1Ona fai atu ai lea o Tavita, O le fale lenei o Ieova le Atua, o le fata faitaulaga foi lenei o le taulaga mu mo Isaraelu.
2Ua fai atu foi Tavita ia faapotopotoina tagata ese ua i le nuu o Isaraelu; ma ia togia tufuga talai maa e teuteua maa ua talai e ati ae le fale o le Atua.
3Ua saunia foi e Tavita o uamea e tele e fai a‘i fao o puipui o faitotoa, ma mea e sosoo a‘i; ma ‘apa memea e tele e le fuatia;
4ma laau o arasi e le faitaulia; auā na au mai e sa Saitonū ma tagata o Turo, o laau o arasi e tele ia Tavita.
5Ua fai atu Tavita, O Solomona lo‘u atalii o le tama itiiti ma le vaivai o ia; o le fale foi e faia mo Ieova e tele, e maualuga, e ta‘ua, ma le matagofie i nuu uma; o lea ou te sauniuni ai. Ona sauniuni ai lea e Tavita o mea e tele, a o lei oti o ia.
6Ua valaau atu foi o ia ia Solomona lona atalii, ma ua fai atu ia te ia e fai le fale mo Ieova le Atua o Isaraelu.
7Ua fai atu foi Tavita ia Solomona, Lo‘u atalii e, o a‘u nei, sa i lo‘u loto e fai se fale mo le suafa o Ieova lo‘u Atua;
8a ua oo mai ia te au le afioga a Ieova, ua faapea mai, Ua faamaligiina e oe toto e tele, ma taua e tele ua e faia; e te le faia se fale mo lo‘u igoa, auā ua faamaligiina e oe toto e tele i le eleele i o‘u luma.
9Faauta, ua fanauina le atalii mo oe, o le tagata filemu lava ia; ou te avatua ia te ia le filemu ia te i latou uma e fai o ia mo latou fili e vagavagai mai ia te ia; auā o lona igoa o Solomona, ou te avatu foi le toafilemu ma le mapusaga ia Isaraelu i lana nofoaiga.
10O ia na te faia le fale mo lo‘u igoa; e fai foi o ia mo‘u atalii, e fai foi a‘u mona tamā; ou te faatumauina foi le nofoālii o lona malo ia Isaraelu e faavavau.
11O lenei, lo‘u atalii e, ia ia te oe Ieova; ia manuia oe, ma ia e faia le fale o Ieova lou Atua, e tusa ma lana afioga ia te oe.
12Tau ina ia foai ia te oe e Ieova o le poto ma le mafaufau, ma ia poloai ia te oe ia Isaraelu, ina ia e tausi le tulafono a Ieova lou Atua.
13Ona manuia ai lea o oe, pe afai e te tausi e fai ai tulafono ma faamasinoga na poloai mai ai Ieova ia Mose ia Isaraelu; ia faamalosi, ma ia loto tele; aua le fefe, aua le mata‘u.
14Faauta foi, ua saunia e a‘u ma lo‘u tiga, mo le fale o Ieova o taleni o auro e selau o afe, ma taleni o ario e afe o afe, ma ‘apa memea ma uamea e le fuatia ina ua tele lava; ua ou saunia foi laau ma maa; e te faaopoopo i ai foi.
15O ia te oe foi tagata e toatele e faia le galuega, o e talai, o tufuga ati maa, ma tufuga, o tagata popoto uma i galuega eseese uma lava.
16O le auro, ma le ario, ma le ‘apa memea ma le uamea, e le faitaulia. Ina tulai ia, ma galue, ia ia te oe foi Ieova.
17Ua poloai foi Tavita i alii uma o Isaraelu e fesoasoani ia Solomona lona atalii, ua faapea atu,
18E le o ia te outou ea o Ieova lo outou Atua, ua maua ai e outou le filemu i te ia i itu uma? Auā ua tuuina mai e ia tagata o le nuu i lo‘u lima; ma ua faatoilaloina le nuu i luma o Ieova, ma luma foi o lona nuu.
19O lenei, ia uai o outou loto ma o outou agaga e sailiili ia Ieova lo outou Atua; ina tulai ia, ma ia outou faia le malumalu o Ieova le Atua, e avatu i ai le atolaau o le feagaiga a Ieova, ma mea paia a le Atua, i le fale e faia i le suafa o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
