i ai foi lau pama i o latou lima;

10ua latou alalaga foi ma leo tetele, ua faapea atu, O i ai le faaolataga i lo tatou Atua o lē tietie i le nofoālii, atoa ma le Tamai mamoe.

11Ua tutū faataaliolio agelu uma i le nofoālii ma le au toeaina ma mea ola e fa, ua latou faapaū fao i luma o le nofoālii, ma ifo atu i le Atua,

12ua faapea atu, Amene; Ia i lo tatou Atua le faamanū, ma le viiga, ma le poto, ma le faafetai, ma le mamalu, ma le mana, ma le malosi e faavavau faavavau lava. Amene.

13Ona fai mai ai lea o le tasi o le au toeaina, ua faapea mai ia te au, O i latou ia e ua oofu i ofu sisina, o ai ea i latou, po o fea foi na latou o mai ai?

14Ona ou faapea atu ai lea ia te ia, Le Alii e, ua e silafia. Ona faapea mai ai lea o ia ia te au, O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe.

15O le mea lea ua latou i luma ai o le nofoālii o le Atua, ua latou auauna foi ia te ia i lona malumalu i le ao ma le po; o lē tietie foi i le nofoālii e mau ma i latou.

16Latou te le toe fia aai, e le toe fia inu foi e le ogotia i latou i le la, po o se tasi vevela;

17auā o le Tamai mamoe o loo i luma o le nofoālii na te fafaga ia i latou, ma ta‘ita‘i ia te i latou i puna o vai ola; e sōloieseina foi e le Atua o loimata uma nai o latou mata.