1Pe afai e gaoi se tagata i se povi po o se mamoe, ma fasi, pe faatau ai, ia toe taui mai e ia e lima povi e sui a‘i le povi, e fa foi mamoe e sui a‘i le mamoe.
2Pe afai e maua se gaoi a o eli e ia i le pa o le fale, a e fasia o ia ma oti ai; aua le sasaa se toto e sui a‘i o ia.
3A e afai ua alu ae le la, a o i ai o ia, e sasaa ai le toto e sui a‘i o ia; ia matuā avatu se totogi e ia; a leai sana mea, ia faatauina o ia e sui a‘i lona gaoi.
4Pe afai e maua lava, o loo ia te ia le mea na ia gaoia, o se povi, po o se asini, po o se mamoe, o loo ola, ia totogi ane ai e ia tailua.
5Pe afai e faasaunoa e se tasi le fanua po o le tovine, ma tuu atu ai lana manu, ma faasaunoa le fanua o se tasi, ia totogi atu e ia i mea e sili ona lelei i lona fanua, ma le mea e sili ona lelei i lona tovine.
6Pe afai e mu se afi, e maua ai laau tuitui e susunu ai le faupuegāsaito, po o le saito o loo tu, po o le fanua; ia totogi atu lava e le na mu ai le afi.
7Pe afai e tuuina atu e se tagata ni tupe po o oloa i le la te tuaoi, na te tausia, a e gaoia nai le fale o lea tagata; a iloa le na gaoi, ia totogi atu lava e ia ia tailua.
8Afai e le iloa le gaoi ae alu ane le matai o le fale i faamasino, ina ia iloa po ua tago atu o ia i le oloa a lē la te tuaoi.
9O mea uma lava e tupu ai le agaleaga, po o se povi, po o se asini, po o se mamoe, po o se ofu, po o se tasi mea ua le iloa, e fai ane ai se tasi o lana lava lea, e avatu ai le upu a laua i faamasino, i le o le ua faasalaina e faamasino, ia totogi atu lava e ia i lē la te tuaoi e tailua.
10Pe afai e tuuina atu e se tagata se asini, po o se povi, po o se mamoe, po o se tasi manu i le la te tuaoi, na te tausia, a mate, pe gau, po ua avea, a e lei iloa e se tasi;
11ona fai lea e ia o le tauto ia Ieova, na ia le tago atu i le mea a lē la te tuaoi, ia talia lea e lē ana le manu, aua le tauia.
12A e afai ua gaoia lava nai ia te ia, ia totogi atu i lē ana le manu.
13Afai ua saeia lava, ia au mai e ia e faamaoni ai; o le mea na saeia e le tauia lea.
14Pe afai e nono e se tasi se mea mai lē la te tuaoi, a gau lea mea, pe mate, a o le i ai lē ana le manu, ia totogi lava lea.
15Afai o i ai lava lē ana le manu, aua le totogi ia te ia; afai na au mai ina ia fai se totogi, ua oo mai ia te ia o lona fai totogi.
16Pe afai e faaoleole se tasi i se taupou, e lei fāufautane, ua la momoe foi ma ia; ia avatu lava e ia le oloa e faatau ai ia te ia e fai mana avā.
17A e afai e le mafai lava lona tamā ona avatu o ia ia te ia, ia avatu i ai e ia tupe e tusa ma le oloa e avatu ai i le taupou.
18Aua lava ne‘i ola se taulāitu fafine.
19Ai se tasi la te momoe ma se manu, ia fasiotia lava ia.
20O se fai taulaga i se isi atua, ia fano lava ia; ua na o Ieova lava e fai taulaga i ai.
21Aua le agaleaga, pe faasaua i se tagata ese; auā sa fai ma tagata ese outou i le nuu o Aikupito.
22Aua le agaleaga i se fafine ua oti lana tane, po o se mātuaoti.
23Afai e te agaleaga lava i ai, ona alaga mai lea o ia ia te au, ou te faalogo lava i lona alaga mai.
24E matuā tupu ai lo‘u ita, ou te fasioti ai foi ia te outou i le pelu, e avea foi a outou avā o fafine ua oti a latou tane, o la outou fanau foi e mātuaoti.
25Pe afai e te avatu tupe i se tagata mativa o lo‘u nuu lua te felatai; aua e te tagi ia te ia i se totogi faasili; aua foi e te fai atu ai ia te ia i se totogi faasili.
26Pe afai ua ia te oe le ofu o lē lua te tuaoi na tuu faafaatau, ia e toe avatu lava ia te ia, a o lei goto le la;
27auā o lona pulupulu lava lea, o le ofu o lona lava tino; se a se mea a afu ai o ia? Pe a alaga mai o ia ia te au ou te faalogo i ai; auā ou te alofa lava a‘u.
28Aua e te faifai i faamasino, pe fetuu i le alii sili o lou nuu.
29Aua e te faatuai mai le faapolopolo o le fua o lou fanua, atoa ma lau suāvine; o le ulumatua i ou atalii e te tuuina mai mo‘u.
30E te faia faapea foi i lau povi ma lau mamoe, e tuu pea ia i le aumatua i aso e fitu; a o le aso valu e te au mai ai ma‘u.
31E fai outou ma tagata paia mo a‘u; aua foi tou te aai se manu na saeia i le vao; ia lafo lava lea i ulī.
Who We AreWhat We EelieveWhat We Do
2025 by iamachristian.org,Inc All rights reserved.
