1Le aiga o Isaraelu e, ia outou faalogologo i lenei upu ou te sauni atu ai ia te outou, o le pese e aualofa a‘i lava.
2Ua paū le taupou o Isaraelu, e le toe tulai; ua taatia o ia i lona laueleele, e leai se na te faatulaiina o ia.
3Auā o loo faapea mai le Alii o Ieova, O le aai na o atu ai le toaafe, e totoe le toaselau; i le ma le aai na o atu ai le toaselau, e totoe le toatinoagafulu i le aiga o Isaraelu.
4Auā o loo faapea mai Ieova i le aiga o Isaraelu, Ia outou saili mai ia te au, tou te ola ai.
5A e aua le saili ia Peteli, aua le o i Kilikala, aua foi le ui atu i Peresepa; auā e matuā tāfea Kilikala, e iu vale Peteli.
6Ia outou saili ia Ieova, tou te ola ai, ina ne‘i oo atu o ia pei se afi i le aiga o Iosefa, ma faaumatia ai, e leai foi se tasi i Peteli na te tineia.
7O outou o e liliu le faamasinoga i laena, ma lafo i lalo le amiotonu i le eleele,
8ia outou saili i le na na faia Kima ma Kisila; o le na te liua le ata o le oti i le taeao, ma faapouliuligia le ao peiseai ua po; o le na te valaauina le suāsami o le sami, ma liligi ifo ai i le fogāeleele; o Ieova o lona suafa lea.
9O le na te faaoo faafuasei atu le faatafunaga i le ua malosi, ona oo atu ai lea o le faatafunaga i le ‘olo.
10Ua latou ita atu i le ua aoai i le faitotoa; ma ua latou ‘ino‘ino i le ua tautala faamaoni.
11O lenei foi, ua outou soli i le ua vaivai, mona ua outou tali foi ia te ia o taulaga saito; o le mea lea e ui ina faia e outou o fale maa talai, a e tou te le nonofo ai; ua outou totōina tovine lelei, a e tou te le inu uaina ai.
12Auā ua ou iloa a outou agasala ua matuā tele, ma a outou amio e matuā leaga; o loo faasaua i le ua amiotonu, ua talia se taui, ma ua faafoi atu i e ua matitiva o i le faitotoa.
13O le mea lea e faalologo ai le ua poto i ia ona po; auā e leaga ia ona po.
14Ia outou saili i le lelei, a e le o le leaga, ina ia ola ai outou; ona i ai lea ia te outou o Ieova o le Atua o ‘au, e pei ona outou fai mai ai.
15Ia outou ‘ino‘ino i le leaga, a e loto atu i le lelei, ma ia outou faatumau le faamasinoga i le faitotoa; atonu e alofa Ieova le Atua o ‘au i e ua totoe ia Iosefa.
16O le mea lea o loo faapea mai ai Ieova, le Atua o ‘au, o le Alii lava, E pa le lauaitu i ala uma lava; latou te faapea ane i ala tele uma, Aue! aue! latou te valaau foi i lē galue i fanua ia te faanoanoa; ma e ua iloa pese e au alofa a‘i, ia tagitu‘i i latou.
17E pa foi le lauaitu i tovine uma, auā ou te ui atu ia te oe, o loo fetalai mai ai Ieova.
18Talofa ia te outou o e mananao i le aso o Ieova! Se a ea lona aoga ia te outou? O le aso o Ieova, o le pouliuli lea, a e le o le malamalama.
19E pei o le tagata ua sola ese i le leona, a ua la fetaiai ma le urosa; pe ulufale atu i le fale, ma totoo ai lona lima i le pa puipui, ona utia ai lea o ia i le gata.
20E le o le pouliuli ea le aso o Ieova, a e le malamalama; e pogisa lava, e leai sona pupula?
21Ua ou ‘ino‘ino, ua leaga ia te au o outou tausamiga; ou te le fiafia i o outou faapotopotoga.
22E ui ina outou au mai ia te au o taulaga mu, ma a outou taulaga i mea e ‘ai, ou te le talia; o le taulaga faafetai i a outou manu pepeti, ou te le vaai atu i ai.
23Ia e ave ese ia te au le taalili o ou pese; o le leo mălie foi o au napeli ou te le faalogo ai.
24A ia tafe ifo le faamasinoga e pei o vai, ma le amiotonu e pei o le vai e tafe tetele lava.
25Le aiga o Isaraelu e, pe na outou au mai ea ia te au o taulaga, ma taulaga i mea e ‘ai i le vao i tausaga e fagafulu?
26Na outou tauave lava le malumalu o lo outou Moloka, ma Kiuna, o outou tupua, o le fetu o lo outou atua na outou faia mo outou.
27Ou te faatāfeaina outou i ona tala atu o Tamaseko, o loo fetalai mai ai Ieova, o le Atua o ‘au, o lona suafa lea.
Who We AreWhat We EelieveWhat We Do
2025 by iamachristian.org,Inc All rights reserved.
