1Ua mavae le sapati, ua tafa ata o le uluai aso o le vaisapati, ona o atu ai lea o Maria le Makatala, ma le isi Maria e asiasi i le tuugamau.
2Faauta foi, ua to le mafuie tele; auā na alu ifo le agelu a le Alii mai le lagi, ua alu atu, ma fuli ese le maa i le gutu o le tuugamau, ma tietie i ona luga.
3E pei o le uila lona tino mai, ma ona ofu ua sinasina pei o le kiona;
4ua tetemu foi i le matatau ia te ia o e na leoleo, ua liua i latou e pei o tagata oti.
5Ona fai atu ai lea o le agelu i fafine, ua faapea atu, Aua lua te matatau oulua; auā ua ou iloa ua oulua sailia mai Iesu na faasatauroina.
6E le o iinei o ia; auā ua toe tu mai o ia, pei ona fetalai atu ai o ia. O mai, ina matamata i le mea na tuu ai le Alii.
7Ina o atu ia ia vave, lua te ta‘u atu i ona soo, ua toe tu mai o ia nai e ua oti; faauta foi, e muamua atu ia ia te outou i Kalilaia; tou te iloa ai o ia i lea mea; faauta, ua ou fai atu ia te oulua.
8Ona la vave o ai lea nai le tuugamau ma le fefe ma le fiafia tele; ua la taufetuli e ta‘u atu ai i ona soo.
9Ua la o e ta‘u atu ai i ona soo, faauta foi, ua fetaiai Iesu ma i laua, ua faapea atu, Si o‘u alofa. Ona la o mai ai lea ua fetagofi i ona vae, ma ifo mai ia te ia.
10Ona fetalai atu ai lea o Iesu ia te i laua, Aua lua te matatau; ina o atu ia, lua te ta‘u atu i o‘u uso, ina ia latou o atu i Kalilaia, latou te iloa mai ai a‘u.
11Ua la o; faauta, ua o atu i le aai nisi o e na leoleo, ua ta‘u atu i le au faitaulaga sili mea uma ua faia.
12Ona latou faapotopoto ai lea faatasi ma toeaina, ua latou filifili, ona avatu ai lea o tupe e tele i le ‘au,
13ua faapea atu, Ia outou ta‘uta‘u atu, Na o mai ona soo i le po ua gaoi ia te ia, a o matou momoe.
14Afai e faalogo i ai le alii, matou te faaoleole atu ia te ia, ma faasao ia te outou.
15Ona latou talia lea o tupe, ma latou faia e pei ona a‘oa‘oina ai o i latou; ua salalau foi lea tala i tagata Iutaia ua oo mai lava i nei ona po.
16Ona o atu ai lea o le au soo e toasefulu ma le toatasi i Kalilaia, i le mauga na poloai atu ai Iesu ia te i latou.
17Ua latou iloa o ia, ona latou ifo mai ai lea ia te ia; a ua masalosalo nisi.
18Ona maliu ane ai lea o Iesu, ua fetalai atu ia te i latou, ua faapea atu, Ua tuuina mai ia te au le pule uma lava i le lagi ma le lalolagi.
19O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia;
20ia outou a‘oa‘o atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi. Amene.
Who We AreWhat We EelieveWhat We Do
2025 by iamachristian.org,Inc All rights reserved.
